上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬可福音
15
耶穌佇彼拉多面前受審
( 太27:1-2，11-14 路23:1-5 約18:28-38 )
天一下光，許個祭司長、長老、經學教師，以及全議會的人鬥陣參詳。𪜶給耶穌縛起來，押去交互彼拉多。
2 彼拉多問耶穌：「你是猶太人的王是無？」
耶穌應講：「這是你講的。」
3 祭司長告耶穌真多項代誌。
4 彼拉多閣問耶穌：「你看，𪜶給你告即多項，你哪攏無答辯？」
5 耶穌猶原無應半句，彼拉多煞感覺真奇怪。
耶穌受判死刑
6 ( 太27:15-26 路23:13-25 約18:39-19:16 )
逐年佇𨃟過節的時，彼拉多攏有照民眾的要求放一個犯人互𪜶。
7 有一個人名叫做巴拉巴，伊及一寡叛徒做夥關監；𪜶曾佇暴亂中刣死人。
8 群眾聚集倚來，要求彼拉多照慣例辦理。
9 彼拉多問𪜶講：「恁愛我放猶太人的王互恁無？」
10 因為伊知許個祭司長是為著怨妒才將耶穌交互伊。
11 許個祭司長煽動群眾，顛倒要求彼拉多放巴拉巴互𪜶。
12 彼拉多閣一遍問𪜶講：「按呢，恁稱做『猶太人的王』的，恁愛我按怎處理？」
13 𪜶閣大聲喝：「給釘十字架！」
14 彼拉多問𪜶講：「是按怎？伊有做什麼歹代誌？」𪜶閣較大聲喝：「給釘十字架！」
15 彼拉多為著欲互群眾歡喜，就放巴拉巴互𪜶，閣命令人用鞭拍耶穌，然後交伊去釘十字架。
兵士戲弄耶穌
16 ( 太27:27-31 約19:2-3 )
兵士帶耶穌去總督府的院內，後來召集全隊的兵。
17 𪜶給耶穌穿一領紫色的外袍，閣用刺仔編一頂王冠給伊戴。
18 𪜶給伊行禮，喝講：「猶太人的王萬歲！」
19 𪜶閣用一支蘆竹仔捽伊的頭殼，給伊呸嘴涎，跪落去拜伊。
20 𪜶戲弄伊了後，彼領紫色的外袍給褪起來，閣將伊家己的衫給穿倒轉去，然後押伊出去釘十字架。
耶穌受釘十字架
21 ( 太27:32-44 路23:26-43 約19:17-27 )
有一個古利奈人西門，是亞歷山大及魯孚的老父，伊對庄腳來，抵好對遐經過；兵士強迫伊夯耶穌的十字架。
22 𪜶給耶穌押到一個所在叫做各各他，翻譯是「頭殼碗嶺」。
23 𪜶用摻沒藥的酒互耶穌飲，拘伊無飲。
24 然後𪜶給伊釘十字架，閣分伊的衫，抽籤決定逐個人得著什麼。
25 𪜶釘耶穌佇十字架的時是早起時九點。
26 有一個牌仔寫伊的罪狀：「猶太人的王」。
27 有兩個強盜及伊做夥釘十字架，一個佇伊的正旁，一個佇倒旁。(115.27有的抄本有28節「『伊互人看做是罪犯』此句聖經的話已經應驗。」)
29 對遐經過的人給伊侮辱，搖頭，講：「唉啊，你此個人，講欲拆毀聖殿三日內閣起起來，
30 著救你家己，對十字架落來！」
31 祭司長及經學教師嘛按呢給伊恥笑，講來講去：「伊救別人，無法度救家己！
32 伊是基督，以色列的王，現在著對十字架落來，互咱通看，通信。」
及耶穌做夥釘十字架許個強盜嘛給伊侮辱。
耶穌的死
33 ( 太27:45-56 路23:44-49 約19:28-30 )
中晝的時，全地攏烏暗，續到下晡三點。
34 三點的時，耶穌大聲喝：「以羅伊，以羅伊，拉馬撒北大尼？」意思是「我的上帝，我的上帝，你是按怎放拺我？」
35 有一寡徛佇piⁿ-a的人聽著，講：「恁看，伊啲叫以利亞！」
36 有一個人走去提海綿，浸酸酒，縛佇蘆竹仔尾，㧣去互耶穌𠲿，講：「等一下！看以利亞會來給伊救𣍐。」
37 耶穌大聲喝一聲，就斷氣。
38 彼時聖殿內的帳簾對頂到下裂做兩旁。
39 徛佇耶穌對面的軍官看著伊斷氣的情形，講：「此個人確實是上帝的子！」
40 嘛有一寡婦仁人對遠遠啲看，其中有抹大拉的馬利亞、小雅各及約西的老母馬利亞，以及撒羅米。
41 𪜶是耶穌佇加利利的時就隨伊閣服事伊的婦仁人。另外閣有真多及耶穌做夥來耶路撒冷的婦仁人嘛佇遐。
耶穌的安葬
42 ( 太27:57-61 路23:50-56 約19:38-42 )
已經黃昏，因為彼日是𨃟過節的備辦日，是安息日的前一日，
43 亞利馬太的約瑟來，好膽去見彼拉多，請求將耶穌的遺體互伊。約瑟是一個受人尊敬的議員，本身嘛有啲期待上帝國的來臨。
44 彼拉多聽著耶穌已經死，感覺奇怪，就叫軍官來，問看耶穌是是已經死去。
45 伊對軍官聽著耶穌確實死的消息，就將遺體交互約瑟。
46 約瑟買一塊幼麻布，然後將耶穌的遺體對十字架徙落來，用彼塊幼麻布給伊包，安葬佇已經拍好佇石壁內的墓，閣翱一塊石來塞佇墓口。
47 抹大拉的馬利亞及約西的老母馬利亞有看著安葬耶穌的所在。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。