上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
路加福音
16
不義的管家
耶穌閣對學生講：「某個好額人有一個管家的，有人將伊破費主人的業對伊的主人告伊。
2 主人叫伊來，給伊講：『我所聽見你此個代誌是怎樣？今你管家的事著及我清楚，因為你𣍐會猶原做管家。』
3 管家的心內想講：『主人𢬳我管家的職，我欲怎樣啊？攑鋤頭？無氣力；做乞食？乜見誚。
4 今我知所著做啦，到𢬳管家的職，彼時人才欲接納我入𪜶的家。』
5 伊就叫欠伊主人的債的，一個一個來，給頭一個講：『你欠我的主人偌多？』
6 應講：『油一百桶。』就給伊講：『提你的數，緊緊坐，寫五十。』
7 閣給別個講：『你欠偌多？』伊講：『麥一百石。』給伊講：『提你的數，寫八十。』
8 主人就謳咾此個不義的管家為著伊所做有智識；因為此世間的人，為著世情來圖謀，比光明的人卡有智識。
9 我也給恁講，著用不義的錢財結交朋友，到錢財了去的時，𪜶才欲接納恁入永遠的帳房。
10 佇至小可的事盡忠的，佇大的也盡忠；佇至小可的事不義的，佇大的也不義。
11 佇不義的錢財恁若無盡忠，是誰欲用真的託仗恁？
12 閣佇屬別人的恁若無盡忠，是誰欲用屬恁的互恁啊？
13 一個奴僕𣍐會服事二個主人；因為伊會怨恨此個，疼彼個。抑是會對重此個看輕彼個。恁𣍐會服事上帝，續服事錢財。」
律法及上帝的國
14 ( 太 5:31-32 11:12-13 可 10:11-12 )
法利賽人是貪財的；聽見諸個攏總的話，就冷笑伊。
15 耶穌給𪜶講：「恁是佇人的面前家己稱做義的，若是上帝知恁的心；因為佇人的中間所推尊的，佇上帝的面前是可惡。
16 律法及先知到約翰，對彼時上帝國的福音傳報，人盡力來入。
17 天地的廢無比律法一畫的失落是卡快。
18 見若離伊的某來娶別人是行姦淫；娶別人所離的也是行姦淫。」
財主及拉撒路
19 「有一個富人穿紫色及幼苧布的衣裳，逐日奢華宴樂。
20 閣有一個乞食，名拉撒路，遍身生疼，
21 人下伊佇富人的大門口，愛將富人桌腳所磕落的來度飽，狗也來舐伊生疼的位。
22 喪鄉人死，互天使扶伊到亞伯拉罕的胸前。富人也死，續埋葬。
23 佇陰間痛苦的中間，攑目遠遠看見亞伯拉罕，閣拉撒路佇伊的胸前，
24 就叫講：『我的祖亞伯拉罕啊，可憐我！差拉撒路用指頭仔尾搵水來涼我的舌；因為我佇此火焰中，真悽慘。』
25 若是亞伯拉罕講：『子啊，著記得你在生享受你的福氣，拉撒路受著艱苦；今伊佇遮得著安慰，也你受悽慘。
26 若按呢，佇阮及恁的中間，有大深淵隔啲，致到欲對遮過去恁遐𣍐會；對遐過來阮遮也𣍐會。』
27 伊就講：『既然按呢，求祖你差拉撒路去阮父的厝；
28 因為我有五個兄弟，互伊對𪜶做干證，免得𪜶也到此個痛苦的所在。』
29 亞伯拉罕講：『𪜶有摩西及許個先知通聽𪜶。』
30 應講：『我的祖亞伯拉罕啊，𣍐啦，若有人對死人中去尋𪜶，𪜶就欲反悔。』
31 亞伯拉罕給伊講：『𪜶若聽摩西及先知，就有人對死人中復活，𪜶也受苦勸。』」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。