上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
失落的銀杯
44:1 約瑟吩咐管家者講：「將米糧入滿諸個人的布袋，盡𪜶所會帶的，閣將逐人的銀橐佇伊的布袋口，
44:2 亦將我的杯就是彼塊銀杯下佇少年者的布袋口，伊糴五穀的銀亦續下啲。」管家者就照約瑟所講的話去行。
44:3 天一下光就差許個人及𪜶的驢去。
44:4 𪜶出城行無偌遠，約瑟給管家者講：「起來，去追趇許個人，追著就給𪜶講：『恁啥事用歹報好啊？
44:5 這豈是我的主人飲酒的杯嗎？豈是伊占卜啲用的嗎？恁按呢做是歹。』」
44:6 管家者追著𪜶，將諸個話給𪜶講。
44:7 𪜶應講：「我的主啥事講此號話？你的奴僕斷斷無做此號事。
44:8 你看，阮前佇布袋口所看見的銀，尚且對迦南地帶來還你；阮豈可會對你主人的家偷提金銀啊？
44:9 你的奴僕的中間無論佇甚麼人遐搜著，就互伊死，阮亦欲做我的主人的奴僕。」
44:10 管家者講：「今就照恁的話行！佇甚麼人遐搜著，彼人就做我的奴僕；其餘的攏無罪。」
44:11 對彼霎𪜶逐人趕緊將布袋卸佇土腳，逐人解開𪜶的布袋。
44:12 管家者就搜，對大的起到細的止，彼個杯竟然佇便雅憫的布袋內搜著。
44:13 𪜶就拆裂𪜶的衫，逐人將𪜶的物互驢載，倒去城內。
44:14 猶大及伊的兄弟到約瑟的厝，約瑟猶佇遐，𪜶就佇伊的面前仆落地。
44:15 約瑟給𪜶講：「恁所做的是甚麼事？恁豈知親像我此號的人會占卜嗎？」
44:16 猶大講：「阮對我的主欲講甚麼？猶有啥話通講？阮豈會家己說明啊？上帝已經查出你的奴僕的罪過。阮及彼個佇伊的手搜著杯的攏是我的主的奴僕。」
44:17 約瑟講：「我斷斷無欲按呢做！佇甚麼人的手搜著杯，彼人就著做我的奴僕；恁諸個！通平安上去恁老父遐。」
猶大替便雅憫哀求
44:18 猶大倚近伊，講：「我的主啊，求你容允你的奴僕講一句話互我的主聽，莫得受氣你的奴僕，因為你及法老一樣。
44:19 我的主曾問你諸個奴僕講：『恁有老父有兄弟無？』
44:20 阮給我的主講：『阮有老父，已經年老，猶有伊年老所生一個煞尾子。伊的兄已經死，伊的老母干單放伊一個，閣伊的老父真疼伊。』
44:21 你給你的奴僕講：『導伊落來我遮，互我親目看見伊。』
44:22 阮給我的主講：『囝仔𣍐會離開伊的老父，若離開伊的老父，老父的確死。』
44:23 你給你的奴僕講：『恁的煞尾小弟若無及恁相及落來，恁就𣍐得閣見我的面。』
44:24 阮上到你的奴僕──阮老父遐，就將我的主的話給伊講。
44:25 阮的老父講：『恁閣去給咱糴淡薄米糧來。』
44:26 阮就講：『阮𣍐會落去。阮的煞尾小弟若及阮相及去，阮就欲落去。因為，煞尾小弟若無及阮相及去，阮的確𣍐得見彼人的面。』
44:27 你的奴僕──我的老父給阮講：『恁知我的某給我生二個子。
44:28 一個離開我出去；我講伊的確是互野獸拆碎，到今我猶曾看見。
44:29 今恁閣將此個導去離開我，若伊抵著陷害，就是恁互我白頭毛、淒慘落陰府。』
44:30 阮老父的生命及此個囝仔的生命生相連。今我倒去你的奴僕──我的老父遐，若囝仔無及阮相及佇啲，
44:31 阮的老父看無囝仔，伊就的確死。這就是阮互你的奴僕──阮的老父白頭毛、淒慘落陰府。
44:32 因為你的奴僕曾對我的老父保此個囝仔，講：『我若無導伊倒來交你，我願佇老父的面前一生擔當罪。』
44:33 今求你容允你的奴僕𫢶啲，替此個囝仔做我的主的奴僕，互囝仔及伊許個兄相及上去。
44:34 若囝仔無及我相及去，我豈可會上去見我的老父啊？驚了我看見阮老父所抵著的災禍。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。