上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
及以東交戰
20:1 此霎了後，摩押人及亞捫人，閣有米烏尼人，相及來欲及約沙法交戰。
20:2 有人來報約沙法講：「對海外對亞蘭遐有大軍隊來攻擊你，今𪜶佇哈洗遜‧他瑪，就是隱‧基底。」
20:3 約沙法就驚，定著意思懇求耶和華，佇猶大全地宣佈禁食。
20:4 對按呢猶大人聚會，求耶和華幫助。猶大逐個城攏有人出來尋耶和華。
20:5 約沙法就佇猶大及耶路撒冷的會中，徛佇耶和華殿的新院的頭前，講：
20:6 「耶和華──阮的列祖的上帝啊，你豈是佇天裡的上帝嗎？你豈是列邦萬國的主宰嗎？佇你的手有權能有氣力，無一個會抵敵你。
20:7 阮的上帝啊，你豈是曾佇你的百姓以色列人的面前趕逐此個地方徛起的百姓，將伊賞賜你的朋友亞伯拉罕的後裔到永遠嗎？
20:8 𪜶就𫢶佇此個地方，閣因為你的名佇遮給你起一間聖所，講：
20:9 『設使有災禍臨到阮，或是刀劍譴責，或是瘟疫飢荒，當患難的時，阮欲徛佇此間的頭前佇你的面前懇求你，因為你的名是𫢶佇此間殿，你欲聽來拯救。』
20:10 前以色列人出埃及地的時，你准𪜶侵犯亞捫人、摩押人，及西珥山人，就離開𪜶，無滅𪜶。
20:11 看啊，𪜶今怎樣報應阮，來趕逐阮出你的業，就是你賞賜阮互阮承接的。
20:12 阮的上帝啊，你無欲責罰𪜶嗎？因為阮無力通抵當此個來攻擊阮的大軍隊，阮也知著怎樣行，阮的目睭專專向你」。
20:13 猶大眾人及𪜶的細漢囝仔、𪜶的某、𪜶的子兒攏徛佇耶和華的面前。
20:14 彼時，耶和華的神佇公會中臨到雅哈悉，伊是利未人亞撒的後裔──瑪探雅的元孫，耶利的曾孫，比拿雅的孫，撒迦利雅的子。
20:15 伊講：「猶大眾人、耶路撒冷徛起的百姓，及約沙法王你，攏著聽耶和華對恁按呢講：『莫得因為此個大軍隊來驚來愞；因為此個交戰是在佇恁，就是在佇上帝。
20:16 明仔日恁著落去接陣，𪜶對洗斯山坪上來，恁欲佇耶魯伊勒曠野頭前的山谷口抵著𪜶。
20:17 此擺恁免交戰，猶大及耶路撒冷啊，恁著排陣徛啲，看耶和華拯救恁。免驚，免愞。明仔日著出去𪜶遐，因為耶和華及恁佇啲。』」
20:18 約沙法就俯頭仆佇地裡，猶大眾人及耶路撒冷徛起的百姓也仆佇耶和華的面前，敬拜耶和華。
20:19 哥轄族及可拉族的利未人攏徛起來，用極大的聲謳咾耶和華以色列的上帝。
20:20 隔日𪜶早早起來，出去提哥亞的曠野。出去的時，約沙法徛啲講：「猶大人及耶路撒冷徛起的百姓啊，著聽我：恁著信耶和華──恁的上帝就欲徛在；信伊的先知就欲亨通。」
20:21 伊已經及百姓議論，就設立唱歌謳咾耶和華的，互𪜶穿聖閣媠的衫，行佇軍隊的頭前謳咾耶和華講：「著感謝耶和華，因為伊的慈愛永遠佇啲！」
20:22 𪜶抵仔唱歌謳咾的時，耶和華就派埋伏的兵攻擊許個來攻擊猶大的亞捫、摩押，及西珥山的人，𪜶就受拍。
20:23 因為亞捫及摩押人起來，攻擊𫢶佇西珥山的人，一盡刣來滅𪜶；一盡滅𫢶佇西珥的人了後，𪜶逐個分旁相剿滅。
20:24 猶大人到曠野守望的樓，看見許個大軍隊，看啊，身屍倒佇地裡，無一個走離。
20:25 約沙法及伊的百姓來搶𪜶的財物，佇𪜶中間尋著多多財物、衣服、寶貝，𪜶剝做家己的多到帶𣍐去；𪜶搶物到三日，因為真多。
20:26 第四日𪜶聚集佇比拉迦的山谷，因為佇遐謳咾耶和華。所以彼所在名叫比拉迦山谷，到佇今仔日。
20:27 𪜶就倒去，就是猶大及耶路撒冷的人，約沙法佇𪜶的頭前，大家歡喜倒去耶路撒冷；因為耶和華及𪜶刣贏對敵，來歡喜快樂。
20:28 𪜶彈琴、彈瑟、歕號頭來耶路撒冷，到耶和華的殿。
20:29 列邦諸個國聽見耶和華刣贏以色列的對敵，就驚上帝。
20:30 按呢，約沙法的國太平，因為伊的上帝賞賜伊四圍平安。
約沙法死
20:31 ( 王上 22:41-50 )
約沙法做猶大王，坐位的時三十五歲，佇耶路撒冷做王歷過二十五年。伊的老母名叫阿蘇巴，就是示利希的查某子。
20:32 約沙法行伊的老父亞撒的路，無偏歪，行耶和華所看做好的事。
20:33 總是山頭壇猶未廢無，閣百姓也未有定著心意歸向𪜶列祖的上帝。
20:34 約沙法其餘的事，對頭到尾攏記佇哈拿尼的子耶戶的冊，彼個冊也列佇以色列列王的冊。
20:35 彼時了後，猶大王約沙法及以色列王亞哈謝結交；亞哈謝行歹到極。
20:36 二個王相及造船欲去他施，就佇以旬‧迦別造船。
20:37 彼時瑪利沙人、多大瓦的子以利以謝用讖語攻擊約沙法講：「因為你結交亞哈謝，耶和華破壞你的所做。」對按呢船就破，𣍐會去他施。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。