| 章節 | 台語漢字本聖經 請按此下載安裝Open Han 2024版字型，免得漏掉造字 |
| 15:1 | 及亞瑪力人交戰 撒母耳給掃羅講：「耶和華差我用油抹你設立你做王，治理伊的百姓以色列；所以你著聽耶和華所講的話。 |
| 15:2 | 萬軍的耶和華按呢講：『以色列人出埃及的時，亞瑪力人怎樣款待𪜶，怎樣截𪜶的路，我攏記得。 |
| 15:3 | 今你著去拍亞瑪力，一盡滅無𪜶所有的，莫得保惜𪜶，將男女、囝仔、食奶的、及牛、羊、駱駝，及驢一盡刣死𪜶。』」 |
| 15:4 | 掃羅就招集百姓佇提拉因，點算𪜶，共步兵二十萬，猶大人一萬。 |
| 15:5 | 掃羅到亞瑪力的城，埋伏佇山谷中。 |
| 15:6 | 掃羅給基尼人講：「恁落去離開亞瑪力人，免得我將恁及𪜶做一下剿滅；因為以色列人出埃及的時，恁曾好款待𪜶。」對按呢基尼人離開亞瑪力人去。 |
| 15:7 | 掃羅拍亞瑪力人，對哈腓拉到埃及頭前的書珥， |
| 15:8 | 伊活活掠亞瑪力王亞甲，用刀一盡刣死伊的眾百姓。 |
| 15:9 | 總是掃羅及百姓保惜亞甲，也保惜上好的羊、牛、牛仔、羊仔，及一切好的物，肯剿滅伊。見若下賤成物的，攏一盡刣死。 |
| 15:10 | 掃羅受廢 彼時耶和華的話臨到撒母耳講： |
| 15:11 | 「我為著設立掃羅做王，來退悔；因為伊越轉去無隨我，無遵守我的命令。」撒母耳真慼心，通暝求耶和華。 |
| 15:12 | 撒母耳隔早起，透早欲去迎接掃羅。有人給撒母耳講：「掃羅到迦密，佇遐為家己徛石碑，閣越轉過去落到吉甲。」 |
| 15:13 | 撒母耳到掃羅遐，掃羅給伊講：「願耶和華賜福你，我已經遵守耶和華的命令啦。」 |
| 15:14 | 撒母耳講：「按呢就此個羊咩咩哮入我的耳孔，及我所聽牛啲哞，是甚麼因端？」 |
| 15:15 | 掃羅講：「𪜶對亞瑪力人遐帶來的，因為百姓保惜上好的羊、牛，欲獻互耶和華──你的上帝；其餘的，阮攏剿滅。」 |
| 15:16 | 撒母耳給掃羅講：「你恬恬！我欲將耶和華昨暝所給我講的給你講。」伊給伊講：「請講。」 |
| 15:17 | 撒母耳講：「早你雖然家己看做微細，豈是受設立做以色列支派的頭嗎？耶和華用油抹你做王來治理以色列。 |
| 15:18 | 閣耶和華差你起身去，吩咐你講，亞瑪力人是有罪的人，你去一盡剿滅伊，閣及𪜶交戰到𪜶攏滅。 |
| 15:19 | 你啥事無趁耶和華的話，趕緊去搶物，行耶和華所看做歹的事啊？」 |
| 15:20 | 掃羅給撒母耳講：「我實在有聽趁耶和華的命令，行耶和華所差我行的路，掠亞瑪力王亞甲來，一盡滅亞瑪力人。 |
| 15:21 | 獨獨百姓對所搶的物的中間，取羊牛應該獻的物的上好的，欲佇吉甲祭獻耶和華──你的上帝。」 |
| 15:22 | 撒母耳講：
耶和華歡喜燒祭祭祀， 豈親像歡喜人遵趁耶和華的話嗎？ 看啊，遵趁贏過獻祭； 聽趁是贏過羊牨的油。 |
| 15:23 | 因為背叛是親像行邪術的罪；
硬心是親像服事虛假親像拜偶像。 為著你棄拺耶和華的話， 伊也棄拺你無互你做王。 |
| 15:24 | 掃羅認罪 掃羅對撒母耳講：「我有罪，因為我有犯著耶和華的命令及你的話，是對我驚百姓，聽𪜶的話。 |
| 15:25 | 今求你赦免我的罪，及我倒去，互我通敬拜耶和華。」 |
| 15:26 | 撒母耳給掃羅講：「我及你倒去；因為你棄拺耶和華的命令，耶和華也棄拺你無互你做以色列的王。」 |
| 15:27 | 撒母耳越轉身欲去，掃羅就搝伊的衫仔裾，衫就拆斷。 |
| 15:28 | 撒母耳給伊講：「今仔日耶和華互以色列國及你絕斷，也是按呢，將伊賞賜你的厝邊的一個比你卡好者。 |
| 15:29 | 以色列的大顯赫者無白賊，也無退悔；因為伊是世間人，有退悔。」 |
| 15:30 | 掃羅講：「我有罪，雖然按呢，求你尊重我佇我的百姓的長老及以色列人的面前，及我倒去，互我敬拜耶和華──你的上帝。」 |
| 15:31 | 撒母耳就越轉身隨掃羅去，掃羅就敬拜耶和華。 |
| 15:32 | 撒母耳講：「恁著帶亞瑪力王亞甲來我遮。」亞甲就安心來到伊的面前，亞甲講，死無的艱苦的確過去啦。 |
| 15:33 | 撒母耳講：「你的刀曾互婦仁人無子，按呢，你的老母佇婦仁人中也欲無子。」對按呢，撒母耳佇吉甲耶和華的面前將亞甲破歸塊。 |
| 15:34 | 撒母耳去拉瑪。掃羅上去伊的厝，到掃羅的基比亞。 |
| 15:35 | 撒母耳到伊死的日，無閣來見掃羅；因為撒母耳為著掃羅憂悶，耶和華因為設立掃羅做以色列王也退悔。 |