上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
猶大國的王瑪拿西
21:1 ( 代下 33:1-20 )
瑪拿西坐位的時十二歲，佇耶路撒冷做王共五十五年。伊的老母名叫協西巴。
21:2 伊行耶和華所看做歹的事，學外邦人所行可惡的事，就是耶和華佇以色列的面前所趕出的。
21:3 因為伊的老父希西家所毀的山頭壇，伊閣起伊，閣為巴力起壇，做亞舍拉，照以色列王亞哈的所做，閣敬拜天頂的萬象來服事伊；
21:4 佇耶和華的殿內起幾若個壇。耶和華曾指此個殿講：「我欲安置我的名佇耶路撒冷。」
21:5 伊佇耶和華的殿二個院內為著天頂的萬象起壇，
21:6 閣互伊的子經過火，閣有看兆頭，用法術，用跳童者，請師公，行多多耶和華所看做歹的事，來激伊的受氣；
21:7 閣佇殿內祀伊所造亞舍拉雕刻的像。此間殿就是耶和華曾對大衛及伊的子所羅門指伊來講：「此間殿及耶路撒冷，就是我佇以色列眾支派中所揀的，我欲安置我的名佇遐，到永遠。
21:8 以色列人若執守來行我一切所命令𪜶的，照我的奴僕摩西所命令𪜶一切的律法，我就無閣互𪜶的腳移徙離開我所賞賜𪜶列祖的地。」
21:9 總是𪜶無聽趁。瑪拿西引誘𪜶行歹，比耶和華佇以色列人的面前所滅的列國閣卡傷重。
21:10 耶和華託伊的奴僕許個先知講：
21:11 「因為猶大王瑪拿西行諸個可惡的事比伊以前的亞摩利人所行的閣卡歹，閣用伊的偶像互猶大人陷落罪；
21:12 所以耶和華──以色列的上帝按呢講：看啊！我欲降災禍佇耶路撒冷及猶大，互一切聽見的人二個耳孔欲抖起來。
21:13 我欲用量撒瑪利亞的繩線及亞哈的家的墜繩牽佇耶路撒冷的頂面，欲拭耶路撒冷，親像人拭盤，拭了就反仆。
21:14 我欲放離我的產業所剩的，將𪜶交佇對敵的手，𪜶欲成做𪜶一切的對敵所掠所搶的；
21:15 因為𪜶對恁的列祖出埃及的日，也到今仔日，常常行我所看做歹的事，激我受氣。」
21:16 瑪拿西互猶大人犯罪，行耶和華所看做歹的事，伊此個罪以外，閣流多多無罪的人的血，滿耶路撒冷，對此角到彼角。
21:17 瑪拿西其餘的事，見伊所行的及伊所犯的罪豈無攏記佇猶大列王的記錄嗎？
21:18 瑪拿西及伊的列祖同睏，埋葬佇伊家己宮內的園就是烏撒的園；伊的子亞們續接伊做王。
猶大國的王亞們
21:19 ( 代下 33:21-25 )
亞們坐位的時二十二歲，佇耶路撒冷做王歷過二年。伊的老母名叫米舒利密，是約提巴人哈魯斯的查某子。
21:20 伊行耶和華所看做歹的事，親像伊的老父瑪拿西所做的；
21:21 行伊的老父一切所行的路，服事伊的老父所服事許個偶像，
21:22 棄拺耶和華──伊的列祖的上帝，無行耶和華的道路。
21:23 亞們的人臣背叛伊，刣死王佇王宮內。
21:24 總是國民刣死許個背叛亞們王的人，國民就設立伊的子約西亞續接伊做王。
21:25 亞們其餘所行的事豈無記佇猶大列王的記錄嗎？
21:26 埋葬佇家己的墓佇烏撒的園。伊的子約西亞續接伊做王。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。