上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
11
二個干證的人
有互我一支蘆竹，親像枴仔；講：「你起來！量上帝的殿及祭壇，以及佇遐敬拜的人。
2 殿外的院放下啲莫得量伊，因為已經互外邦人；𪜶欲𧿬踏聖城四十二月日。
3 我欲賞賜我二個干證者，𪜶欲穿麻布，傳道理共一千二百六十日。」
4 這就是彼個二欉橄欖樹，及二個燈台，就是徛佇全地的主的面前的。
5 若有人愛害𪜶，就有火對𪜶的嘴出來，滅𪜶的對敵。若有人愛欲害𪜶，的確親像按呢受害死。
6 此二人有權會關密天，佇𪜶傳道理的日互伊無落雨；亦有權治理諸個水互伊變做血，閣照𪜶所愛，不管時通用逐樣的災禍攻擊地。
7 到𪜶干證明白的時，對深淵上來的獸欲及𪜶交戰，閣欲卡贏，來刣𪜶。
8 𪜶的身屍倒佇大城的街路；此個城譬喻稱做所多瑪，及埃及，就是𪜶的主釘十字架的所在。
9 閣對諸個百姓、諸個宗族、諸個腔口、諸個邦國的中間有人三日半久看𪜶的身屍，閣准埋葬𪜶的身屍佇墓裡。
10 徛起地面上的人就為著𪜶歡喜快樂，用物相送，因為此二個先知曾困苦徛起地面上的人。
11 過彼三日半，有活的氣對上帝出的來入佇𪜶，𪜶就絔起來徛；看見𪜶的人大驚。
12 𪜶就聽見對天有大聲，給𪜶講：「上來遮。」𪜶就坐雲上天，𪜶的對敵亦看見𪜶。
13 當彼時，地有大振動，城倒十份的一份，因為地動來死的人有七千名；其餘的攏驚惶，來歸榮光互天裡的上帝。
14 第二個災禍已經過去，第三個災禍緊緊到。
第七支號頭
15 第七個天使歕號頭，就佇天裡有諸個大的聲啲講：
世間的國成做咱的主及伊的基督的國；
伊欲做王到代代無盡。
16 佇上帝的面前，坐佇𪜶座位的二十四個長老，面仆落來拜上帝，
17 講：
主上帝啊，是全能者──
現在佇啲、早佇啲者，阮感謝你！
因為你已經掌你的大權來做王。
18 外邦發出受氣，你的受氣亦臨到；
死的人受審判，
閣你的奴僕諸個先知及諸個聖者，
及敬畏你的名者，
無論大細，你用報賞互𪜶。
閣敗壞地的，你亦敗壞𪜶，彼個時到啦。
19 上帝的殿佇天裡的就開，佇伊的殿內伊的約櫃看現現。就有閃爁、及聲、及雷鳴、地動、以及大雹。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。