上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
13
責備假先知
耶和華的話臨到我講：
2 「人子啊，你著宣傳來攻擊以色列中許個啲宣傳的先知，給許個照伊家己的心意來宣傳者講：『恁著聽耶和華的話。』」
3 主耶和華按呢講：「許個戇的先知，𪜶有災禍啊，𪜶趁家己的心神來行，並無看見一項。
4 以色列啊，你的先知親像拋荒的所在的狐狸，
5 恁未曾上到破隙的所在，亦未曾為著以色列家圍一個牆，通佇耶和華的日戰陣徛會住。
6 𪜶所看見的是虛假，是白賊的占卜。𪜶講這是耶和華講的，其實耶和華無影差𪜶，𪜶猶啲向望彼個話會應驗。
7 恁豈是看見虛假的異象嗎？豈是講白賊的占卜嗎？恁講，這是耶和華講的，其實我無差𪜶講。」
8 所以主耶和華按呢講：「因為恁所講的是虛假，所看的是白賊，看啊，因為按呢我及恁反對。這是主耶和華講的。
9 我的手欲攻擊許個看見虛假，用白賊占卜的先知，𪜶的確無屬佇我的百姓的會中，無記佇以色列家的人名簿，亦𣍐通進入以色列地；恁就知我是主耶和華。
10 因為𪜶誘惑我的百姓，講：『平安！』其實無有平安，就是親像人起牆壁，𪜶給伊筅灰水。
11 所以你著對許個筅灰水的人講：『牆欲倒壞，欲有漲水的大雨。大雹啊，恁著落來，閣欲有大風吹裂伊。』
12 看啊，牆倒了後，人豈無欲對恁講：『恁所筅的灰水今佇叨落？』」
13 所以主耶和華按呢講：「我欲佇我的大受氣，用狂風拆裂伊，佇我的受氣欲有漲水的大雨，也佇我的大受氣欲落大雹，來毀滅伊。
14 我欲按呢拆毀恁筅灰水的牆，拆到平地，致到牆基露現，牆欲倒壞，恁亦欲滅無佇彼中間；恁就知我是耶和華。
15 我欲按呢成我的大受氣佇彼個牆及筅灰水的人，亦欲對恁講：『牆無去啦，筅灰水的人亦無去啦。』
16 這就是以色列的先知，𪜶指耶路撒冷來宣傳，為著伊看見平安的異象，其實無有平安。這是主耶和華講的。」
責備假的女先知
17 「人子啊，你著面直直向你的百姓的婦女，就是照伊的心意來宣傳者，你著宣傳來攻擊伊，
18 講，主耶和華按呢講：『諸個婦女有災禍啊！𪜶給眾人的手曲縫靠墊，給逐等號身材的人做罩頭殼的帕，來搶人的神魂。總無恁欲搶我的百姓的神魂，為利益家己救活神魂嗎？
19 恁為著幾若把大麥，幾若塊餅，佇我的百姓中褻瀆我，對我許個愛聽白賊話的百姓來講白賊，害死許個應該死的神魂，亦互應該活的神魂活。』」
20 所以主耶和華按呢講：「看啊，我反對恁的靠墊，就是恁所用來搶神魂、互伊飛去的。我欲對恁的手拆起來，我欲解放許個神魂就是恁所搶的神魂，來互𪜶飛去的。
21 我亦欲拆裂恁許個帕，救我的百姓脫離恁的手，無閣受搶，佇恁的手內。恁就知我是耶和華。
22 因為彼號義人，我無互伊傷心，恁用白賊話互伊傷心，閣恁堅固歹人的手，互伊無越頭離開伊的歹路來得著活。
23 所以恁𣍐通閣看見虛假，亦𣍐通閣占卜；我欲救我的百姓脫離恁的手；恁就知我是耶和華。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。