上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約翰福音
13
耶穌為門徒洗腳
𨃟過節前，耶穌知伊離開此世間歸佇父的時到。已經疼佇世間屬伊的人，到尾亦疼𪜶。
2 食下昏頓的時，魔鬼已經將賣耶穌的意思下佇加略人西門的子猶大的心。
3 耶穌知父已經將萬物交佇伊的手，閣知伊對上帝出，亦欲歸佇上帝，
4 就離開桌，褪衫，提巾家己縖，
5 倒水佇盤裡，洗學生的腳，將所縖的巾給𪜶拭。
6 洗到西門‧彼得，彼得給伊講：「主啊，你洗我的腳嗎？」
7 耶穌應伊講：「我所做的，你現今知，後來就會曉得。」
8 彼得講：「你永遠無通洗我的腳！」耶穌應伊講：「我無給你洗，你就及我無干涉。」
9 西門‧彼得給伊講：「主啊，若我的腳，連手及頭殼亦著。」
10 耶穌給伊講：「人洗浴了，只有著洗腳，就齊全清氣。恁諸個是清氣，若是無逐個按呢。」
11 因為耶穌知賣伊的人是是誰，所以講：「恁無逐個清氣。」
12 已經洗𪜶的腳，穿衫，閣坐，就給𪜶講：「我對恁所有行的，恁知嗎？
13 恁稱呼我先生啊，主啊，恁的話著，我實在是。
14 我做主，做先生，尚且給恁洗腳，恁亦著相共洗腳。
15 因為我已經用模樣互恁，互恁照我所對恁行的來行。
16 我實實給恁講，奴僕無卡大伊的主人，奉差的無卡大差伊的。
17 恁既然知諸個事，若去行伊就有福氣。
18 我是指恁眾人來講，我所揀的我知𪜶。獨獨欲互聖經應驗：『食我的餅的人攑起腳後㬹踢我。』
19 今代誌猶未成，我先給恁講，到代誌成，互恁信我就是伊。
20 我實實給恁講，接納我所差的，就是接納我；接納我，就是接納差我的。」
預言家己欲受出賣
21 ( 太 26:20-25 可 14:17-21 路 22:21-23 )
耶穌講按呢，心內大迫腹，就干證講：「我實實給恁講，恁中間一人欲賣我。」
22 學生相看，想出伊是講甚麼人。
23 有一個學生，就是耶穌所疼的，撐近耶穌的胸前。
24 西門‧彼得點頭給伊講：「請給阮講，伊所講的是甚麼人？」
25 伊就向身倚耶穌的胸坎，給伊講：「主啊，是是誰？」
26 耶穌就應講：「我搵一塊仔物互伊，彼個人就是。」隨時搵一塊仔，提互加略人西門的子猶大。
27 伊受物了後，撒但就入伊的心。耶穌就給伊講：「你所做的，緊緊去做！」
28 同桌的人無人知為著怎樣對伊講此個。
29 因為猶大管錢袋，有人拍算敢是耶穌給伊講：「你去買咱守節所欠用的」，抑是教伊去賑濟喪鄉人。
30 猶大接著彼個物，連鞭出去。彼時暝時。
新的誡命
31 已經出去，耶穌講：「今人子得著榮光，上帝亦佇伊得著榮光。
32 閣上帝欲佇本身榮光人子，亦欲連鞭榮光伊。
33 細子啊，我猶有霎仔久及恁佇啲；恁欲尋我，我所去的所在恁𣍐會到。我曾給猶太人講，今亦按呢給恁講。
34 我用新的誡命互恁，就是恁著相疼；親像我曾疼恁，恁亦著按呢相疼。
35 恁若相疼，眾人欲對按呢知恁是我的學生。」
預言彼得認主
36 西門‧彼得給伊講：「主啊，欲叨落去？」耶穌應伊講：「我所去的所在，你現時𣍐隨我，後來欲隨我。」
37 彼得給伊講：「主啊，我現時怎樣𣍐隨你啊？我欲為著你放拺生命！」
38 耶穌應講：「你欲為著我放拺你的生命嗎？我實實給你講，雞猶未啼，你欲三擺認我。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。