上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬可福音
6
拿撒勒人厭賤耶穌
( 太 13:53-58 路 4:16-30 )
耶穌對遐出去，到伊的本鄉；伊的學生隨伊。
2 到安息日，就佇會堂教示人。多多人聽見，就奇怪，講：「此個人對叨落會按呢啊？閣所賞賜互伊的智慧是甚麼啊？也有按呢的大權能對伊的嘴出，是怎樣？
3 此個豈是木工嗎？豈是馬利亞的子雅各、約西、猶大、西門的兄弟嗎？伊的姊妹豈是及咱佇遮嗎？」𪜶就厭賤伊。
4 耶穌就給𪜶講：「先知佇本鄉、宗族、家己的家以外，無尊貴。」
5 伊佇遐𣍐得行甚麼權能，不過用手按幾若個病人，來醫好𪜶。
6 閣奇怪𪜶信，就四界行許個鄉社教示人。
耶穌差遣十二門徒
7 ( 太 10:5-15 路 9:1-6 )
耶穌召十二個學生來，就差𪜶一對一對出去，賞賜𪜶有權，來制壓許個邪神；
8 閣吩咐𪜶：「莫得帶路費，獨獨一支柺仔，莫得乾糧，莫得褡褳，莫得囥錢佇腰帶；
9 著穿出路的鞋，也莫得穿二領衫」；
10 閣給𪜶講：「見若恁所入的厝，著住佇遐，直到離開彼個地方的時。
11 無論甚麼所在接納恁，聽恁的，到離開遐的時，著拂去腳跡底的土粉，來對𪜶做干證。」
12 𪜶就出去宣傳，講人著反悔，
13 𪜶也趕出多多鬼，用油抹多多破病的人，醫好𪜶。
行洗禮約翰的死
14 ( 太 14:1-12 路 9:7-9 )
希律王聽見，因為耶穌的名聲已經出，就講：「行洗禮的約翰對死人中復活，所以有諸個權能對伊顯出。」
15 若是有別人講：「是以利亞。」閣有人講：「是先知，親像先知中的一個。」
16 總是希律聽見就講：「我所刣頭的約翰，已經復活。」
17 因為希律家己曾差人掠約翰，縛伊佇監裡，是為著希律的兄弟腓力的某希羅底的緣故，因為希律有娶伊。
18 是約翰曾給希律講：「你娶兄弟的某是不該。」
19 希羅底就怨恨約翰，愛刣伊，也𣍐得著；
20 因為希律知約翰的做人義，閣聖，所以驚畏，來保護伊，聽伊的話，就大大躊躇，也歡喜聽伊。
21 當著好機會的日，就是希律佇生日，辦桌，請許個大官、千總，及加利利尊貴的人。
22 希羅底親生的查某子入去跳舞，互希律及同桌的人攏歡喜。王就給查某囝仔講：「見若你所愛的求我，我欲互你。」
23 閣及伊咒誓講：「見若你所求我的，雖然我國的一半，我也欲互你。」
24 查某囝仔出去給伊的老母講：「我欲求甚麼？」應講：「行洗禮約翰的頭殼。」
25 查某囝仔連鞭走入去見王，求講：「我愛你將行洗禮約翰的頭殼貯佇盤裡即時互我。」
26 王就大憂悶；總是為著伊所咒的誓，閣有同桌的人佇啲，所以愛推辭，
27 王即時差一個侍衛，吩咐取伊的頭殼來。
28 伊就去監裡，刣伊的頭，貯伊的頭殼佇盤裡，捧來互查某囝仔，查某囝仔就互伊的老母。
29 約翰的學生聽見，就來收伊的身屍，埋葬佇墓裡。
耶穌互五千人食飽
30 ( 太 14:13-21 路 9:10-17 約 6:1-14 )
使徒聚集就近耶穌，將𪜶所行、所教示的攏給伊講。
31 耶穌給𪜶講：「恁家己及我來去曠野的所在歇睏霎仔久。」因為往來的人多，連食也𣍐顧得。
32 𪜶就上船，去曠野的所在家己住。
33 眾人看見𪜶去，有多多人知，就對逐個城步行相及走，代先𪜶到。
34 耶穌出去，看見歸大陣的人，就憐憫伊，因為𪜶親像羊無牧者，才用多多項教示𪜶。
35 日欲落，伊的學生就近伊，講：
36 「遮就是曠野，日欲落啦，請四散眾人，互𪜶去周圍的鄉社，家己買物通食。」
37 伊應講：「恁互𪜶食。」𪜶給伊講：「總無阮用二百個銀仔去買餅來互𪜶食嗎？」
38 伊給𪜶講：「恁有餅偌多，去看覓。」已經知，就講：「五個餅，二尾魚。」
39 伊就吩咐𪜶，互眾人排歸列坐佇青翠的草埔。
40 𪜶就分隊來坐，有的一百，有的五十。
41 耶穌提彼五個餅，二尾魚，向天來祝謝，擘餅互學生，來排佇眾人的面前，也用二尾魚分互眾人。
42 𪜶攏食到飽。
43 拾許個餅碎及魚屑，滿十二筐。
44 食餅的人查甫的有五千。
耶穌佇海面行
45 ( 太 14:23-33 約 6:16-21 )
耶穌連鞭迫伊的學生上船，代先過去彼旁岸到伯賽大，聽候伊四散眾人。
46 已經及𪜶離別，就去山裡祈禱。
47 已經暗，船佇海中，只有耶穌家己佇岸裡；
48 看見學生划槳真艱苦，因為是對頭風。暝時約略四更，耶穌對海面行，就近𪜶，愛欲對𪜶遐過去。
49 𪜶看見伊行佇海面，掠做怪物，就喉叫；
50 因為𪜶攏看見伊，就生驚。耶穌連鞭及𪜶講話給𪜶講：「安恁的心！是我，免驚！」
51 就上船就近𪜶，風就定；𪜶心內不止卬愕。
52 因為𪜶𣍐曉悟彼個餅的神蹟，也𪜶的心鈍。
醫好革尼撒勒的病人
53 ( 太 14:34-36 )
過去了，就到革尼撒勒地，船拋佇岸裡，
54 已經離開船，人連鞭認得伊，
55 遍遍走彼個地方，聽見伊佇甚麼所在，就將舖仔扛病人到遐。
56 見若伊所入的鄉社、城市、鄉下，𪜶將病人下佇街市，求伊若使互𪜶摸伊的衫仔裾的鬚；見若摸的人攏得著好。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。