上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
猶大國的王約阿施
24:1 ( 王下 12:1-16 )
約阿施坐位的時七歲，佇耶路撒冷做王歷過四十年。伊的老母名叫西比亞，是別是巴人。
24:2 祭司耶何耶大佇啲的日，約阿施行耶和華所看做好的事。
24:3 耶何耶大給伊娶二個某，伊生子查某子。
24:4 後來，約阿施有意思欲修理耶和華的殿，
24:5 就召集祭司及利未人，給𪜶講：「恁著去猶大許個城，對以色列眾人兌銀，通逐年修理恁的上帝的殿；恁著趕緊辦理此個事。」總是利未人無趕緊。
24:6 王召祭司頭耶何耶大來，給伊講：「你啥事無迫利未人對猶大及耶路撒冷帶銀來，就是照耶和華的奴僕摩西，及以色列的會眾，所定著著獻做干證的布棚的路用的？」（
24:7 因為彼個歹婦仁人亞她利雅的眾子曾拆毀上帝的殿，閣用耶和華殿內分別做聖的物獻互許個巴力。）
24:8 對按呢王出命令，𪜶就做一個櫃，下佇耶和華殿的門外，
24:9 閣宣佈猶大及耶路撒冷的百姓，著照上帝的奴僕摩西佇曠野命令以色列人所定著著獻的銀帶來互耶和華。
24:10 眾首領及眾百姓攏歡喜帶來㧒佇櫃裡，到圓滿。
24:11 利未人帶彼個櫃入王的辦公室，𪜶看見銀真多；就王的書記及祭司頭的委員來傾空彼個櫃，後來用櫃閣下佇原位。日日按呢做伊，拾銀真多。
24:12 王及耶何耶大用銀互做耶和華殿內辦事的人，𪜶就倩石匠、木匠修整耶和華的殿，閣倩鐵工、銅匠來修理耶和華的殿。
24:13 做工的人做𪜶的工，彼個工就明白，修理上帝的殿照舊的款，閣互伊真堅固。
24:14 已經完工，𪜶就帶所剩的銀到王及耶何耶大的面前，用伊來造器具做耶和華殿的路用，就是服事的器具來獻燒祭閣造匙，及金銀的器具。
耶何耶大的政策受廢
當耶何耶大活啲的日，人常常獻燒祭佇耶和華的殿。
24:15 耶何耶大漸漸老，日子滿足就死。死的時一百三十歲，
24:16 人葬伊佇大衛城及列王的中間；因為伊佇以色列中向上帝，及伊的殿行好。
24:17 耶何耶大死了，猶大眾首領來朝拜王；王聽趁𪜶。
24:18 𪜶放拺耶和華──𪜶列祖的上帝的殿，去服事許個亞舍拉及偶像；因為𪜶此個罪，就有受氣臨到猶大及耶路撒冷。
24:19 總是伊差先知到𪜶遐欲引導𪜶歸向耶和華。先知對𪜶做干證，若是𪜶聽。
24:20 彼時，上帝的神臨到祭司耶何耶大的子撒迦利亞，伊就徛佇百姓的頂面對𪜶講：「上帝按呢講：恁啥事犯著耶和華的誡令，致到𣍐得著亨通啊？因為恁棄拺耶和華，耶和華也棄拺恁。」
24:21 𪜶就結黨來害伊，照王的命令，佇耶和華殿的院內用石頭擲死伊。
24:22 按呢，約阿施王無數念撒迦利亞的老父耶何耶大所給伊做的，來害死伊的子。撒迦利亞死的時講：「願耶和華鑑察伸冤！」
約阿施受刣
24:23 年尾，亞蘭的軍兵上來攻擊約阿施，來到猶大及耶路撒冷，對百姓中滅百姓許個首領，用所搶的物運到大馬色王遐。
24:24 亞蘭的軍兵導一小隊的人來，耶和華用大隊的人交佇𪜶的手，是因為𪜶放拺耶和華──𪜶列祖的上帝，才用按呢來責罰約阿施。
24:25 對敵離開伊放拺伊，佇伊著重病的時；伊的奴僕為著祭司耶何耶大許個子的血，結黨來攻擊伊，刣伊佇伊的眠床，伊就死，人埋葬伊佇大衛的城，獨獨無葬伊佇列王的墓。
24:26 結黨來害伊的是亞捫的婦仁人示米押的子撒拔及摩押的婦仁人示米利的子約薩拔。
24:27 論到伊許個子，及伊所受的警戒，及伊修理上帝的殿的事，攏記佇列王記錄的註解。伊的子亞瑪謝續接伊做王。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。