上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
路得記
1
以利米勒全家去到摩押地
當士師辦政事的時，彼個地抵著飢荒。佇猶大伯利恆，有一個人及伊的某二個子出外去摩押地。
2 彼人名叫以利米勒，伊的某名叫拿俄米；伊二個子，名瑪倫、基連，攏是猶大伯利恆的以法他人。𪜶到摩押地，就佇遐徛起。
3 後來拿俄米的丈夫以利米勒死，放伊及伊二個子。
4 二個子娶摩押的查某子做某，一個名叫俄珥巴，一個名叫路得，𫢶佇遐約略十年。
5 瑪倫及基連二人也死，剩彼個婦仁人無丈夫，也無子。
拿俄米及路得倒去伯利恆
6 伊就及二個媳婦起來，欲對摩押地倒去；因為伊佇摩押地聽見耶和華眷顧伊的百姓，賞賜𪜶米糧。
7 伊就對伊徛起的所在出去，二個媳婦及伊去，𪜶行路欲倒去猶大地。
8 拿俄米給二個媳婦講：「恁去啊，逐個倒去老母的厝。願耶和華好款待恁，親像恁款待已經死的人及我一樣！
9 願耶和華賞賜恁逐人佇丈夫的家得著平安！」就及𪜶唚嘴。𪜶就出聲啼哭，
10 給伊講：「啊，阮欲及你相及倒去你的百姓遐。」
11 拿俄米講：「我的查某子啊，倒去啊！啥事欲及我去啊？我猶會懷胎生子做恁的丈夫嗎？
12 我的查某子啊，倒去啊，去啊！我已經年老，𣍐會閣有丈夫；我若講，我猶有向望，我今暝若有丈夫也會生子，
13 恁豈會聽候𪜶大漢嗎？恁豈會家己守無嫁人嗎？我的查某子啊，莫得按呢。我為著恁盡在憂苦，因為耶和華伸手攻擊我。」
14 𪜶閣出聲哭，俄珥巴及乾家唚嘴，獨獨路得及伊放𣍐離。
15 伊講：「看啊，你的同姒已經倒去伊的百姓伊的上帝遐，你也著隨你的同姒倒去！」
16 路得講：「莫得勸我離開你，倒去無隨你。因為你去遐，我也欲去遐；你歇佇遐，我也欲歇遐；你的百姓欲做我的百姓，你的上帝也欲做我的上帝。
17 你死佇遐，我也死佇遐，埋葬佇遐。除死以外若有甚麼互你我相離！願耶和華加倍責罰我。」
18 伊看見伊決意欲及伊去，就無閣對伊講起。
19 對按呢二人相及行，來到伯利恆。𪜶到伯利恆，通城為著𪜶攏泏起來。許個婦仁人講：「這是拿俄米嗎？」
20 伊應講：「莫得叫我拿俄米，著叫我瑪拉，因為全能者款待我真艱苦。
21 我出去的時滿足，耶和華互我空空倒來。耶和華已經責備我來證明我，全能者已經苦楚我。恁啥事叫我拿俄米啊？」
22 按呢拿俄米倒來，伊的媳婦摩押的查某子路得，對摩押地倒來的也及伊來，𪜶到伯利恆抵仔是起手割大麥的時。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。