上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
人類的邪惡
6:1 人佇地上愈卡多，也生查某子的時，
6:2 上帝的子看見人的查某子媠，就照𪜶所愛，娶𪜶做某。
6:3 耶和華講：「人既然屬佇肉體，我的神無欲永遠𫢶佇𪜶；若是𪜶的日子欲到一百二十年。」
6:4 佇彼時有大漢人佇地面上，後來上帝的子及人的查某子同房，𪜶就生子；就是對古早英雄有名聲的人。
6:5 耶和華看見人佇地上，罪惡真大，心內所想的念頭逐日攏是歹，
6:6 耶和華退悔伊造人佇世間，心內憂悶。
6:7 耶和華講：「我欲對地上剿滅我所創造的人，將人及走獸，蟲𧒴，飛鳥，攏剿滅，因為我造𪜶了有退悔。」
6:8 只有挪亞得著恩典佇耶和華的面前。
挪亞
6:9 挪亞的世系記佇下底。挪亞是義人，佇彼世代的中間是完全的人。挪亞及上帝相及行。
6:10 挪亞生三個子，就是閃、含、雅弗。
6:11 世界敗壞佇上帝的面前，世界充滿強暴。
6:12 上帝看世界，攏敗壞；因為見有肉體者𪜶佇世界的行做攏是敗壞。
6:13 上帝對挪亞講：「見有肉體者，我看𪜶的末期已經到；因為𪜶的強暴充滿佇世界，你看，我欲將𪜶及地做一下毀滅。
6:14 你著用松柏柴做大船，船內著隔房間，內外用瀝青油糊伊。
6:15 大船的造法是按呢：長三百肘，闊五十肘，高三十肘。
6:16 船著做窗仔，高一肘。門著下佇船邊。船著做三層分上、中、下。
6:17 你看，我，我欲互大水氾濫佇地上，來毀滅天下；見若有活氣的肉體，見若佇地上者，攏會死。
6:18 總是我欲及你立我的約；你及你的子，你的某，你的媳婦攏著入大船。
6:19 見若有活氣的肉體，逐樣一對，一隻公的一隻母的，你著帶𪜶入大船，及你相及保全活命。
6:20 飛鳥各照伊的類，精牲各照伊的類，地上的蟲𧒴各照伊的類，逐樣一對，欲到你遐來保全𪜶的活命。
6:21 你著提逐樣的食物積聚啲，通做你及𪜶的食物。」
6:22 挪亞就按呢行。照上帝攏總所命令的去行。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。