上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
雅各祝福以法蓮及瑪拿西
48:1 諸個代誌了後，有人給約瑟講：「恁老父破病啦。」伊就導伊二個子瑪拿西、以法蓮相及去。
48:2 有人通知雅各講：「你看，你的子約瑟來欲尋你。」以色列就勉強起來坐佇眠床。
48:3 雅各給約瑟講：「全能的上帝曾佇迦南地的路斯對我出現，賜福我，
48:4 給我講：『我欲互你生湠多多，成做多多百姓，亦欲將此個地賞賜你的後裔，做永遠的業。』
48:5 我未到埃及你遮的代先，你佇埃及地所生二個子以法蓮、瑪拿西是我的，親像流便、西緬是我的一樣。
48:6 佇𪜶以後你所生的子就是你的，𪜶通歸佇𪜶二個兄的名下得著業。
48:7 論到我，我對巴旦來的時，拉結死佇我的目睭前，佇迦南地佇路裡的中間，離開以法他猶有一站，我就給伊埋葬佇以法他的路（以法他就是伯利恆）。」
48:8 以色列看見約瑟二個子，就講：「這是是誰？」
48:9 約瑟給𪜶老父講：「這是我的子上帝佇遮賞賜我的。」講：「請你導𪜶倚近我，我欲給𪜶祝福。」
48:10 以色列年老，目睭花，𣍐看見。約瑟導𪜶近倚伊的面前，伊就給𪜶唚嘴，抱𪜶。
48:11 以色列給約瑟講：「我無拍算會見著你的面，今上帝閣互我看著你的子。」
48:12 約瑟將二個子對伊二個腳頭窩中導出來，本身就仆落地拜。
48:13 後來，約瑟閣牽𪜶二個，正手牽以法蓮向以色列的倒手，倒手牽瑪拿西向以色列的正手，導𪜶近倚伊。
48:14 以色列伸正手，按以法蓮的頭殼，（伊是第二個），閣拍叉用倒手按瑪拿西的頭殼，瑪拿西本是大子。
48:15 伊就給約瑟祝福講：「願我的祖亞伯拉罕及我的父以撒所行佇伊面前的上帝，就是一生保養我到佇今仔日的上帝，
48:16 救贖我脫離一切的患難彼個使者，賜福互此二個囝仔。願𪜶歸佇我的名下及我祖亞伯拉罕、我的父以撒的名下。閣願𪜶佇世界中生湠真多。」
48:17 約瑟看伊的老父用正手按佇以法蓮的頭殼，無歡喜，就𫼘伊的老父的手，欲對以法蓮的頭殼徙到瑪拿西的頭殼。
48:18 約瑟給伊的老父講：「我的父啊，是按呢。此個是大子，求你用正手按伊的頭殼。」
48:19 伊的老父趁講：「我知，我的子，我知。伊亦欲成做一族，亦欲闊大。總是伊的小弟將來比伊卡大；伊的小弟的後裔欲成做多多族」。
48:20 當彼日就給𪜶祝福講：「以色列人欲指你來祝福人講：『願上帝互你親像以法蓮、親像瑪拿西一樣。』」對按呢立以法蓮佇瑪拿西的代先。
48:21 以色列閣給約瑟講：「我欲死啦，總是上帝欲及你佇啲，欲導恁倒去恁列祖的地。
48:22 我前用我的弓、我的刀對亞摩利人的手搶來彼塊地，我今互你，比你的兄弟得著卡加。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。