上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
希西家的重病得醫好
20:1 ( 賽 38:1-8,21-22 代下 32:24-26 )
許個日的中間，希西家破病得欲死。亞摩斯的子先知以賽亞去見伊，對伊講：「耶和華按呢講：『你著設法你的家事，因為你得欲死，𣍐活。』」
20:2 伊就越轉面向壁，祈禱耶和華講：
20:3 「耶和華啊，求你記念我佇你的面前怎樣存完全的心，照誠實來行，閣做你所看做好的。」希西家就大聲啼哭。
20:4 以賽亞出去，猶未到中院，耶和華的話就臨到伊，講：
20:5 「你越倒轉給我的百姓的人君希西家講：你的祖大衛的上帝──耶和華按呢講：『我已經聽見你的祈禱，看見你的目屎，看啊！我欲醫好你；到第三日，你欲上去耶和華的殿。
20:6 我欲加添你的歲壽十五年，閣我欲救你及此個城脫離亞述王的手。我為著家己的緣故，閣為著我的奴僕大衛的緣故，欲保護此個城。』」
20:7 以賽亞講：「著提一塊無花果餅來。」𪜶就提來，貼佇仔，王就好。
20:8 希西家問以賽亞講：「耶和華欲醫好我，到第三日，我欲上去耶和華的殿，有甚麼兆頭？」
20:9 以賽亞講：「耶和華欲成伊所講的。這是耶和華欲互你的兆頭：你欲日影進前十度？抑是退後十度啊？」
20:10 希西家應講：「日影進前十度是卡快，無啦，著日影退後十度。」
20:11 先知以賽亞求叫耶和華，伊就互亞哈斯的日晷進前的日影，退後十度。
對巴比倫來的使者
20:12 ( 賽 39:1-8 )
當時，巴比倫王巴拉但的子比羅達‧巴拉但聽見希西家破病，就送批信及禮物互希西家。
20:13 希西家聽使者的話，就將伊囥寶物的厝、金銀、香料、貴氣的油，及伊的軍藏局，及府庫內一切所有的，攏互𪜶看。伊的家中及伊全國的內面，希西家無一項無互𪜶看。
20:14 對按呢先知以賽亞來見希西家王，問伊講：「諸個人講甚麼？𪜶對叨落來見你？」希西家講：「𪜶對遠遠的所在就是對巴比倫來。」
20:15 以賽亞講：「𪜶佇你的家有看見甚麼？」希西家應講：「凡若我家中所有的𪜶攏有看見，我的財寶的中間無一項無互𪜶看見。」
20:16 以賽亞對希西家講：「你著聽耶和華的話，
20:17 看啊，日子欲到，凡若你家內所有的及你的列祖積聚到現今的，攏欲受搶到巴比倫，無留一項。這是耶和華講的。
20:18 閣對你本身所生的子孫，其中有的欲受掠去佇巴比倫的王宮當太監。」
20:19 希西家對以賽亞講：「你所傳耶和華的話是好！閣講，我猶佇啲的日若有太平堅固，豈是好？」
希西家去世
20:20 ( 代下 32:32-33 )
希西家其餘的事及伊的能力，伊怎樣掘池、開溝、引水入城，豈無攏記佇猶大列王的記錄嗎？
20:21 希西家及伊的列祖同睏。伊的子瑪拿西續接伊做王。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。