上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
但以理書
11 「當瑪代王大利烏元年，我徛起來，互伊堅固勇壯。
2 今我將真實的事指示你：
南方王及北方王
「看啊，波斯欲閣有三個王興起，第四個欲真好額贏過𪜶許個。伊對伊的好額成做強猛的時，就欲激動眾人攻擊希臘國。
3 欲有一個勇猛的王起來，用大權來治理，照意思來行。
4 伊興起的時，伊的國欲分裂，向天的四面的方分開，總是無歸伊的後裔，也𣍐比得伊前所掌的權；因為伊的國欲抵著拔起來，歸佇諸個以外的別人。
5 「南方的王欲強猛，總是伊大臣的中間欲有一個比伊卡強猛，得著權，伊的權欲做真大的權。
6 過幾若年後，𪜶欲相聯合，南方的國的查某子欲就近北方的王愛立盟約；總是此個查某子幫助的力𣍐會久長，此個王及伊幫助的力𣍐會存在。閣此個查某子及帶伊來的，及生伊的，以及當時扶助伊的，攏欲受交付。
7 總是此個查某子的本家欲閣出一個續接王位，伊欲帶軍隊來進入北方的王的險要，攻擊來卡贏𪜶；
8 也將𪜶的上帝及所鑄的偶像，以及銀金的寶器搶掠到埃及。幾若年久，無插北方的王。
9 伊欲入南方的王的國，總是欲猶原倒去本所在。
10 「伊許個子欲去交戰，招集多多軍隊。伊欲進前，親像水氾濫對遐經過，就欲倒去，閣去交戰直到伊的險要。
11 南方的王欲大受氣，出來及北方的王交戰，伊欲排列大軍隊；大軍隊欲交付伊的手。
12 已經除去大軍隊，伊的心自高；伊雖然互幾若萬人倒落去，究竟無得著卡贏。
13 「北方的王欲倒來閣排列大軍隊，比前的閣卡多。過幾若年後，伊欲帶大軍隊，及多多軍裝來。
14 彼時，欲有多多人起來攻擊南方的王，閣你的百姓中強暴的人也欲起來，愛互異象得著應驗，總是𪜶欲敗無。
15 北方的王欲來也欲起土堆攻取堅固的城；南方的軍隊欲徛𣍐住，伊所揀的百姓也無力通徛住。
16 獨獨來攻擊伊的，欲出在意思來行，無人佇伊的面前徛會住。伊欲徛佇榮耀的地，伊的手行剿滅。
17 「伊決意用全國的力，來也有正直的人及伊來，伊欲照意思行，閣欲用婦仁人的查某子互伊，欲敗壞伊，總是伊𣍐成立，也無做伊的利益。
18 彼霎了後伊欲越轉面向許個海嶼多多取伊。總是欲有一個大臣，除去伊所施的凌辱，閣互彼個凌辱歸伊本身。
19 後來伊欲越轉面向家己境內的險要，總是伊欲著觸來跋倒，到尾無閣看見。
20 「彼時，欲有一人起來續接伊的位，互一個勒索者遍行國內榮耀的地。總是無幾日內伊欲受滅無，是對受氣，也是對交戰。」
北方的歹王
21 「欲有一個卑賤的人起來續接伊的位，人曾用國的榮光互伊，是趁人無持防的時，用諂媚來得著國。
22 大隊的兵力欲受毀滅佇伊的面前，親像互大水流去；同會盟的人君也欲按呢。
23 立約了後，伊欲行詭詐，因為伊欲上來用少少的百姓成做強猛。
24 趁人無持防的時，伊欲來到省內的肥地，也欲行伊的列祖及𪜶的列祖所未曾行的，欲用所搶的、所劫的，及貨財分散互人，閣欲設計謀攻擊諸個險要的所在，到伊的時期。
25 「伊欲出大力奮志，用大的軍隊攻擊南方的王；南方的王也欲用極大極強的軍兵及伊交戰，總是徛𣍐住，因為人設計謀欲害伊。
26 食伊的奉祿者，欲滅伊；伊的軍兵欲四散，閣受刣的真多。
27 此二個王，心存歹意，同桌的時講白賊，總是伊的計謀𣍐成；因為到定著的期，𪜶的結局會到。
28 伊欲帶多多貨財倒去本國，伊的心反對聖約，照伊的意思行，倒去本國。
29 「到定著的期，伊欲倒轉，來到南方。總是此路尾擺無親像前擺，
30 因為基提的船欲到攻擊伊，致到伊憂悶就倒去，痛恨聖約，照伊的意思來行，伊欲倒來及棄拺聖約的人相及計謀。
31 伊欲起兵，𪜶欲拍垃墋聖所，就是衛所，除去日日所獻的祭祀，竪彼個殘害可惡的物。
32 行歹背約的，伊欲用諂媚的話引誘𪜶；獨獨識𪜶的上帝的百姓欲勇敢行代誌。
33 百姓中智慧的人欲教示多多人，總是𪜶多多日欲對刀劍，火燒，互人掠，互人搶來失敗。
34 𪜶失敗的時，欲略略仔得著扶助，也有多多人欲用諂媚及𪜶聯絡。
35 智慧的人的中間有的欲失敗，來鍛煉𪜶，互𪜶清氣互𪜶白白，直到路尾的日；因為到定著的期，結局就到。
36 「彼個王欲出在意思來行，欲自高自大，𨃟過一切的上帝，閣用奇異的話攻擊諸個上帝的上帝。伊欲亨通，到大受氣明白，因為所定著的事的確成。
37 伊無欲要緊伊的列祖的上帝，以及婦女所欣慕的，無論甚麼上帝伊無要緊；因為伊欲自大，𨃟過一切。
38 伊欲佇伊的位敬拜衛所的上帝，閣伊的列祖所識的上帝，伊欲用金、銀、玉石寶物來敬伊。
39 伊欲倚靠別號的上帝，來設法堅固的衛所。凡若承認伊者，伊欲將榮光互𪜶，也欲互𪜶管轄多多人，閣欲分土地報賞𪜶。
40 「到路尾的時，南方的王欲觸犯伊。北方的王欲攻擊伊親像捲螺風，用車、用馬兵、用多多船隻，也欲進入許個國，親像氾濫的水經過。
41 閣欲進入榮耀的地，多多國互伊捙倒，獨獨以東、摩押，及亞捫子孫尊貴的人會脫離伊的手。
42 伊欲伸手攻擊列國；埃及地也無得著脫離。
43 伊欲掌管埃及金銀的財寶以及一切的寶物。呂比亞及古實人攏欲跟隨伊。
44 對東對北欲有消息到來擾亂伊，伊欲大受氣出去，一盡除滅多多人。
45 伊欲佇海及榮耀的聖山的中間搭伊宮殿的布棚；總是伊欲到伊的結局，也無幫助伊的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。