| 章節 | 台語漢字本聖經 請按此下載安裝Open Han 2024版字型，免得漏掉造字 |
| 28:1 | 彼時，非利士人聚集軍兵出陣，欲及以色列人交戰。亞吉對大衛講：「你著確實知，你及隨你的人攏著隨我出陣。」 |
| 28:2 | 大衛對亞吉講：「是，奴僕所會做的代誌，你的確會知。」亞吉給大衛講：「按呢，我設立你永遠做我的侍衛長。」 |
| 28:3 | 掃羅尋尪姨 彼時撒母耳已經死，以色列眾人為著伊哀哭，埋葬伊佇拉瑪，就是佇伊的本城。掃羅曾趕逐鬼上身的及行邪術的離開伊的境內。 |
| 28:4 | 非利士人聚集，紮營佇書念；掃羅聚集以色列眾人紮營佇基利波。 |
| 28:5 | 掃羅看見非利士的軍兵就真驚，心噗噗筅到極。 |
| 28:6 | 掃羅問耶和華，耶和華攏無用眠夢，抑是烏陵，抑是先知來應伊。 |
| 28:7 | 掃羅吩咐伊的奴僕講：「你著給我尋尪姨，互我通去伊遐問伊。」奴僕講：「佇隱‧多珥有一個尪姨。」 |
| 28:8 | 掃羅就改換伊的形容，穿別號的衫，有二人及伊去，暝時去彼個婦仁人遐。掃羅講：「請你用上你的身的神給我行法術，我所給你講的人，你給我牽伊上來。」 |
| 28:9 | 婦仁人對伊講：「看啊，你知掃羅的所做伊對境內剪除諸個鬼上身的及行邪術的。你啥事設計欲害死我的生命啊？」 |
| 28:10 | 掃羅指耶和華對伊咒誓講：「我指永活的耶和華來咒誓，你無欲因為此個事受刑罰。」 |
| 28:11 | 婦仁人講：「我著給你牽甚麼人上來啊？」伊講：「給我牽撒母耳上來。」 |
| 28:12 | 婦仁人看見撒母耳，就大聲叫，婦仁人給掃羅講：「你啥事騙我？因為你是掃羅。」 |
| 28:13 | 王對伊講「莫得驚，你看見甚麼？」婦仁人給掃羅講：「我看見神明對地裡上來。」 |
| 28:14 | 掃羅講：「伊的形狀怎樣？」伊講：「有一個老人上來，身軀𧜞長衫。」掃羅知是撒母耳，就仆佇地裡，拜伊。 |
| 28:15 | 撒母耳給掃羅講：「你啥事攪擾我，牽我上來啊？」掃羅講：「我困苦到極；因為非利士人及我交戰，上帝也離開我，無閣用先知抑是眠夢來應我。所以我請你來，通指示我著怎樣行。」 |
| 28:16 | 撒母耳講：「耶和華已經離開你，續做你的對敵，你啥事問我啊？ |
| 28:17 | 耶和華照伊託我所講的話行佇你，耶和華已經對你的手搶奪國位，互你的同伴大衛。 |
| 28:18 | 因為你無趁耶和華的話；行伊的大受氣佇亞瑪力，所以耶和華今仔日按呢行佇你， |
| 28:19 | 閣耶和華欲將你及以色列交佇非利士人的手。明仔日你及你許個子欲及我佇啲；耶和華欲將以色列的軍兵交佇非利士人的手。」 |
| 28:20 | 掃羅忽然身軀倒直直佇地裡，因為撒母耳的話就真驚，到攏無力；因為一日一暝，攏無食甚麼。 |
| 28:21 | 婦仁人倚近掃羅，看見伊真迫腹，對伊講：「你的女婢聽你的話，無顧家己的生命，聽你所給我講的話。 |
| 28:22 | 今求你聽女婢的話，容允我佇你的面前排淡薄食物，互你食，你行路才有氣力。」 |
| 28:23 | 伊推辭，講：「我食。」總是伊的奴僕及婦仁人好嘴勸伊，伊才聽𪜶的嘴，對地裡起來，坐佇床裡。 |
| 28:24 | 婦仁人厝內有一隻肥的牛仔，趕緊刣伊，閣提麵粉摶伊做無酵餅來煏伊， |
| 28:25 | 排佇掃羅及伊的奴僕的面前。𪜶食伊，彼暝𪜶就起身去。 |