上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以斯拉記
對受掠的地倒來的人
8:1 亞達設西王坐位的時，及我對巴比倫上來的人，𪜶的族長及𪜶的世系記佇下面：
8:2 屬非尼哈的後裔有革順；屬以他瑪的後裔有但以理；屬大衛的後裔有哈突；
8:3 屬巴錄的後裔，就是示迦尼的後裔有撒迦利亞，及伊的，照世系來算，有查甫丁一百五十人；
8:4 屬巴哈‧摩押的後裔有西拉希雅的子以利約乃，及伊的有查甫丁二百人；
8:5 屬示迦尼的後裔有雅哈悉的子，及伊的有查甫丁三百人；
8:6 屬亞丁的後裔有約拿單的子以別，及伊的有查甫丁五十人；
8:7 屬以攔的後裔有亞他利雅的子耶篩亞，及伊的有查甫丁七十人；
8:8 屬示法提雅的後裔有米迦勒的子西巴第雅，及伊的有查甫丁八十人；
8:9 屬約押的後裔有耶悅的子俄巴底亞，及伊的有查甫丁二百一十八人；
8:10 屬示羅密的後裔有約細斐的子，及伊的有查甫丁一百六十人；
8:11 屬比拜的後裔有比拜的子撒迦利亞，及伊的有查甫丁二十八人；
8:12 屬押甲的後裔有哈加坦的子約哈難，及伊的有查甫丁一百一十人；
8:13 屬亞多尼干的後裔、就是路尾的，𪜶的名是以利法列、耶利、示瑪雅，及𪜶的有查甫丁六十人；
8:14 屬比革瓦伊的後裔有烏太及撒布，及𪜶的有查甫丁七十人。
以斯拉為聖殿招集利未人
8:15 我招集諸個人佇流入亞哈瓦的河邊，阮佇遐住佇布棚三日。我查看百姓及祭司，看無利未人佇遐，
8:16 我差人召許個頭人，就是以利以謝、亞列、示瑪雅、以利拿單、雅立、以利拿單、拿單、撒迦利亞、米書蘭，閣召教員約雅立及以利拿單。
8:17 我差𪜶去迦西斐雅的所在見彼個頭人易多，閣給𪜶講，𪜶佇迦西斐雅的所在著對易多及伊的兄弟尼提寧講甚麼話，教𪜶為咱上帝的殿帶差用的人來。
8:18 得著咱的上帝施恩的手幫助阮，𪜶佇以色列的曾孫、利未的孫、抹利的後裔中帶一個通達的人來；閣有示利比及伊許個子及伊的兄弟共十八人。
8:19 閣有哈沙比雅，及伊的有米拉利的後裔耶篩亞，及伊的兄弟及𪜶的子共二十人。
8:20 閣帶尼提寧人來就是前大衛及諸個首領所派做利未人的差用的，共二百二十個尼提寧，𪜶的名攏有登記。
以斯拉導百姓禁食祈禱
8:21 彼時，阮佇亞哈瓦的河邊宣佈禁食，通互阮佇咱的上帝的面前家己謙卑，求伊互阮及阮的囝仔，及一切所有的，攏得著平坦的路。
8:22 因為求王撥一隊步兵馬兵幫助阮佇路裡抵當對敵，我掠做見誚；因為阮曾對王講：「阮的上帝的手保護一切求伊的人；獨獨伊的能力及受氣攻擊一切棄拺伊的人。」
8:23 所以阮為著按呢禁食求阮的上帝，伊就聽阮。
獻互聖殿的禮物
8:24 對按呢我分派祭司的頭人十二個，就是示利比、哈沙比雅，及𪜶的兄弟十人，
8:25 我就將咱上帝殿的禮物，就是金銀及許個器具，是王及伊的謀士，伊的首領，及佇遐的以色列眾人所獻的攏秤來交付𪜶。
8:26 我就秤來交佇𪜶的手有銀六百五十他連得；銀器重一百他連得；金一百他連得；
8:27 金碗二十塊，重一千達利克；金爁爁好的銅器二塊，寶貴親像金。
8:28 我對𪜶講：「恁做聖歸耶和華，諸個器具也是聖；許個金銀是甘心獻互耶和華──恁列祖的上帝的。
8:29 恁著謹慎顧守，直到恁佇耶路撒冷耶和華殿的房內，佇祭司的頭人及利未人，以及以色列許個族長的面前秤伊。」
8:30 對按呢，祭司、利未人收金銀及器具照𪜶的輕重，欲帶到耶路撒冷咱上帝的殿。
倒去耶路撒冷
8:31 正月十二日，阮離開亞哈瓦的河邊，欲去耶路撒冷。咱的上帝的手保護阮，救阮脫離對敵及埋伏佇路裡的人的手。
8:32 阮到耶路撒冷，𫢶遐三日。
8:33 到第四日，佇咱上帝的殿秤許個金銀及器具，交佇祭司烏利亞的子米利末的手。及伊的有非尼哈的子以利亞撒，閣及𪜶的有利未人耶書亞的子約撒拔及賓內的子羅亞底。
8:34 一切照𪜶的數額照𪜶的輕重交伊，當時也記𪜶的輕重。
8:35 受掠的人對受掠的中間倒來的獻燒祭互以色列的上帝，就是為以色列眾人獻牛牨十二隻，綿羊牨九十六隻，綿羊仔七十七隻，閣獻山羊牨十二隻做贖罪的祭，諸個攏是做燒祭獻互耶和華的。
8:36 𪜶將王的諭旨交互王的人臣及佇河外許個總督，𪜶就幫助百姓，及上帝的殿。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。