上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
雅各的遺囑
49:1 雅各叫伊許個子來，講：「恁攏聚集，我欲將恁日後所會抵著的事給恁講。
49:2 雅各諸個子，恁著聚集來聽，
著聽恁老父的話。
49:3 流便啊，你是我的大子，
我的權勢我的氣力的起頭，
威嚴的特色者，權能的特色者。
49:4 總是你親像水啲滾，的確𣍐得著居頭位；
因為你絔上恁老父的眠床，
彼時你拍垃墋伊，伊絔上我的舖。
49:5 西緬、利未是兄弟；
𪜶的刀劍是兇惡的器具。
49:6 我的心神啊，你通及𪜶同計謀；
我的神魂啊，你通及𪜶的會眾聯絡；
因為𪜶逞起受氣刣死人，
𪜶出在意思割斷牛腿的大筋。
49:7 𪜶的受氣躁暴通咒詛；
𪜶的恨氣殘忍亦是通咒詛。
我欲分開𪜶佇雅各家，
四散𪜶佇以色列族。
49:8 猶大啊，你的兄弟欲謳咾你；
你的手欲扼對敵的頷頸；
你的老父的子欲仆拜佇你的面前。
49:9 猶大是細隻獅；
我的子啊，你對所抓著的物就上去。
伊屈落，伊撐腳親像獅，
亦親像母的獅，是誰敢惹伊？
49:10 權柄無離開猶大，
治理者無離開伊兩支腳的中間，
到細羅來，
列邦攏欲歸伊。
49:11 縛伊的驢仔佇葡萄樹，
縛伊的驢仔子佇好的葡萄樹。
用葡萄酒洗伊的衣服，
用葡萄汁洗伊的衣裳。
49:12 伊的目睭因為酒來紅；
伊的嘴齒因為奶來白。
49:13 西布倫欲徛起海口，
欲做拋船的海口；
伊的界欲到西頓。
49:14 以薩迦是勇的驢，
倒佇羊稠的中間。
49:15 伊看安靜做好，看土地做媠，
俯肩頭擔壓，成做勞苦的奴僕。
49:16 但欲判斷伊的百姓，
親像以色列支派的一個。
49:17 但欲做路裡的蛇，路中的毒蛇，
咬傷馬蹄，騎的人向對後面落去。
49:18 耶和華啊，我有聽候你的拯救。
49:19 迦得欲互軍隊追迫；
總是伊欲追迫𪜶的腳後㬹。
49:20 亞設欲出好的米糧，
閣出王所食的好物。
49:21 拿弗他利是解放的鹿母：
出好聽的話。
49:22 約瑟是𠢕結果子的樹枝，
伊的樹枝伸出牆外。
49:23 射箭的人大傷害伊，
用箭射伊，窘迫伊。
49:24 總是伊的弓猶原緊；
伊的手也得著有力，
這是對雅各的全能者的手，
對這就有出牧者，以色列的石磐。
49:25 亦對你的父的上帝，伊欲幫助你；
閣對彼個全能者，伊欲賜福你，
欲用天頂降落的福氣，
深淵所囥的福氣，以及食奶生產的福氣，攏欲互你。
49:26 你的老父所祝的福氣
贏過我的父公所祝的福氣，
直到永世代的山嶺，極頭的邊界；
諸個福氣欲降落佇約瑟的頭殼，
臨到彼個及兄弟特別者的頭殼頂。
49:27 便雅憫是𠢕擘拆的豺狼，
早起時食伊所抓著的，
下昏時分伊所搶著的。」
49:28 這一切是以色列的十二支派；這亦是𪜶的老父對𪜶所講的話，給𪜶所祝福的，攏是照逐人的福份給𪜶祝福。
雅各的死及埋葬
49:29 伊閣吩咐𪜶講：「我欲倒去我的列祖遐，恁著將我埋葬佇赫人以弗崙田裡的穴，及我的父公像所在，
49:30 就是佇迦南地幔利的面前、麥比拉田裡的穴；彼個穴及田是亞伯拉罕對赫人以弗崙買做業，來做墓地的。
49:31 佇遐埋葬亞伯拉罕及伊的某撒拉，閣佇遐埋葬以撒及伊的某利百加；我亦佇遐埋葬利亞。
49:32 彼區田及彼內面的穴是對赫人買的。」
49:33 雅各吩咐伊許個子明白，腳勼上床，就氣斷，倒去伊的列祖遐。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。