上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
約瑟及波提乏的某
39:1 約瑟互人帶落去埃及。有一個埃及人，是法老的人臣──侍衛長波提法，對許個帶伊來的以實瑪利人的手買去。
39:2 耶和華及伊相及佇啲，互伊逐項亨通，住佇伊的主人埃及人的家。
39:3 伊的主人看見耶和華及伊相及佇啲，閣耶和華互伊的手所做的攏亨通，
39:4 約瑟就佇主人的面前得著恩典，來服事伊，主人設立伊管理伊的家，將一切所有的交伊的手。
39:5 對主人設立伊管理家事及伊一切所有的，耶和華為著約瑟的緣故賜福佇彼個埃及人的家；見若家內及田裡一切所有的攏得著耶和華賜福。
39:6 伊將一切所有的攏交約瑟的手，除去伊所食的物以外，別項所有的攏知。
約瑟媠閣好生做。
39:7 諸個代誌以後，約瑟的主母注神看伊，講：「來及我睏。」
39:8 約瑟趁，對伊的主母講：「你看，家內有甚麼佇我的手，我的主人攏知；伊已經將所有的交佇我的手。
39:9 佇此家內無一個比我卡大；你以外，伊無一項無交我，因為你是伊的某。我怎樣通行此個大歹，來得罪上帝？」
39:10 後來伊逐日及約瑟講話，約瑟無聽伊的話，無及伊睏，亦無及伊做堆。
39:11 有一日，約瑟入厝辦伊的代誌，家內的人無一個佇厝內，
39:12 婦仁人就搝伊的衫，講：「你來及我睏！」約瑟將衫放佇伊的手，走出去外面。
39:13 婦仁人看見約瑟將衫放佇伊手裡閣走出外面，
39:14 就叫家內的人來，對𪜶講：「恁看啲！伊帶一個希伯來人入來咱的家，欲戲弄咱。伊來我遮，欲及我睏，我就大聲喝。
39:15 伊聽見我出聲喝，就將伊的衫放佇我遮，走出外面。」
39:16 婦仁人將約瑟的衫收佇伊遐，聽候伊的主人倒來，
39:17 就對伊講起諸個事，講：「你所帶來咱遮彼個希伯來的奴僕到我遮欲戲弄我，
39:18 我出聲喝，伊將伊的衫放佇我遮，走出外面。」
39:19 主人聽見伊的某對伊所講的話，講「你的奴僕親像按呢款待我」，伊就受氣，
39:20 約瑟的主人將伊關落監，就是王的罪犯受關的所在。對按呢約瑟佇彼個監內。
39:21 總是耶和華及約瑟佇啲，施恩互伊，互伊佇管監的人的面前得著恩典。
39:22 管監者就將監內所有的犯人攏交約瑟的手；𪜶佇遐所做的代誌攏是伊啲做。
39:23 見若約瑟手下的代誌，管監者一概無插，因為耶和華及約瑟佇啲；閣伊所做的耶和華攏互伊亨通。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。