上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
對待奴僕的條例
21:1 ( 申 15:12-18 )
「你佇百姓的面前所著立的法度是按呢：
21:2 你若買希伯來人做奴僕，伊欲服事你六年久；第七年伊通自由，白白出去。
21:3 伊若單身來就單身出去；伊若有某，伊的某就及伊出去。
21:4 伊的主人若給伊娶某，某給伊生子抑是查某子，某及子兒著歸主人，伊著單身出去。
21:5 設使奴僕明明講：『我疼我的主人及我的某、我的子兒，愛出去自由。』
21:6 伊的主人就著帶伊到官府遐，閣著導伊倚近門，抑是門竪，主人著用鑽仔鑽伊的耳仔，伊就永遠服事伊。
21:7 「人若賣查某子做女婢，伊無通親像奴僕按呢出去。
21:8 主人若定著收伊，後來看無中意，就著准伊贖身；主人已經騙伊，就無權通賣伊互外邦人。
21:9 主人若定著伊互家己的子，就著款待伊親像查某子。
21:10 若有閣娶一個，就伊的食、穿，及配合的事，猶原通減少。
21:11 若無對伊行此三項，伊就通白白出去，免用銀贖。」
刑罰暴行的條例
21:12 「拍死人者，的確著互伊死。
21:13 人若是埋伏啲刣人，就是上帝交佇伊的手，我就給你設一個所在，伊通走去遐。
21:14 人若自專攻擊伊的厝邊，用詭譎的計謀，就若佇我的壇，亦著掠去互伊死。
21:15 「拍老父抑是老母者，的確著互伊死。
21:16 「拐人去賣者，抑是猶佇伊的手，的確著互伊死。
21:17 「咒詛老父抑是老母者，的確著互伊死。
21:18 「人若冤家，此個用石頭抑是拳頭拇拍彼個，猶無致到死，不過倒佇眠床，
21:19 若會閣起來倚柺仔出去，彼個拍伊的通算無罪；獨獨著賠伊𣍐做工的錢，也著給伊醫到攏好。
21:20 「人若用槌仔拍伊的奴僕抑是伊的女婢，致到連鞭死，伊的確著受刑罰。
21:21 若過一二日才死，就通免受刑罰，因為是伊的銀買的。
21:22 「人若相拍，傷害有娠孕的婦仁人，致到磕落娠，後來無別項的害，彼人著罰銀，照婦仁人的丈夫所定的，佇官府的面前互伊。
21:23 若有別項的傷害，就著用命賠命，
21:24 目睭賠目睭，嘴齒賠嘴齒，手賠手，
21:25 腳賠腳，燒賠燒，傷賠傷，拍賠拍。
21:26 「人若拍歹伊的奴僕抑是伊的女婢一蕊目睭，就著因為伊的目睭放伊去自由。
21:27 若拍落伊的奴僕抑是伊的女婢一支嘴齒，就著因為伊的嘴齒放伊去自由。」
物主的責任
21:28 「牛若觸死一個查甫人抑是一個婦仁人，著用石頭擲死彼隻牛，總是通食伊的肉；牛的主人算無罪。
21:29 設使彼隻牛平素會觸人，有人報伊的主人知，伊竟然無將牛關啲，致到觸死查甫人抑是婦仁人，就著用石頭擲死彼隻牛，牛的主人也著死。
21:30 若是擬定用銀贖生命，就著照所擬定的來贖伊的生命。
21:31 牛無論觸著人的子抑是查某子，著照此個例辦伊。
21:32 牛若觸著奴僕抑是女婢，著用銀三十舍客勒互𪜶的主人，也著用石頭擲死牛。
21:33 「人若掀開井，抑是掘井無蓋蓋，有牛抑是驢跋佇彼內面，
21:34 井的主人著賠，也著提銀互伊的主，死的精牲歸家己。
21:35 「此人的牛若觸著彼人的牛，致到死，𪜶著賣活的牛，價錢平分，死的牛也著平分。
21:36 人若知此隻牛平素會觸人，主人竟然無將牛關啲，伊就著用牛賠牛，死的牛歸家己。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。