上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
18:1 耶和華的奴僕大衛的詩，交互樂官。當耶和華救伊脫離一切的對敵及掃羅的手的日，伊對耶和華唸此個詩的話。講：
大衛勝利的歌
( 撒下 22:1-51 )
耶和華，我的氣力啊！我疼你！
18:2 耶和華是我的山巖，我的山寨，我的救主，
我的上帝，我的石磐，我欲倚靠伊。
伊是我的盾牌，
是救我的角，是我的高台。
18:3 我欲求叫應該謳咾的耶和華；
我就得著救脫離我的對敵。
18:4 死無的索纏我，
匪類的大水互我驚，
18:5 陰間的索圍困我，
死無的羅網臨到我。
18:6 我佇苦難中祈求耶和華，
對我的上帝求叫。
伊對伊的殿內聽我的聲；
我佇伊的面前所求的入佇伊的耳孔。
18:7 因為伊受氣，地就搖閣泏；
山的地基亦振動搖泏。
18:8 對伊的鼻孔淐出煙；
對伊的嘴內發出火，土炭對按呢𤏸。
18:9 伊互天垂落低，本身臨到，
伊的腳下黑暗暗。
18:10 伊騎𠼻𡀔兵啲飛；
伊用風的翅緊緊飛。
18:11 伊用黑暗做匿身的所在，
做帳房來圍伊就是水的黑暗、空中的密雲。
18:12 因為伊頭前的光，
就伊的密雲行過去有雹及𤏸的土炭。
18:13 耶和華佇天裡起雷；
至高者出伊的聲有雹及𤏸的土炭。
18:14 伊射出伊的箭，互對敵四散；
發出多多閃爁，互𪜶擾亂。
18:15 耶和華啊，你的責備一下發，
你的鼻孔的氣一下出，
水底就出現，
大地的根基亦露現。
18:16 伊對頂面伸手搝我，
牽我出大水的中間。
18:17 伊救我脫離我猛的對敵以及許個怨恨我的人，
因為𪜶比我卡強。
18:18 我抵著災難的日，𪜶來攻擊我；
總是耶和華是我所倚靠者。
18:19 伊亦導我到開闊的所在；
伊救我，因為伊歡喜我。
18:20 耶和華照我的義報答我，
照我手的清氣報賞我。
18:21 因為我遵守耶和華的道路，
未曾做歹離開我的上帝。
18:22 伊的法律攏佇我的面前；
伊的禮儀我未曾棄拺。
18:23 我佇伊的面前做完全；
我亦保守家己離開我的罪惡。
18:24 所以，耶和華報賞我是照我的義，
亦是照我佇伊的目睭前我手的清氣。
18:25 慈愛的人，你用慈愛款待伊；
完全的人，你用完全款待伊。
18:26 清氣的人，你用清氣款待伊；
乖僻的人，你用彎曲款待伊。
18:27 因為困苦的百姓，你欲救伊；
自高的目睭，你欲互伊回落去。
18:28 因為你欲點𤏸我的燈；
耶和華──我的上帝欲照光我的暗。
18:29 因為我倚靠你衝入軍隊，
倚靠我的上帝跳過牆。
18:30 論到上帝，伊的路是完全；
耶和華的話是過鍛煉的。
見若倚靠伊者，伊就做𪜶的盾牌。
18:31 因為耶和華以外，是誰是上帝？
阮的上帝以外，是誰是石磐？
18:32 就是彼個用氣力縖我的腰、
互我的路完全的上帝。
18:33 伊互我的腳親像鹿母的腳，
閣安置我佇我高的所在。
18:34 伊教示我的手𠢕交戰，
致到我的手骨會開銅的弓。
18:35 你用你救恩的盾牌互我；
你用正手扶持我；
你的溫和互我做大。
18:36 你互我所踏的地開闊；
我的腳未曾踏趨。
18:37 我欲追我的對敵，亦欲趇著𪜶；
𪜶猶未滅無的代先，我無欲倒轉。
18:38 我欲拍𪜶殄殄，致到𪜶𣍐起來；
𪜶欲倒佇我的腳下。
18:39 因為你曾用氣力縖我的腰，互我𠢕交戰；
你互許個起來攻擊我者攏降服佇我的下面。
18:40 你亦互我的對敵越轉身逃走，
互我會剿滅許個怨恨我的人。
18:41 𪜶求叫，亦無人救𪜶；
就求叫耶和華，伊亦無應。
18:42 我搥𪜶到碎碎，親像風吹的土粉，
傾出𪜶，親像街路的土糜。
18:43 你救我脫離百姓的相爭，
你設立我做列邦的頭；
我本然識的百姓欲服事我。
18:44 𪜶一下聽見我的名就欲順趁我；
異邦的人欲投降我。
18:45 異邦人欲衰退，
驚惶愕愕惙出𪜶的營寨。
18:46 耶和華是活者。
願我的石磐得著謳咾；
願救我的上帝得著升高。
18:47 此個上帝，就是彼個給我伸冤、
互眾百姓降服佇我的下面的，
18:48 伊救我脫離我的對敵，
你將我舉起，卡高許個起來攻擊我的；
你救我脫離強暴的人。
18:49 耶和華啊，因為按呢我欲佇列邦中感謝你，
唱歌謳咾你的名。
18:50 耶和華賞賜極大的救恩，互伊所設立的王，
施出慈愛互伊受抹油者，
就是互大衛及伊的後裔，直到永遠。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。