上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
大衛做以色列及猶大的王
11:1 ( 撒下 5:1-10 )
以色列眾人就聚集到希伯崙見大衛，講：「看啊，阮是你的骨肉。
11:2 從前掃羅做王的時，導以色列人出入的也是你；閣耶和華──你的上帝曾對你講：『你欲照顧我的百姓以色列，也欲做我的百姓以色列的人君。』」
11:3 對按呢以色列眾長老到希伯崙見王。大衛就佇希伯崙佇耶和華的面前及𪜶立約，𪜶就用油抹大衛做以色列王，照耶和華託仗撒母耳所講的。
11:4 大衛及以色列人去到耶路撒冷，就是耶布斯；彼時本地的耶布斯人徛起佇遐。
11:5 徛起佇耶布斯的人給大衛講：「你𣍐會入遮。」總是大衛攻取錫安的衛所，做大衛的城。
11:6 大衛講：「做頭攻擊耶布斯人者，欲做首領做元帥。」洗魯雅的子約押代先上去，就做首領。
11:7 大衛徛起佇衛所，所以𪜶叫伊做大衛的城。
11:8 伊起城的四圍，就是對米羅起到伊的四圍，其餘的約押修理伊。
11:9 大衛直直卡強大，因為萬軍的耶和華及伊佇啲。
大衛勇士的頭人
11:10 ( 撒下 23:8-39 )
下底所記是大衛勇士的頭人，𪜶及以色列眾人奮勇幫助伊得著國，設立伊做王、照耶和華所論以色列的話。
11:11 大衛勇士的數額記佇下底：哈革摩尼人雅朔班，伊是諸個將的首領，伊曾做一時攑鎗刣死三百人。
11:12 第二是亞合人朵多的子以利亞撒，伊是三個勇士的一個。
11:13 伊曾及大衛佇巴斯‧達閔、非利士人聚集佇遐欲交戰。佇遐有一區園大麥滿滿，眾百姓就佇非利士人的面前逃走；
11:14 𪜶徛佇彼區園中來保護伊，續拍死非利士人。耶和華拯救𪜶互𪜶大卡贏。
11:15 三十個頭人中有三人落去石磐遐，入亞杜蘭的洞見大衛；非利士的軍隊紮營佇利乏音的山谷。
11:16 彼時大衛佇衛所，非利士人的兵營佇伯利恆。
11:17 大衛欣羨，講：「甚麼人會將伯利恆城門邊的井水汲來互我飲！」
11:18 此三人就對非利士的軍營衝過去，對伯利恆城門邊的井汲水，帶來互大衛。伊飲，傾佇耶和華面前，
11:19 講：「我的上帝啊，我決斷通做按呢，諸個人無顧生命，我豈敢飲𪜶的血嗎，因為𪜶無顧生命去汲來，所以伊飲伊！」諸個事是此三個勇士做的。
11:20 約押的兄弟亞比篩是彼三個勇士中的頭；因為伊攑槍攻擊三百人來刣死，就佇此三人中得著名。
11:21 三人中伊比彼二個卡出擢，就做𪜶的頭；總是𣍐比得起頭的三人。
11:22 有甲設人耶何耶大的子比拿雅曾做出多多大事的：刣死摩押人亞利伊勒的二個子，閣佇落雪的時落坑內刣死一隻獅，
11:23 閣刣死一個埃及的大漢人，有五肘的高，埃及人手裡有槍，大親像布機的樑；比拿雅攑枴落去接伊，搶埃及人手內的槍，才用伊的槍刣死伊。
11:24 諸個是耶何耶大的子比拿雅所行的事，就佇三個勇士中得著名。
11:25 伊比三十個勇士卡出擢，總是𣍐比得前三個勇士。大衛設立伊做侍衛長。
11:26 軍隊中的勇士有約押的兄弟亞撒黑、伯利恆人朵多的子伊勒哈難，
11:27 哈律人沙瑪、比倫人希利斯，
11:28 提哥亞人益吉的子以拉，亞拿突人亞比以謝，
11:29 戶沙人西比該，亞合人以來，
11:30 尼陀法人瑪哈萊、尼陀法人巴拿的子希立，
11:31 便雅憫族基比亞人利拜的子以太，比拉頓人比拿雅，
11:32 屬迦實諸個溪的人戶萊、亞拉巴人亞比，
11:33 巴路米人押斯瑪弗，沙本人以利雅哈巴，
11:34 基孫人哈深的眾子，哈拉人沙基的子約拿單，
11:35 哈拉人沙甲的子亞希暗，吾珥的子以利法勒，
11:36 米基拉人希弗，比倫人亞希雅，
11:37 迦密人希斯羅，伊斯拜的子拿萊，
11:38 拿單的兄弟約珥，哈基利的子彌伯哈，
11:39 亞捫人洗勒，比錄人拿哈萊（拿哈萊是給洗魯雅的子約押攑戰器者），
11:40 以帖人以拉，以帖人迦立，
11:41 赫人烏利亞，亞萊的子撒拔，
11:42 流便人示撒的子亞第拿（伊是流便支派中一個族長，導三十人），
11:43 瑪迦的子哈難，彌特尼人約沙法，
11:44 亞施他拉人烏西亞，亞羅珥人何坦的子沙瑪、耶利，
11:45 提洗人申利的子耶疊及伊的兄弟約哈，
11:46 瑪哈未人以利業，伊利拿安的子耶利拜、約沙未雅，摩押人伊特瑪、
11:47 以利業、俄備得，及米瑣八人雅西業。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。