上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
亞比米勒
9:1 耶路‧巴力的子亞比米勒到示劍見伊的眾母舅，對𪜶及伊外公全家的人講：
9:2 「請恁講互示劍的眾人聽，看是耶路‧巴力的眾子七十人管恁，抑是一人管恁，叨落一項卡好？恁也著數念我是恁的骨肉。」
9:3 伊許個母舅就將此個一切的話替伊講互示劍的人聽，𪜶的心就歸向亞比米勒。因為講：「伊是咱的兄弟」；
9:4 就對巴力‧比利土的厝提七十個銀仔互亞比米勒；伊就用伊來雇諸個無下落的匪類，許個人來隨伊。
9:5 伊去俄弗拉到伊的老父的家，將耶路‧巴力的子，就是伊的兄弟七十人攏刣死佇一塊石磐頂；只有耶路‧巴力的煞尾子約坦留啲，因為伊有走去匿。
9:6 示劍人及米羅的家攏聚集，去設立亞比米勒做王，佇示劍祀柱的橡樹腳。
9:7 有人給約坦講此個事，伊就去徛佇基利心山頂，大聲喝給𪜶講：「示劍人啊，恁著聽我的話，互上帝也聽恁。
9:8 曾有一擺諸個樹攏去，欲設立一欉樹做𪜶的王，就去對橄欖樹講：『請你做阮的王。』
9:9 橄欖樹應講：『我豈通放拺我的油就是人所用來尊重上帝及人的，去搖佇眾樹的頂面嗎？』
9:10 諸個樹對無花果樹講：『你來，來做阮的王。』
9:11 無花果樹應講：『我豈通放拺我的甜閣好的果子，去搖佇眾樹的頂面嗎？』
9:12 諸個樹對葡萄樹講：『你來，來做阮的王。』
9:13 葡萄樹應講：『我豈通放拺我的新酒就是互上帝及人歡喜的，去搖佇眾樹的頂面嗎？』
9:14 諸個樹對莿仔講：『你來，來做阮的王。』
9:15 莿仔應許個樹講：『恁若實在設立我做恁的王，就著閃匿佇我的蔭影下；若，願火對莿仔出，燒滅黎巴嫩的柏香樹。』
9:16 「今恁設立亞比米勒做王，若照誠實公義來行閣好款待耶路‧巴力及伊的家，照伊的手所著磨的報答伊。
9:17 因為我的老父曾拋死為恁交戰，救恁脫離米甸人的手。
9:18 恁今仔日起來攻擊我老父的家，刣死伊的子七十人佇一塊石磐頂，閣設立伊的女婢的子亞比米勒做示劍人的王；因為伊是恁的兄弟。
9:19 恁今仔日若照誠實公義款待耶路‧巴力及伊的家，就恁通對亞比米勒來歡喜，伊也通對恁來歡喜；
9:20 若無，願火對亞比米勒出，燒示劍人及米羅的家，閣願火對示劍人及米羅的家出，燒亞比米勒。」
9:21 約坦因為驚伊的兄弟，就逃走，走去匿佇比珥，𫢶佇遐。
9:22 亞比米勒管以色列三年。
9:23 上帝差歹神佇亞比米勒及示劍人的中間，示劍人就用詭詐款待亞比米勒。
9:24 來報應耶路‧巴力七十個子所受的殘害也互𪜶的血歸佇刣死𪜶的，就是𪜶的兄弟亞比米勒，也歸佇示劍人就是助伊的手刣死伊的兄弟者。
9:25 示劍人佇山頂設埋伏，來當等伊。見若對彼條路過的人，𪜶就搶伊。有人就將這事去報亞比米勒。
9:26 以別的子迦勒及伊的兄弟來到示劍，示劍人攏信靠伊。
9:27 𪜶出去園裡，收葡萄園，來踏酒，設筵席，入𪜶的上帝的廟飲食，咒詛亞比米勒。
9:28 以別的子迦勒講：「亞比米勒是是誰？示劍是是誰？互咱服事伊啊？伊豈是耶路‧巴力的子嗎？伊的軍長豈是西布勒嗎？恁著服事示劍的老父哈抹的人。咱啥事服事伊啊？
9:29 願諸個百姓歸我的手下，我就除亞比米勒。」伊就給亞比米勒講：「加添你的軍兵出來。」
9:30 城守西布勒聽見以別的子迦勒的話，就受氣，
9:31 暗靜差人去見亞比米勒，講：「以別的子迦勒及伊的兄弟到示劍，誘惑城內的百姓攻擊你。
9:32 所以你及隨你的人，著透暝起來，埋伏佇田裡。
9:33 早起時日抵仔出，你著早早起來衝倚攻城。迦勒及隨伊的人出來攻擊你的時，你就通相機會來款待𪜶。」
9:34 亞比米勒及隨伊的眾人透暝起來，分做四隊，向示劍埋伏。
9:35 以別的子迦勒出去，徛佇城門口。亞比米勒及隨的人對埋伏的所在起來。
9:36 迦勒看見許個人，就對西布勒講：「看啊，有人對山頂落來。」西布勒講：「你看見山的影，掠做是人。」
9:37 迦勒閣講：「看啊，有人對高地落來，閣有一隊對米惡尼尼橡樹的路上來。」
9:38 西布勒對伊講：「你曾講，亞比米勒是是誰，互咱服事伊？你講諸個話的嘴佇叨落？這豈是你所藐視的百姓嗎？你今著出去，及𪜶交戰！」
9:39 迦勒就對示劍人的頭前出去，及亞比米勒交戰。
9:40 亞比米勒追趕伊；伊佇伊的面前逃走，有多多人著傷倒啲，直到城門口。
9:41 亞比米勒𫢶佇亞魯瑪。西布勒趕迦勒及伊的兄弟，准伊𫢶佇示劍。
9:42 隔日，百姓出去到田裡，有人給亞比米勒講；
9:43 伊就將伊的人分做三隊，埋伏佇田裡，看見示劍人對城裡出來，就起來攻擊𪜶刣𪜶。
9:44 亞比米勒及隨伊彼一隊衝進前，徛佇城門口；彼二隊直直衝到田裡許個人，來刣𪜶。
9:45 亞比米勒通日攻擊城，取彼個城，刣死彼內面的百姓，拆毀彼個城，用鹽撒伊。
9:46 𫢶佇示劍台的人聽見，就閃入巴力‧比利土的厝的衛所。
9:47 有人給亞比米勒講：「示劍台的人攏聚集佇一所在。」
9:48 亞比米勒及隨伊的人就攏上撒們山。亞比米勒手提斧頭，剉一欉樹枝，夯佇肩頭頂，對隨伊的人講：「恁看我所行的，也著緊緊學我來行。」
9:49 眾人就逐個剉一枝，來隨亞比米勒，將樹枝疊佇衛所，放火燒衛所佇許個人的頂面，致到示劍台的人攏死，男女約略一千人。
9:50 亞比米勒去到提備斯，紮營佇提備斯，來取伊。
9:51 城內有堅固的台；城內的眾人，無論男女，攏走去遐，關門，上台頂。
9:52 亞比米勒到彼個台攻擊伊，倚近台門，欲用火燒伊。
9:53 有一個婦仁人將一塊頂礅的磨石，擲著亞比米勒的頭殼，拍破伊的頭殼碗。
9:54 伊就緊緊叫攑伊的軍器的少年人，給伊講：「拔你的刀，刣我！免得人講我，伊是婦仁人所刣的。」少年人就給伊鑿透，伊就死。
9:55 以色列人看見亞比米勒已經死，逐個就倒去伊的所在。
9:56 按呢，上帝報應亞比米勒向伊的老父所行的歹，就是刣死伊的兄弟七十人。
9:57 示劍人一切的歹，上帝也攏報應佇𪜶的頭殼頂；耶路‧巴力的子約坦的咒詛歸佇𪜶的頂面。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。