上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
大衛及拔示巴
11:1 年頭，列王出戰的時，大衛差約押，及伊的人臣及以色列的眾人出去。𪜶就刣贏亞捫人，圍攻拉巴。大衛猶原𫢶佇耶路撒冷。
11:2 有一日，欲暗的時，大衛對床裡起來，佇王宮的厝頂行來行去，對厝頂看見一個婦仁人啲洗浴，婦仁人生做真媠，
11:3 大衛為著彼個婦仁人就差人去探聽。有人講：「伊豈是以連的查某子，赫人烏利亞的某拔示巴嗎？」
11:4 大衛差使者去導伊來，伊就來到伊遐，大衛及伊同房；婦仁人清氣伊的無清氣。就倒去𪜶厝。
11:5 婦仁人懷孕，差人給大衛講：「我已經懷孕。」
11:6 大衛差人到約押遐，講：「你差赫人烏利亞來我遮。」約押就差烏利亞去見大衛。
11:7 烏利亞已經來伊遐，大衛問看約押好嗎？百姓好嗎？交戰好勢嗎？
11:8 大衛給烏利亞講：「你落去恁兜洗腳。」烏利亞出王宮了後，王就送一份食物互伊。
11:9 總是烏利亞及伊主人的奴僕相及睏佇王宮的門口，無落去𪜶兜。
11:10 有人給大衛講：「烏利亞無落去伊的厝。」大衛就問烏利亞講：「你豈是對遠路來嗎？啥事落去你的家啊？」
11:11 烏利亞對大衛講：「約櫃及以色列及猶大攏𫢶佇草寮仔，我的主約押及我的主的奴僕攏紮營佇田野，我豈通倒去我的家飲食、及我的某相及睏嗎？我指你的活及你靈魂的活來咒誓，我決斷無欲行此個事！」
11:12 大衛給烏利亞講：「你今仔日猶原住遮，明仔再我互你去。」烏利亞就佇彼日及第二日住佇耶路撒冷。
11:13 大衛叫烏利亞來，伊就佇伊的面前飲食，伊互伊醉。已經暗，烏利亞出去伊的床裡睏，及伊的主諸個奴僕相及做伴，也無落去𪜶兜。
11:14 隔早起，大衛寫一張批互約押，託烏利亞的手帶去。
11:15 批內寫講：「著派烏利亞佇陣情極危急的所在，恁就對伊的後面退來，互伊受拍死。」
11:16 約押圍城的時，佇伊所知有勇士的所在，就派烏利亞佇遐。
11:17 城內的人有出來及約押交戰；大衛的奴僕死幾若人，赫人烏利亞也死。
11:18 約押差人用交戰的事攏給大衛講，
11:19 就吩咐使者講：「你用交戰一切的事給王講明白，
11:20 王若受氣，給恁講：『恁交戰的時啥事迫近城牆？豈知𪜶會對城頂射箭嗎？
11:21 前拍死耶路‧比設的子亞比米勒的是是誰？豈是一個婦仁人對牆頂㧒石磨的頂礅，佇伊的頂面，互伊死佇提備斯嗎？恁啥事迫近城啊？』你著講：『你的奴僕──赫人烏利亞也死。』」
11:22 使者去，照約押一切所命令的來給大衛講。
11:23 使者給大衛講：「對敵比阮卡強，出來郊野攻擊阮，阮拍伊到城門口。
11:24 射箭的人對牆頂射你的奴僕，王的奴僕死幾若人，你的奴僕赫人烏利亞也死。」
11:25 大衛給彼個使者講：「你著按呢給約押講：『免掛慮此個事，因為刀劍刣死人，此個彼個無一定；你著閣卡盡力攻城，來捙倒伊。』著按呢勉勵伊。」
11:26 烏利亞的某聽見丈夫烏利亞已經死，就為伊的丈夫啼哭。
11:27 丁憂已經明白，大衛差人導伊到宮內，伊就做伊的某，給伊生一個子。總是大衛所行的事，耶和華真無歡喜。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。