上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
但以理書
7
四隻獸的異象
當巴比倫王伯沙撒元年，但以理佇床裡有夢見，心內看見異象，伊就寫彼個夢，講起其中的大意。
2 但以理講：
我暝時看見異象，看啊，天裡四面的風忽然起，吹佇大海的頂面。
3 有四隻獸真大隻對海裡起來，款式各無相同：
4 頭一隻親像獅，有鷹鳥的翅；我看見到伊的翅受拔起來，閣佇地上得著扶起來，互伊二支腳徛起來，親像人一樣，也互伊有人的心。
5 看啊，閣一隻獸是第二隻，親像熊，挺起伊身體的一旁，伊的嘴內有三支脇骨含佇嘴齒中。𪜶給伊講：「起來，吞食多多肉。」
6 後來我閣看，看啊，閣有一隻獸款式親像豹，尻脊有四個翅親像鳥；此隻獸有四個頭殼，閣有權柄互伊。
7 後來我佇暝時的異象中啲看，看啊，有第四隻的獸，通驚通愞，也是不止強，有大支的鐵齒，伊吞咬拆碎，所剩的用腳踏伊。及以前許個獸各樣，閣發十支角。
8 我啲看許個角，看啊，彼中間有另外發一支細支角；從前許個角的中間有三支角，含根拔起來佇細支角的頭前。看啊，此支角有目睭，親像人的目睭，閣有嘴啲講大話。
永存者的異像
9 我閣看到
許個座位排列，
有一個對古早就有的坐啲。
伊的衣服白親像雪，
伊的頭毛親像真清氣的羊毛。
伊的寶座就是火焰，
伊的輪親像火啲𤏸。
10 有火親像溪發出，流佇伊的面前；
服事伊的有千千，
跟隨佇伊的面前的有萬萬；
審判的事攏便，
冊攏掀開。
11 彼時我因為彼支角所講大話的聲就看伊，看到彼隻獸受刣，伊的身體受毀壞，㧒佇火裡燒。
12 論到其餘諸個獸，伊的權攏失落，總是𪜶的生命猶留啲，到佇定著的時定著的日期。
13 我佇暝時的異象中啲看，
看啊，有一個親像人的款，
坐天頂的雲來到佇彼個對古早就有者，
𪜶就導伊到伊的面前。
14 就賞賜伊有權柄、榮光、國位，
互萬百姓、萬國、萬腔口的人攏服事伊。
伊的權柄是永遠的權柄，𣍐會無去；
伊的國位的確無廢無。
解釋異象
15 我──但以理，心神佇我的內面憂悶，心內的異象互我迫腹，
16 我就去尋許個徛佇邊仔的一個，問伊諸個事的實在。伊就對我講，也解明許個事互我知：
17 彼四隻大獸是四個王欲對地上興起。
18 總是，至高者聖的百姓，欲得著國位，長長掌理國權永遠無息。
19 彼時我愛知第四隻獸的實在，伊及𪜶許個獸各樣，不止通驚，伊的嘴齒是鐵的，伊的爪是銅的，伊吞咬拆碎，所剩的用腳踏伊；
20 閣愛知伊頭殼所發十支角的實在及彼支另外發的角，互三支角落落佇伊的頭前。就是有目睭，有嘴講大話的角，伊的款式卡強猛伊的同類。
21 我看見此支角及聖的百姓交戰，來卡贏𪜶。
22 直到彼個對古早就有者來給至高者聖的百姓判斷，到聖徒得著國位的日期到。
23 伊按呢講：
第四隻獸欲做地上的第四國，
伊及攏總的國無同，
閣欲吞咬全地，
欲𧿬踏伊、拆碎伊。
24 論到彼十支角，就是對彼個國內欲興起十個王，
後來另外有一個王興起，
及前許個無同；
伊欲互三個王降服伊。
25 伊欲講話忤逆至高者，
也欲苦楚至高者聖的百姓，
也想欲改換節期律法。
𪜶欲交代伊的手歷過一時、閣二時、閣半時。
26 審判司欲坐位；
𪜶欲搶奪王的權，
毀壞伊、滅無伊，到徹底。
27 普天下的國位、權柄、及列國的威權
攏交互至高者聖的百姓。
伊的國是永遠的國；
見若有權者攏欲服事，順趁伊。
28 此個代誌到遮結局。我──但以理，心內想了迫腹，面也變色，總是我用此個事囥佇心內。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。