上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
6
論賑濟
「謹慎，莫得佇人的面前行恁的義，故意互𪜶看見，若按呢，就無得著報賞佇恁天裡的父。
2 所以，你賑濟的時，莫得佇你的面前歕號頭，親像假好的人佇會堂及街路所做的，愛人榮光𪜶。我實在給恁講，𪜶已經受著𪜶的報賞啦。
3 獨獨你賑濟的時，莫得互你的倒手知你的正手的所做，
4 互你的賑濟隱密。就你的父鑑察佇隱密的，欲報答你。」
論祈禱
5 ( 路 11:2-4 )
「恁祈禱的時，莫得親像假好的人，因為𪜶愛徛佇會堂及大街面的越角祈禱，欲互人看見。我實在給恁講，𪜶已經受著𪜶的報賞啦。
6 獨獨你祈禱的時，著入你的密房，關門，求你的父𫢶佇隱密的；就你的父鑑察佇隱密的，欲報答你。
7 閣恁祈禱的時，話莫得沓沓重，親像外邦人，因為𪜶拍算講多多話才得著聽見。
8 所以恁莫得學𪜶；因為恁未求伊的代先，恁的父已經知恁所欠用的。
9 所以，恁著按呢祈禱：
阮佇天裡的父；
願你的名聖。
10 你的國臨到；
你的旨意得成，
佇地裡親像佇天裡。
11 阮的日食，今仔日互阮。
12 赦免阮的辜負，
親像阮亦有赦免辜負阮的人。
13 莫得導阮入佇試；
著救阮脫離彼個歹的。
14 「因為恁若赦免人的過失，恁的天父亦欲赦免恁；
15 恁若無赦免人的過失，恁的父亦無欲赦免恁的過失。」
論禁食
16 「閣恁禁食的時，莫得親像假好的人，帶憂容；因為𪜶將𪜶的面變歹看，欲互人看見𪜶啲禁食。我實在給恁講，𪜶已經受著𪜶的報賞啦。
17 獨獨你禁食的時，著抹你的頭洗你的面，
18 無互人看見你啲禁食，是互你住佇隱密的父看見；就你的父鑑察佇隱密的，欲報答你。」
論天裡的財寶
19 ( 路 12:32-34 )
「莫得為著家己積聚財寶佇地裡；有蟲及銹拍歹，也有賊挖孔偷提的所在。
20 獨獨為著家己積聚財寶佇天裡；蟲及銹無拍歹，也無賊挖孔偷提的所在。
21 因為恁的財寶佇遐，恁的心也欲佇遐。」
論心內的光
22 ( 路 11:34-36 )
「身軀的燈就是目睭。你的目睭若金，通身軀就光；
23 你的目睭若花，通身軀就暗。你內面的光若暗，彼個暗偌大啊！」
24 ( 路 16:13 )
「無人會服事二個主人；因為伊會怨恨此個，疼彼個，抑是會對重此個，看輕彼個，恁𣍐會服事上帝，續服事錢財。」
莫得掛慮
25 ( 路 12:22-31 )
「所以我給恁講，莫得掛慮恁的生命欲食甚麼，欲飲甚麼；抑是恁的身軀欲穿甚麼，恁的生命豈無卡大佇米糧？也恁的身軀豈無卡大佇衣裳嗎？
26 試看天中的飛鳥，無種作，無收成，無積聚佇粟倉，恁的天父也啲飼𪜶。恁豈無比許個卡貴氣嗎？
27 恁甚麼人會用掛慮互生命卡長一刻久？
28 啥事為著衣裳掛慮啊？試想山裡的百合花怎樣大欉；𪜶無著磨，無紡績。
29 若是我給恁講，當所羅門極行伍的時，伊所穿的，值著此號花的一蕊！
30 今山裡的草今仔日佇啲，明仔日㧒佇火爐，上帝互伊穿到按呢，何況恁，小信的人啊！
31 所以，莫得掛慮講，阮欲食甚麼？欲飲甚麼？欲穿甚麼？
32 因為諸個攏是外邦人所求的。恁的天父也知，諸個攏是恁欠用的。
33 獨獨代先求伊的國及伊的義，就諸個物攏欲續互恁。
34 所以，莫得為著明仔日掛慮，因為彼個明仔日伊欲家己掛慮；一日的艱苦佇一日夠額。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。