上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬可福音
7
祖先的傳統
( 太15:1-9 )
法利賽派的人及一寡對耶路撒冷來的經學教師鬥陣來尋耶穌。
2 𪜶看著耶穌的門徒有人用無清氣的手，就是無洗手就食飯。
3 原來法利賽派的人及所有的猶太人攏執守祖先的傳統，若無照法度洗手就無食飯；
4 對市場倒來，若無洗嘛無食。𪜶閣遵守其他真多傳統的規例，親像洗杯仔、罐仔、銅器，及床舖等。(17.4有的抄本無「床舖」。*)
5 所以，法利賽派的人及經學教師問耶穌：「是按怎你的門徒用無清氣的手食飯，違犯祖先的傳統？」
6 耶穌應講：「以賽亞所講關係恁諸個假好的人的預言真著；伊按呢寫：
此個子民用嘴唇尊敬我，
𪜶的心卻離開我遠遠。
7 𪜶用人的規例做我的教示教示人；
𪜶敬拜我攏無採工。
8 恁竟然放拺上帝的誡命，去執守人的傳統。」
9 耶穌閣講：「恁為著欲執守傳統，用巧妙的方法來拒絕上帝的誡命。
10 摩西命令恁『著孝敬父母』，閣講『罵老父抑是罵老母的人應該處死』。
11 拘恁講，人若對家己的老父抑是老母講『我應該互你的已經做各耳板』—各耳板的意思就是獻互上帝的禮物，
12 恁就准伊免奉養家己的父母。
13 恁用恁所傳授的傳統來廢除上帝的話。恁閣做真多此款的代誌。」
什麼才會互人無清氣
14 ( 太15:10-20 )
耶穌閣叫眾人來，給𪜶講：「恁大家攏著聽我的話，著了解：
15 對外面入去人內面的無一項會互人無清氣；對內面出來的物才會互人無清氣。」(27.15有的抄本有16節「有耳孔通聽的，著聽！」*)
17 耶穌離開眾人，入去厝內，伊的門徒就問伊此個譬喻的意思。
18 伊給𪜶講：「按呢連恁都無明白噢？恁豈無了解，對外面入去人內面的攏𣍐互人無清氣？
19 因為對外面入去的是入去心內，是入去腹肚內，後來放落去便所。」耶穌按呢講是指所有的食物攏清氣。
20 伊閣講：「對人內面出來的才會互人無清氣。
21 因為對內面出來的，就是對人的心出的，有歹念頭、私通、偷提、凶殺、
22 姦淫、貪心、邪惡、奸詐、放縱、嫉妒、誹謗、驕傲、𣍐曉分別是非。
23 諸個一切邪惡的事攏是對內面出來的，這才會互人無清氣。」
外邦婦仁人的信心
24 ( 太15:21-28 )
耶穌對遐出發去泰爾地區。伊入去一間厝，無愛人知，不過無法度保密。
25 隨時有一個婦仁人聽著耶穌的代誌，就來跪佇伊的腳前；伊的查某子互邪神附身。
26 此個婦仁人是出世佇敘利亞腓尼基的希臘人。伊求耶穌給伊的查某子趕鬼。
27 耶穌給伊講：「著先互囝仔食；提囝仔的食物㧒互狗仔食好。」
28 婦仁人應講：「主啊，桌仔腳的狗仔都食囝仔的餅幼仔。」
29 耶穌給伊講：「因為你此句話，你通轉去；鬼已經離開你的查某子啦！」
30 婦仁人轉去𪜶兜，看著查某子倒佇床裡，鬼已經離開。
耶穌醫治一個聾啞的人
31 耶穌閣離開泰爾地區，經過西頓以及低加坡里地區，來到加利利湖。
32 有人導一個𣍐聽見閣𣍐講話的人來耶穌遐，懇求耶穌給伊按手。
33 耶穌導彼個人離開眾人去piⁿ-a，穿指頭仔入去伊雙旁的耳孔，閣呸涎抹伊的舌，
34 然後向天，吐氣，給伊講：「以法大」，意思就是「開！」
35 彼人的耳孔隨時開，舌根冗，講話講甲真清楚。
36 耶穌嚴嚴命令𪜶通給人講，拘伊愈禁止，𪜶愈出力報揚。
37 大家攏非常著驚，講：「伊逐項攏做甲真好，連𣍐聽見的人都會聽見，𣍐講話的人都會講話！」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。