上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
52
耶路撒冷淪陷
( 王下 24:18-25:7 代下 36:11-21 )
西底家坐位的時二十一歲，佇耶路撒冷作王十一年。伊的老母叫做哈慕她，是立拿人耶利米的查某子。
2 伊做上主看做歹的事，照約雅敬的所做去做。
3 耶路撒冷及猶大發生諸個事，是因為上主發受氣，對伊的面前給𪜶趕出去。
西底家背叛巴比倫王。
4 西底家統治第九年，十月初十，巴比倫王尼布甲尼撒導伊的大軍來攻擊耶路撒冷，佇城的對面紮營，閣佇四圍作土堆攻城。
5 城受圍困，一直到西底家王第十一年。
6 四月初九，城內飢荒真嚴重，住民攏無物通食，
7 城受攻破；所有的兵士透暝對王宮花園附近，兩個城牆中間的門彼條路逃走。巴比倫軍隊猶佇四圍攻城的時，𪜶向亞拉巴的方向逃走。
8 巴比倫的軍兵追趇西底家王，佇耶利哥的平原趇著伊；伊的全軍攏棄拺伊四散。
9 巴比倫的軍兵掠著西底家，給伊掠去哈馬地區的利比拉的巴比倫王遐，佇遐受審判。
10 巴比倫王刣死西底家的子，互伊親目看著，閣佇利比拉刣猶大所有的貴族。
11 閣挖伊兩蕊目睭，用銅鍊給伊鍊啲，帶伊去巴比倫，給伊關佇監裡，直到伊死彼日。
聖殿受毀壞
12 ( 王下 25:8-17 )
巴比倫王尼布甲尼撒第十九年，五月初七，巴比倫王的人臣侍衛長尼布撒拉旦進入耶路撒冷，
13 用火燒上主的聖殿、王宮，及耶路撒冷所有的厝，以及所有貴族的厝。
14 隨侍衛長的巴比倫軍兵將耶路撒冷四圍的城牆攏拆毀。
15 彼時，侍衛長尼布撒拉旦將民間喪鄉人、留佇城內所賰的人民，及投降巴比倫王的人，以及所賰的師傅攏掠去。
16 毋拘侍衛長尼布撒拉旦有留一寡上喪鄉的，互𪜶佇葡萄園及田園種作。
17 巴比倫人將上主殿內的銅柱、盆座，及銅海攏拍破，將許個銅運去巴比倫。
18 𪜶嘛將鼎、托仔、燈心的剪刀、碗盤仔、囥香的𥐵仔，及聖殿所有銅的器具攏搬去；
19 杯、囥火炭的盆、盤、鼎、燈台、囥香的𥐵仔、甌仔，所有金器的金、銀器的銀，侍衛長攏提去。
20 閣將所羅門王為上主的殿所造兩支柱、一個銅海，及座下十二隻銅牛帶去；諸個器具的銅多甲𣍐秤得。
21-22 此兩支柱像款，每一支高八公尺，周圍五公尺三十公分，厚七十五公厘，中央空殼；柱的頂面有銅的柱斗；柱斗高一公尺三十公分；柱斗的周圍有銅做的網仔及石榴。
23 四面有石榴九十六粒；網仔的周圍石榴總共一百粒。
猶大人民受掠去巴比倫
24 ( 王下 25:18-21 )
侍衛長尼布撒拉旦掠大祭司西萊雅、副祭司西番雅，及三個聖殿門口的守衛；
25 閣對城內掠一個管兵的官員、王的七個親信，及徵募兵士的副指揮官，以及佇城內抵著的六十個國民。
26 侍衛長將諸個人帶去佇利比拉的巴比倫王遐。
27 巴比倫王佇哈馬地區的利比拉攏給𪜶刣死。
按呢，猶大的人民受掠離開𪜶本地。
28 下面是尼布甲尼撒所掠的人數：
佇伊統治第七年，掠猶大人三千空二十三人；
29 第十八年，對耶路撒冷掠八百三十二人；
30 第二十三年，侍衛長尼布撒拉旦掠猶大人七百四十五人；
總共有四千六百人。
約雅斤受解放
31 ( 王下 25:27-30 )
巴比倫王以未‧米羅達佇伊坐位彼年，就是猶大王約雅斤受掠了後第三十七年，十二月二十五日，特赦猶大王約雅斤，放伊出監，
32 閣用好話安慰伊，互伊比受掠佇巴比倫其他國家的王有較高的地位。
33 約雅斤褪去監內所穿的衫，一世人及巴比倫王做夥食。
34 約雅斤活啲的時，巴比倫王賞賜伊所需要的生活費用，直到伊死彼日。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。