上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
78:1 亞薩教示的詩。
上帝及伊的百姓
我的百姓啊，恁著聽我的教示，
俯耳孔聽我的嘴的話。
78:2 我欲開嘴設譬喻；
我欲講出古早隱密的話，
78:3 就是阮所聽見、所知的，
亦是阮的祖公傳互阮的。
78:4 阮無欲將諸個事對𪜶的子孫隱瞞，
欲將耶和華的名聲及伊的權能，
以及伊所行奇妙的事，傳互後世代。
78:5 因為，伊佇雅各立干證的話，
佇以色列設律法；
是伊命令咱的祖公的通傳互𪜶的子孫，
78:6 互後代就是得欲出世的子孫知；
𪜶亦欲起來傳互𪜶的子孫，
78:7 互𪜶的向望在佇上帝，
無𣍐記得全能者的所做，
是欲遵守伊的誡命。
78:8 免得親像𪜶的祖公，
是硬心悖逆的世代，是存心無四正的世代，
𪜶向上帝的心，無堅固。
78:9 以法蓮的子孫攑家私，及弓箭，
臨陣的日越轉身退後。
78:10 𪜶無遵守上帝的約，
肯照伊的律法來行；
78:11 閣𣍐記得伊所行的
及伊所互𪜶看奇妙的事。
78:12 伊佇埃及地，瑣安的田，
佇𪜶祖公的目睭前行奇異的事。
78:13 伊分開海，互𪜶過去，
閣互水竪起來，親像土堆。
78:14 伊日時用雲導𪜶，
通暝用火的光導𪜶。
78:15 伊佇曠野互石磐裂開，
互𪜶多多水通飲，
親像對深淵出。
78:16 伊互水對石磐淐出，
互水親像江河流落。
78:17 𪜶猶原沓沓得罪伊，
佇乾燥的地悖逆至高者。
78:18 𪜶心內試上帝，
照𪜶家己所愛者求食物，
78:19 𪜶濫糝議論上帝講：
全能的主佇曠野豈會辦桌嗎？
78:20 伊曾拍石磐，互水淐出，江河滿出來；
伊也會賞賜米糧嗎？
伊也會給伊的百姓備辦肉嗎？
78:21 所以，耶和華聽見就受氣；
就有炎火燒雅各的家；
受氣發起佇以色列族；
78:22 因為𪜶信服上帝，
倚靠伊的救恩。
78:23 總是伊就命令佇頂面的穹蒼，
閣開天的門，
78:24 伊降落嗎哪，親像落雨互𪜶食，
將天的米糧賞賜𪜶。
78:25 人食大權能者的食物；
伊賞賜米糧，互𪜶飽足。
78:26 伊互東風起佇天裡，
用伊的權能導南風來。
78:27 伊降落肉，佇𪜶中間，多親像土粉，
閣飛鳥，多親像海沙，
78:28 落佇𪜶的營中，
佇𪜶徛起的所在的四圍。
78:29 𪜶就食到飽飽；
伊照𪜶所愛的互𪜶。
78:30 𪜶的所愛猶未飽厭，
𪜶的食物猶佇𪜶的嘴內的時，
78:31 上帝就對𪜶發起受氣，
刣死𪜶中間的好漢人，
打倒以色列的少年人。
78:32 雖然按呢，𪜶猶原閣犯罪，
無因為伊奇怪的所做來信伊。
78:33 所以，伊互𪜶空空過日，
互𪜶歷年驚惶。
78:34 伊刣𪜶的時，𪜶才來求伊，
就越倒轉，切切求上帝。
78:35 𪜶亦追念上帝是𪜶的石磐，
至高的全能者是贖回𪜶者。
78:36 總是，𪜶用嘴諂媚伊，
用舌對伊講白賊。
78:37 因為𪜶無堅心意向伊，
無盡忠守伊的約。
78:38 總是伊有憐憫，
赦免𪜶的罪惡，
無滅無𪜶，
閣沓沓消伊的受氣，
無一盡發出伊的受氣。
78:39 伊想著𪜶不過是血氣，
是吹過去無倒轉的風。
78:40 𪜶佇曠野悖逆伊，
佇拋荒的所在，互伊憂悶到許多擺啊！
78:41 𪜶再三試上帝，
抵觸以色列的聖者。
78:42 𪜶𣍐記得伊的權能
及贖回𪜶脫離對敵的日；
78:43 伊怎樣佇埃及顯出伊的神蹟，
佇瑣安田顯出奇事，
78:44 將𪜶的江河變做血，𪜶的港亦是按呢，
致到攏𣍐飲得。
78:45 伊互蝴蠅歸陣到𪜶中間，來呫𪜶，
閣互田蛤仔來害𪜶，
78:46 將𪜶的土產交互蟲𧒴，
將𪜶勞苦來得著的交互草蜢。
78:47 伊落雹毀壞𪜶的葡萄樹，
落霜毀壞𪜶的桑材樹，
78:48 閣將𪜶的精牲交互雹，
將𪜶歸群的精牲交互閃爁。
78:49 伊發出伊的大受氣，以及受氣、痛恨、苦難
歸陣降災禍的使者，攏到佇𪜶。
78:50 伊為著家己的受氣舖平伊的路，
互𪜶的生命𣍐免得死，
將𪜶的活命交互瘟疫，
78:51 佇埃及拍死一切的大子，
佇含的布棚中拍死𪜶的頭上子。
78:52 總是伊導出家己的百姓親像羊，
佇曠野導𪜶親像羊群。
78:53 伊導𪜶安穩，互𪜶無驚惶；
海就淹死𪜶的對敵。
78:54 伊閣導𪜶到聖地的交界，
到伊正手所得著此個山。
78:55 伊佇𪜶的面前趕出列邦人，
用索仔將外邦人的地量互𪜶做業，
互以色列的支派徛起𪜶的布棚。
78:56 𪜶猶原試至高的上帝，來悖逆伊，
無守伊干證的話，
78:57 失信悖逆，無各樣𪜶的祖公；
變款親像弓反輪轉。
78:58 因為𪜶用𪜶山頭的壇惹著伊的受氣；
用𪜶雕刻的偶像互伊痛恨。
78:59 上帝聽見就受氣，
大厭惡以色列。
78:60 甚至棄拺示羅的會幕，
就是伊佇人的中間所搭的布棚；
78:61 閣將伊的氣力交互人搶去，
將伊的榮光交佇對敵的手；
78:62 亦將伊的百姓交互刀劍，
來受氣伊的家業。
78:63 𪜶的少年人互火燒滅；
𪜶的在室女無得著人的賀喜。
78:64 祭司倒佇刀下，
守寡人亦無啼哭。
78:65 彼時，主親像睏的人精神，
親像勇猛的人飲酒啲喝。
78:66 伊拍退伊的對敵，
互𪜶永永受凌辱；
78:67 閣伊棄拺約瑟的布棚，
無揀選以法蓮的支派，
78:68 總是揀猶大的支派──伊所意愛的錫安山；
78:69 閣起造伊的聖所，高親像天，
閣親像伊建立永永佇啲的地；
78:70 閣揀伊的奴僕大衛，
導伊對羊來，
78:71 互伊無閣隨許個羊母，
欲互伊養飼伊的百姓雅各
及伊的家業以色列。
78:72 伊就照伊心內的正直養飼𪜶，
閣用伊巧妙的手引導𪜶。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。