上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
27
耶穌受交互彼拉多
( 可 15:1 路 23:1-2 約 18:28-32 )
到天光，眾祭司頭及百姓的長老相及計謀攻擊耶穌愛互伊死，
2 已經縛伊，就帶去，交互總督彼拉多。
猶大的死
3 ( 徒 1:18-19 )
彼時，賣伊的猶大看見耶穌受定罪，就退悔，將許個三十銀還諸個祭司頭及長老，講：
4 「我賣無罪者的血有罪啦。」𪜶講：「及阮啥干涉？你家己打算。」
5 猶大㧒許個銀佇殿裡，退去家己吊死。
6 許個祭司頭提彼個銀，講：「這是血的價，通橐佇庫房。」
7 𪜶就參詳，將彼個銀去買燒磁人的園，通埋葬出外人。
8 所以彼區園到今稱做「血園」。
9 對按呢應驗早託先知耶利米所講的，講：「𪜶提受估者的價銀三十，就是以色列的子孫中有人所估的，
10 用伊來買燒磁者的園；照主所命令我的。」
耶穌佇彼拉多面前受審
11 ( 可 15:2-5 路 23:3-5 約 18:33-38 )
耶穌徛佇總督的面前；總督問伊講：「你是猶太人的王嗎？」耶穌給伊講：「你講就是。」
12 伊互許個祭司頭長老告，伊也無應。
13 彼時彼拉多給伊講：「許個人干證你到許多項，你無聽見嗎？」
14 耶穌無應伊一句話，致到總督大奇怪。
耶穌受判死刑
15 ( 可 15:6-15 路 23:13-15 約 18:39—19:16 )
到節期總督照例放一個犯人互眾人，是照𪜶所愛的。
16 彼時有出名的犯人名叫巴拉巴。
17 𪜶已經聚集，彼拉多給𪜶講：「恁愛我放是誰互恁？是巴拉巴？抑是稱做基督的耶穌？」
18 因為知𪜶為著怨妒才解送耶穌。
19 伊坐堂的時，伊的某差人給伊講：「此個義人，你通干涉著，因為我今仔日佇眠夢中為著伊多多艱苦。」
20 諸個祭司頭及長老教唆眾人，求放巴拉巴，滅耶穌。
21 總督應講：「此二人，恁愛我放叨落一個互恁？」𪜶講：「巴拉巴。」
22 彼拉多給𪜶講：「按呢，就稱做基督的耶穌我著怎樣辦伊？」𪜶攏講：「釘伊十字架！」
23 總督講：「怎樣？伊有行甚麼歹？」𪜶大聲喝講：「釘伊十字架！」
24 彼拉多看見無採工，反轉愈擾亂，就捧水佇眾人的面前洗手，講：「佇此個義人的血，我無罪，恁家己打算。」
25 百姓攏應伊講：「伊的血歸佇阮及阮的子孫。」
26 伊就放巴拉巴互𪜶，已經鞭拍耶穌，就發交去釘十字架。
兵丁戲弄耶穌
27 ( 可 15:16-20 約 19:2-3 )
彼時總督的兵帶耶穌入公堂，聚集通營圍伊。
28 褪伊的衫，將紅袍給伊穿，
29 用莿仔編冕旒，戴佇伊的頭殼，用蘆竹下佇伊的正手，跪佇伊的面前，戲弄伊，講：「猶太人的王，平安！」
30 就給伊呸涎，攑彼枝蘆竹來捽伊的頭殼。
31 戲弄息，彼領袍就給伊褪起來，將伊家己的衫給伊穿，帶伊去，釘十字架。
耶穌受釘十字架
32 ( 可 15:21-32 路 23:26-43 約 19:17-27 )
出來的時，抵著一個古利奈人，名西門，勉強伊相及去，互伊夯耶穌的十字架。
33 到一所在名各各他，就是「頭殼碗」的所在。就用苦膽所調和的酒互伊飲；
34 伊試看，就飲。
35 已經釘伊佇十字架，就做鬮分伊的衣服，
36 閣坐佇遐顧守伊。
37 就下斬條佇伊頭殼的頂面，寫講：「此個是猶太人的王耶穌。」
38 彼時，有二個賊及伊同釘佇十字架，一個佇正旁，一個佇倒旁。
39 經過的人譏刺伊，搖頭，講：
40 「你毀壞殿，三日閣起的，著救家己！你若是上帝的子，著對十字架落來！」
41 許個祭司頭及經學士以及長老也是按呢戲弄伊，講：
42 「伊曾救別人，𣍐會救家己。伊做以色列的王，今著對十字架落來，阮就欲信伊。
43 伊倚靠上帝，上帝若歡喜伊，今就著救伊；因為伊講：『我就是上帝的子。』」
44 及伊同釘彼二個賊也是按呢罵伊。
耶穌的死
45 ( 可 15:33-41 路 23:44-49 約 19:28-30 )
對日中晝到三點，遍地黑暗。
46 差不多三點，耶穌大聲喉叫講：「以利！以利！拉馬撒卜大尼？」就是講：「我的上帝！我的上帝！你啥事放離我？」
47 邊頭徛的有人，聽見就講：「伊啲叫以利亞！」
48 中間一人即時走去，提海絨浸醋，縖佇蘆竹仔尾，互伊吸。
49 其餘的講：「且慢，看以利亞來救伊抑無。」
50 耶穌閣大聲喉叫，就斷氣。
51 忽然，殿內的帳對頂到下裂做二旁，地動，石磐裂，
52 墓開，已經啲睏的聖徒，𪜶的身軀多多起來，對𪜶的墓出。
53 到耶穌復活了後，𪜶入聖城，出現佇多多人。
54 百總及相同顧守耶穌的看見地動及所經過的事，不止驚，講：「此個果然是上帝的子！」
55 有多多婦仁人佇遐，遠遠啲看；𪜶就是對加利利跟隨耶穌來服事伊的。
56 從中有抹大拉的馬利亞，雅各、約西的老母馬利亞，及西庇太的子的老母。
耶穌的安葬
57 ( 可 15:42-47 路 23:50-56 約 19:38-42 )
已經暗，有亞利馬太的好額人來，名做約瑟，伊也是耶穌的學生。
58 彼人去見彼拉多，求耶穌的身屍；彼拉多吩咐著互伊。
59 約瑟收彼個身屍，用清氣的幼布包伊，
60 下佇伊家己的新墓，就是伊佇石磐所拍的。就翱大塊石佇墓門，才去。
61 有抹大拉的馬利亞及別個馬利亞佇遐，坐佇墓的對面。
封石及設兵
62 隔日，就是備辦節後的一日，許個祭司頭及法利賽人聚集見彼拉多，講：
63 「大人啊，阮記得彼個迷惑人的，活啲的時曾講：『三日後我欲復活。』
64 所以，請你命令顧守彼個墓，到第三日，驚了伊的學生來，偷伊去，亦給百姓講：『伊對死人中復活。』按呢，就後來的差謬比代先卡利害！」
65 彼拉多給𪜶講：「恁領兵去，照恁所知影的去顧守。」
66 𪜶就去，封石及設兵，來顧守彼個墓。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。