上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
16:1 𪜶扛上帝的約櫃，下佇大衛所給伊搭的布棚內，也獻燒祭及平安祭佇上帝的面前。
16:2 大衛獻燒祭及平安祭明白，就用耶和華的名給百姓祝福，
16:3 閣分互以色列的眾人，無論男女，逐人互𪜶一個餅，一塊肉，一個葡萄餅。
16:4 大衛派幾若個利未人佇耶和華的約櫃前服事，來紀念稱謝，謳咾耶和華──以色列的上帝：
16:5 做頭的是亞薩，第二個是撒迦利雅，閣有雅設、示米拉末、耶悅、瑪他提雅、以利押、比拿雅、俄別‧以東、耶利，彈瑟彈琴；只有亞薩拍大聲的鐃鈸；
16:6 祭司比拿雅及雅哈悉常常佇上帝的約櫃前歕號頭。
16:7 彼日，大衛起頭定著用亞薩及伊的兄弟感謝耶和華：
謳咾的歌
16:8 ( 詩 105:1-15 96:1-13 106:1,47-48 )
恁著感謝耶和華，求叫伊的名，
佇萬百姓的中間報揚伊的所做！
16:9 著向伊吟詩，向伊唱歌謳咾，
談論伊一切奇妙的所行。
16:10 著因為伊聖名來誇口；
尋耶和華的人，心內著歡喜。
16:11 著尋耶和華及伊的權能，
常常尋見伊的面。
16:12 伊的奴僕以色列的後裔，
伊所揀雅各的子孫啊，
恁著數念伊所做奇妙的事及伊的神蹟，
及伊的嘴判斷的話。
16:13 併於上節
16:14 伊是耶和華──咱的上帝，
全地攏有伊的判斷。
16:15 著記念伊的約，直到永遠；
伊所吩咐的話，直到萬代，
16:16 就是及亞伯拉罕所立的約，
對以撒所咒的誓。
16:17 伊閣將此個約對雅各定著做律例，
對以色列定著做永遠的約，
16:18 講：我欲將迦南地賞賜你，
做恁產業的份額。
16:19 當時恁的人丁有限，數額少少，
閣佇遐做出外；
16:20 𪜶對此族行到彼族，
對此族到別個百姓。
16:21 伊無容允甚麼人欺負𪜶，
為著𪜶的緣故譴責君王，
16:22 講：通摸著我受抹油者，
也通歹款待我的先知！
16:23 全地攏著向耶和華唱歌！
日日傳報伊的救恩。
16:24 佇列邦的中間講起伊的榮光，
佇萬百姓的中間講起伊奇妙的所做。
16:25 因為耶和華做大，應該受極大的謳咾；
伊佇眾上帝的頂面，應該受敬畏。
16:26 因為列邦的上帝攏是虛假，
獨獨耶和華創造諸個天。
16:27 佇伊的面前有尊貴及威嚴，
佇伊的所在有權能及歡喜。
16:28 百姓中的逐族啊，
恁著將權能榮光歸互耶和華，歸互耶和華！
16:29 用伊的名所應該得著的榮光歸互耶和華，
帶禮物來到伊的面前；
著用聖潔的妝飾敬拜耶和華。
16:30 全地佇伊的面前愕愕惙，
世界堅固𣍐搖動。
16:31 願天歡喜，地快樂；
佇列邦中著講：
耶和華做王！
16:32 願海及其中所充滿的攏出大聲；
願田園及其中所有的攏快樂。
16:33 彼時，樹林內的樹木欲佇耶和華的面前出歡喜的聲，
因為伊來欲審判全地。
16:34 恁著感謝耶和華；
因為伊是好，伊的慈愛永遠佇啲！
16:35 著講：拯救阮的上帝，求你救阮，
聚集阮，救阮脫離列邦人，
通互阮祝謝你的聖名，掠你的受謳咾做大悅。
16:36 著謳咾耶和華──以色列的上帝，
對永遠到永遠。
眾百姓攏講：「阿們！」閣謳咾耶和華。
佇耶路撒冷及基遍的敬拜
16:37 大衛留亞薩及伊的兄弟佇耶和華的約櫃前常常服事佇約櫃前，照逐日的工所著做的；
16:38 閣留俄別‧以東及𪜶的兄弟六十八人，以及耶杜頓的子俄別‧以東，及何薩做顧門者；
16:39 也留祭司撒督及伊的兄弟眾祭司佇基遍高的所在，耶和華的會幕前；
16:40 通佇燒祭的壇頂，逐日早暗，獻燒祭互耶和華，照耶和華命令以色列人的律法一切所記載的。
16:41 及𪜶做陣的有希幔、耶杜頓，及其餘受揀選記名者，通感謝耶和華，因為伊的慈愛永遠佇啲。
16:42 及𪜶做陣的有希幔、耶杜頓是用號頭及鐃鈸，以及上帝的樂器來互許個唱歌者。耶杜頓的子孫是做顧門者。
16:43 對按呢眾百姓逐人倒去𪜶的家；大衛也倒去給伊的家祝福。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。