上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
14
約押設法互押沙龍倒來
洗魯雅的子約押，知王的心意向押沙龍，
2 就差人去提哥亞，對遐叫一個聰明的婦仁人來，給伊講：「請你假做竪孝的，穿孝衫，莫得用油抹身軀，著妝做為著死人久久悲哀的婦仁人；
3 入去見王，照此個款對伊按呢講。」約押就將所著講的話教婦仁人講。
4 提哥亞的婦仁人對王講的時，面仆佇地裡拜，講：「王啊，救我！」
5 王問伊講：「你有甚麼代誌啊？」伊應講：「我實在是寡婦，我的丈夫已經死。
6 女婢有二個子，𪜶二個佇田裡相拍，無人佇𪜶中間排解，此個拍彼個互伊死。
7 今全家的人攏起來攻擊你的女婢，講：『你著將彼個拍死兄弟的交出來，阮通互伊死，賠伊拍死兄弟的生命，絕伊的後嗣。』按呢，𪜶欲將我剩的火炭拍熄，無互我的丈夫留名留後裔佇世間。」
8 王給婦仁人講：「你通倒去恁兜！我欲為著你出命令。」
9 提哥亞的婦仁人閣給王講：「我的主我的王，願此個罪歸佇我及我的父的家，王及伊的位攏無罪。」
10 王講：「見若有及你加講話的，你就導伊到我遮，伊就無閣來共你。」
11 婦仁人講：「願王紀念耶和華──你的上帝，通准報人命的行滅絕，驚了𪜶滅絕我的子。」王講：「我指永活的耶和華來咒誓：你的子連一支頭毛也𣍐磕落佇地裡。」
12 婦仁人講：「求你容允你的女婢對我的主我的王閣講一句話。」王講：「做你講！」
13 婦仁人講：「你啥事想按呢來攻擊上帝的百姓啊？王講此個話親像有罪，因為王無互伊的逃命者倒來。
14 因為咱攏的確著死，親像水潑佇地裡，𣍐會閣收倒轉。總是上帝無搶人的生命，是設法互逃命的人免受革逐、離開伊。
15 我來將此個話給我的主我的王講，是因為百姓互我驚惶。所以女婢講，今我欲給王講，豈採王欲成女婢的所求。
16 人欲將我及我的子對上帝的業做一下除滅，總是王欲聽，救伊的女婢脫離彼人的手。
17 女婢閣講，願我的主我的王的話來安慰；因為我的主我的王會分別是非，親像上帝的使者一樣。獨獨願耶和華──你的上帝及你佇啲！」
18 王應婦仁人給伊講：「我見若所欲問你的，攏通對我囥密。」婦仁人講：「願我的主我的王講伊。」
19 王講：「諸個豈是約押及你通套的嗎？」婦仁人講：「我的主我的王啊，我指你的活命來咒誓：我的主我的王所講的，無人會偏左抑偏右來閃避伊，因為你的奴僕約押吩咐我，用諸個話攏教你的女婢講。
20 你的奴僕約押做按呢，是欲互此個事勢轉彎。我的主有智慧親像上帝使者的智慧，會透徹世上一切的事。」
21 王給約押講：「我的確行此個事。今你著去，導彼個少年人押沙龍倒來。」
22 約押仆佇地裡來拜，祝謝王，約押講：「我的主我的王啊，王既然行你的奴僕所求的，今仔日你的奴僕知我有得著恩典佇你的目睭前。」
23 對按呢約押起身去基述，導押沙龍到耶路撒冷。
24 王講：「教伊倒去伊的厝，通見我的面。」押沙龍就倒去伊的厝，無見王的面。
押沙龍及大衛和好
25 押沙龍生做真好看，通以色列中無人親像伊得著人謳咾，對腳跡底到頭殼頂攏無瑕疵。
26 伊剪頭毛的時，秤伊的頭毛，照王的秤，重二百舍客勒；伊剪髮是佇逐個年尾，因為伊的頭毛真重，所以著剪伊。
27 押沙龍生三個子，一個查某子。查某子名叫他瑪，是一個面貌真媠的查某囝仔。
28 押沙龍住佇耶路撒冷滿二年，無見王的面。
29 押沙龍差人叫約押，欲差伊去見王，總是約押肯來伊遐。伊第二擺差人去叫伊，伊猶原來。
30 所以押沙龍對伊的奴僕講：「恁看，約押的園近我的園，伊有大麥佇遐，恁去放火燒伊。」押沙龍的奴僕就去放火燒伊。
31 約押就起來，到押沙龍的厝，問伊講：「你的奴僕啥事放火燒我的園？」
32 押沙龍應約押講：「我差人給你講來遮，互我通差你去見王，給伊講：『我啥事對基述倒來啊？我值著猶原住遐。』今著准我見王的面；我若有罪，伊通刣我。」
33 約押就去見王，給伊講，伊叫押沙龍。押沙龍就來見王，佇王的面前仆佇地裡，王就唚押沙龍。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。