上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
猶大國的王亞哈斯
28:1 ( 王下 16:1-4 )
亞哈斯坐位的時二十歲，佇耶路撒冷做王十六年；無親像伊的祖大衛行耶和華所看做好的事，
28:2 就是行以色列諸個王的路，閣鑄造許個巴力的像，
28:3 閣燒香佇便欣嫩的山谷，用伊的子兒燒佇火裡，趁外邦所行可惡的事就是耶和華佇以色列人的面前所趕逐的；
28:4 閣佇山頭壇、佇山的頂面、佇逐欉青翠的樹腳獻祭燒香。
及亞蘭及以色列交戰
28:5 ( 王下 16:5 )
所以，耶和華──伊的上帝交伊佇亞蘭王的手。𪜶就拍伊，掠伊的百姓真多，帶到大馬色。閣交伊佇以色列王的手，伊刣死𪜶真多。
28:6 利瑪利的子比加做一日佇猶大刣死十二萬人，攏是勇士，因為𪜶離開耶和華──𪜶列祖的上帝。
28:7 有一個以法蓮中的勇士，名叫細基利，刣王的子瑪西雅及管理王宮的押斯利甘，及宰相以利加拿。
28:8 以色列人掠𪜶的兄弟，連婦仁人子查某子共二十萬，閣搶多多財物，帶𪜶所搶的去撒瑪利亞。
先知俄德
28:9 總是佇遐有耶和華的先知，名叫俄德，出去接許個來撒瑪利亞的軍隊，給𪜶講：「因為耶和華──恁列祖的上帝受氣猶大，所以將𪜶交佇恁的手，恁竟然受氣抵天，刣𪜶真多。
28:10 今恁有意思壓制猶大人及耶路撒冷人做恁的奴僕女婢，總是恁本身豈無得罪耶和華──恁上帝嗎？
28:11 今恁著聽我講，恁所掠來恁的兄弟著放伊倒去，因為耶和華的大受氣臨到恁。」
28:12 對按呢，以法蓮的首領幾若人──就是約哈難的子亞撒利雅、米實利末的子比利家、沙龍的子耶希西家、哈得萊的子亞瑪撒──起來阻止許個對戰陣倒來者，
28:13 給𪜶講：「恁通帶所掠的人入來遮！因為恁所注意者是欲互阮得罪耶和華，加添阮的罪過阮的過失？因為阮的過失真大，已經有大受氣臨到以色列啦。」
28:14 對按呢攑家私的人將𪜶所掠的人所搶的物放佇許個首領及會眾的面前。
28:15 頂面許個記名的人就起來，互受掠的人來；其中有褪裼者，就對所搶來的物中提衫互𪜶穿，閣用鞋互𪜶，閣互𪜶飲食，用油抹𪜶；其中軟弱者，就互𪜶騎驢，送到棗樹城耶利哥𪜶的兄弟遐；後來就倒去撒瑪利亞。
亞哈斯向亞述王求幫助
28:16 ( 王下 16:7-9 )
彼時，亞哈斯王差使者去見亞述許個王，求𪜶幫助；
28:17 因為以東人閣來拍猶大，掠百姓去。
28:18 非利士人也來侵犯低的平洋及猶大南旁許個城，取伯‧示麥、亞雅崙、基低羅，梭哥及伊的鄉社，亭納及伊的鄉社，瑾鎖及伊的鄉社，就𫢶佇遐。
28:19 因為耶和華為著以色列王亞哈斯的緣故，互猶大卑微，是因為亞哈斯佇猶大放肆，大得罪耶和華。
28:20 亞述王提革拉‧毗尼色上來，無援助伊，反轉窘迫伊。
28:21 亞哈斯對耶和華的殿及王宮，及首領的家提出財寶互亞述王，總是攏無利益伊。
亞哈斯的罪行
28:22 此個亞哈斯王佇緊急的時，益發得罪耶和華。
28:23 因為伊祭祀大馬色的上帝就是拍伊者，講：「因為亞蘭王的上帝幫助𪜶，我也祭祀伊，互伊幫助我。」總是許個上帝互伊及以色列眾人攏倒壞。
28:24 亞哈斯聚集上帝殿的器具，拍破上帝殿內的器具，閣封鎖耶和華殿的門；佇耶路撒冷逐個越角起壇，
28:25 閣佇猶大逐個城起山頭壇，燒香互別個上帝，激動耶和華──伊的列祖的上帝的受氣。
28:26 亞哈斯其餘的事及伊的行做，對頭到尾攏記佇猶大及以色列諸個王的記錄。
28:27 亞哈斯及伊的列祖同睏，埋葬伊佇耶路撒冷城，無互伊入佇以色列諸個王的墓。伊的子希西家續接伊做王。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。