上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
68:1 大衛的詩歌，交互樂官。
得勝的歌
願上帝起來，互伊的對敵四散，
互怨恨伊的人對伊的面前逃走。
68:2 你給𪜶趕散，親像煙受吹散；
歹人見著上帝的面就消滅，親像蠟見著火就溶去。
68:3 總是義人欲歡喜，
𪜶佇上帝的面前欲快樂，𪜶亦欲歡歡喜喜。
68:4 恁著對上帝吟詩，唱歌謳咾伊的名；
為著彼個坐車經過曠野者修造大路。
伊的名是耶和華，
著佇伊的面前快樂！
68:5 上帝佇伊聖的所在做孤兒的父，
做寡婦的伸冤者。
68:6 上帝互孤單的人有家，
互受關監的人出來享福；
獨獨悖逆的人𫢶佇乾燥的地。
68:7 上帝啊，早你行佇百姓的頭前，
經過曠野。（細拉）
68:8 彼時，地見著上帝的面就振動，天亦落雨；
彼個西奈也振動，是見著上帝
──以色列的上帝的面。
68:9 上帝啊，你落大雨；
你的產業以色列厭倦的時，你互伊堅固。
68:10 你的會眾𫢶佇彼中間；
上帝啊，你為著喪鄉人備辦恩惠。
68:11 主出命令，
傳好消息的婦女成大陣。
68:12 管兵的王逃走啦，逃走啦；
𫢶佇家內的婦女分著所搶的物。
68:13 恁倒佇羊內的時，
親像鴿的翅鑲白銀，伊的毛鑲黃金。
68:14 全能者佇彼內面趕散列王的時，
勢面親像佇撒們山落雪。
68:15 巴珊山是上帝的山；
巴珊山是多多山尖的山。
68:16 恁多多山尖的山啊，
恁啥事眥上帝所愛徛起的山？
耶和華欲𫢶佇遐到永遠！
68:17 上帝的車千千萬萬；
主佇彼中間，親像佇西奈佇聖的所在。
68:18 你已經上到高的所在，掠許個受掠者；
你佇人的中間，受𪜶所獻的，連悖逆的人亦獻，
互耶和華上帝通徛起𪜶中間。
68:19 主是應該謳咾者！
伊日日背阮的擔，
就是救阮的上帝。（細拉）
68:20 上帝是給阮行逐樣拯救的上帝；
會脫離死無是在佇主耶和華。
68:21 總是上帝欲拍破伊的對敵的頭殼，
就是彼個常常犯罪的人的頭殼。
68:22 主講：我欲互𪜶對巴珊倒轉來，
對深淵互𪜶倒轉來，
68:23 互你拍碎𪜶，你的腳踏佇對敵的血，
你的狗的舌舐𪜶。
68:24 上帝啊，你是我的上帝，我的王；
人已經看見你啲行，行入聖的所在。
68:25 唱歌者行佇頭前，作樂者隨佇後面，
搖鈴瓏鼓的查某囝仔佇中間。
68:26 對以色列的源頭來者，
佇逐個會中著謳咾上帝就是主！
68:27 佇遐，有管轄𪜶的小便雅憫，
有猶大的族長及𪜶歸群的眾人，
有西布倫的族長，
有拿弗他利的族長。
68:28 你的上帝定著你的氣力；
上帝啊，求你堅固你給阮所成的事！
68:29 為著你耶路撒冷的殿，
列王欲帶禮物獻互你。
68:30 求你責備蘆葦中的野獸及歸群的牛牨，
以及列邦中的牛仔。
將銀踏佇腳下；
上帝趕散愛交戰的百姓。
68:31 大官欲對埃及來；
古實欲趕緊向上帝來攑起手。
68:32 世上的列國啊，恁著對上帝唱歌；
願恁吟詩謳咾主！（細拉）
68:33 就是謳咾彼個坐佇對古早就有極高的天的主！
伊發出伊的聲，就是極大的聲。
68:34 恁著將權能歸互上帝。
伊的威嚴佇以色列的頂面；
伊的權能是佇穹蒼。
68:35 上帝啊，你對你聖的所在真正通驚；
以色列的上帝是彼個將氣力權能賞賜伊的百姓的。
上帝是應該謳咾的！
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。