上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
11
施洗者約翰差門徒去見耶穌
( 路 7:18-35 )
耶穌教示十二個門徒以後離開彼所在，去附近的城市教示人及傳福音。
2 約翰佇監裡聽著基督所做的事，就差伊的門徒去
3 問伊：「你就是啲欲來彼位，抑是阮著聽候別人？」
4 耶穌應講：「恁將所聽著，所看著的去給約翰講，
5 就是失明的人閣看見，腳跛的人行路，痲瘋病人清氣，耳孔𣍐聽見的人聽見，死人閣活，散赤人有好消息傳互𪜶。
6 對我無失去信心的人真有福氣！」
7 約翰的門徒離開了後，耶穌才對群眾講起約翰的事。伊講：「恁出去曠野是欲看什麼？欲看互風吹搖來搖去的蘆葦是無？
8 若毋是，恁出去欲看什麼？欲看穿高貴衣服的人是無？恁看，穿高貴衣服的人是佇王宮。
9 按呢，恁出去欲看什麼？欲看先知是無？是，毋拘我給恁講，伊比先知閣較偉大。
10 關係約翰，聖經有按呢記載：
看啊，我差我的使者做你的先鋒；
伊欲佇你的頭前給你開路。
11 「我實在給恁講，婦仁人所生的無一個比施洗者約翰較偉大；毋拘，佇天國上微細的猶比伊閣較偉大。
12 對施洗者約翰的日到現在，天國一直受強烈的攻擊，兇猛的人用暴力給伊搶去。
13 先知及律法所有的預言到約翰為止。
14 恁若願意接受諸個預言，就會明白約翰就是彼個啲欲來的以利亞。
15 有耳孔的，著聽！
16 「我欲用什麼比並此世代？𪜶親像一陣囝仔坐佇市場口對另外一陣喝：
17 阮對恁歕𥰔仔，恁無跳舞！
阮唱哀歌，恁嘛無悲傷！
18 約翰來，無食無飲，人就講：『伊互鬼附身！』
19 人子來，嘛食嘛飲，人就講：『伊是貪食好酒的人，是貿稅的及罪人的朋友！』不過，實在的智慧對行為得著證實。」
責備無悔改的城
20 ( 路 10:13-15 )
耶穌有佇一寡城市行真多神跡，毋拘許個城市的人攏無悔改，伊就給𪜶責備。
21 伊講：「哥拉汛，你慘啊！伯賽大，你慘啊！我佇恁中間行的神跡若佇泰爾及西頓行，𪜶早就穿麻衫糝火灰悔改啦。
22 我給恁講，佇審判的日，泰爾及西頓受的刑罰會比恁著受的較好忍受。
23 你咧，迦百農，
你愛人給你扶上天是無？
𣍐，上帝會給你㧒落陰府。
佇你遐行的神跡若佇所多瑪行，所多瑪一定猶留到今仔日。
24 總是我給恁講，佇審判的日，所多瑪地區受的刑罰比你著受的較好忍受。」
來我遮得安歇
25 ( 路 10:21-22 )
彼時，耶穌講：「父啊，天地的主，我感謝你，因為你有將諸個事對有智慧有學問的人蓋起來，毋拘對細漢囝仔啟示。
26 父啊，是啦，因為這是你的好旨意。
27 「我的父已經有將一切攏交託我。父以外無人識子；子及子愛欲啟示的人以外嘛無人識父。
28 「勞苦背重擔的人攏著來我遮，我欲互恁安歇。
29 著背我的軛，來對我學，因為我的心溫柔謙遜。按呢，恁的心神就會得著安歇。
30 我的軛合用，我的擔真輕。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。