上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
猶大及她瑪
38:1 彼時，猶大離開伊的兄弟，落去到一個亞杜蘭人名做希拉的家。
38:2 猶大佇遐看見一個迦南人名叫書亞的查某子，就娶伊，及伊同房，
38:3 伊就懷孕生子，猶大就給伊號名做珥。
38:4 伊閣懷孕生子，老母給伊號名俄南。
38:5 伊又閣生子，給伊號名示拉。伊生示拉的時，猶大抵仔佇基悉。
38:6 猶大給伊的大子珥娶某，名叫她瑪。
38:7 猶大的大子珥行歹佇耶和華的面前，耶和華就互伊死。
38:8 猶大給俄南講：「你著及你的兄嫂同房，對伊來盡你做小弟的本份，給你的兄立後嗣。」
38:9 俄南知所生的子無歸佇伊家己，所以同房的時，遺泄佇地裡，免得互伊的兄有後嗣。
38:10 伊的所做，耶和華看做歹，互伊亦死。
38:11 猶大心內講：「驚了示拉亦死，親像伊二個兄一樣。」就對伊的媳婦她瑪講：「你去，住恁老父的家守寡，聽候我的子示拉長成。」她瑪就倒去，住佇𪜶老父的家。
38:12 過久久，猶大的某書亞的查某子死。猶大受安慰，就及伊的朋友亞杜蘭人希拉上去亭拿，到伊剪羊毛的人遐。
38:13 有人給她瑪講：「恁乾官上去亭拿剪伊的羊的毛。」
38:14 她瑪看見示拉已經長成，猶無娶伊做某，就褪伊守寡的衫，用帕罩面，閣𧜞身體，坐佇亭拿的路伊拿印門口。
38:15 猶大看見伊，掠做是娼妓，因為伊有罩面。
38:16 就越去路邊就近伊，講：「來！互我及你相及睏。」因為知是伊的媳婦。應講：「你欲及我睏，欲用甚麼互我？」
38:17 猶大講：「我對羊群內掠一隻山羊仔，寄來互你。」講：「你欲用物互我做準當，聽候你寄來嗎？」
38:18 猶大講：「我著甚麼互你做準當？」伊就講：「你的印、你的帶，及你手裡的枴仔。」就互伊，及伊睏，伊就對猶大懷孕。
38:19 她瑪起來去，褪伊的帕，猶原穿伊守寡的衫。
38:20 猶大託伊的朋友亞杜蘭人送一隻山羊仔，欲對彼個婦仁人的手提準當，尋伊𣍐著，
38:21 就問彼所在的人講：「伊拿印路邊的娼妓佇叨落？」𪜶講：「此位無娼妓。」
38:22 伊倒去見猶大講：「我尋伊無，彼位的人亦講：『此位無娼妓。』」
38:23 猶大講：「據在伊提去，免得咱見誚。你看，我已經將此隻山羊仔送伊，你竟然尋伊無。」
38:24 約略過三月日，有人給猶大講：「你的媳婦她瑪做娼妓，閣因為行淫續有娠孕。」猶大講：「給伊拖出來燒！」
38:25 她瑪互人拖出來的時，就差人去見伊的乾官講：「諸個物是是誰的，我就是對伊來懷孕。」閣講：「請你認，看此個印及帶及枴仔是是誰的？」
38:26 猶大認得就講：「伊比我卡有義，因為我無將伊嫁互我的子示拉。」對彼霎猶大無閣親近伊。
38:27 她瑪得欲生的時，知伊腹肚內是雙個。
38:28 啲生的時，一個囝仔伸一支手出來；拾姐提紅線縛佇伊的手，講：「此個是代先出的。」
38:29 後來伊的手勼入去，第二個出世；拾姐講：「你啥事𧽵出來？」此個爆破是為著你，所以給伊號名做法勒斯。
38:30 後來，彼個手縛紅線的亦生出來，就號伊的名做謝拉。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。