上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬可福音
3
耶穌醫好手瘸去的人
( 太12:9-14 路6:6-11 )
耶穌閣入去會堂，佇遐有一個一支手瘸去的人。
2 有一寡人啲當等看耶穌佇安息日會給此個人醫治抑𣍐，通給伊告。
3 耶穌對彼個手瘸去的人講：「起來，來中央遮。」
4 然後伊問眾人：「佇安息日，做好事抑是做歹事，救性命抑是害性命，叨一項合律法？」
𪜶攏恬恬。
5 耶穌受氣，一個一個給𪜶看，為著𪜶的硬心憂傷，就對彼個人講：「手伸出來！」伊手伸出來，就復原。
6 許個法利賽派的人就離開會堂，隨時及希律黨的人鬥陣計謀對付耶穌，看欲按怎給伊害死。
湖邊的群眾
7 耶穌及門徒退去加利利湖邊，有一大陣加利利人隨伊去；
8 閣有一大陣人聽著耶穌所做的代誌，對猶太、耶路撒冷、以土買、約旦河東岸，以及泰爾及西頓周圍來尋伊。
9 因為人真多，耶穌吩咐門徒給伊準備一隻船，才免互人給伊擠扁去。
10 因為耶穌曾醫好真多病人，所以所有的病人攏擠倚來欲給伊摸。
11 許個邪神一下看著耶穌就仆佇伊的面前，大聲喝：「你是上帝的子！」
12 耶穌嚴嚴命令𪜶通對人傳揚伊的代誌。
耶穌設立十二使徒
13 ( 太10:1-4 路6:12-16 )
耶穌上山，召集伊所意愛的人，𪜶就來。
14 伊設立十二人，稱𪜶做使徒，是欲互𪜶及伊做夥，閣差𪜶去傳道，
15 嘛互𪜶有權柄趕鬼。
16 伊所任命的十二人就是：西門—耶穌給伊叫做彼得、
17 西庇太的子雅各及伊的小弟約翰—耶穌給𪜶叫做半尼其，意思是「雷公仔子」，
18 閣有安得烈、腓力、巴多羅買、馬太、多馬、亞勒腓的子雅各、達太、激進黨員西門，
19 及出賣耶穌彼個以斯加略(13.19「以斯加略」有人譯做「加略人」。*)的猶大。
耶穌及別西卜
20 ( 太12:22-32 路11:14-23 12:10 )
耶穌轉去厝裡。有一陣人閣聚集倚來，耶穌及門徒煞連飯都𣍐顧得食。
21 伊的親人聽著此個代誌就出來欲給伊阻止，因為𪜶講「伊精神失常！」
22 對耶路撒冷落來的經學教師講：「伊是互別西卜附身，靠鬼王啲趕鬼。」
23 耶穌叫𪜶來，用譬喻對𪜶講：「撒旦哪會趕撒旦？
24 國家若家己紛爭，彼個國家就徛𣍐牢。
25 家庭若家己紛爭，彼個家庭嘛徛𣍐牢。
26 撒旦若家己攻擊，紛爭，伊徛𣍐牢，一定會滅亡。
27 「無人會當入去勇士的厝搶伊的財物；著先給伊縛起來，才會當劫伊的厝。
28 「我實在給恁講，人無論犯什麼罪，講什麼謗瀆的話，攏會得著赦免。
29 拘無論什麼人褻瀆聖神，永遠𣍐得著赦免，伊是犯著永遠的罪。」
30 耶穌講諸個話是因為𪜶講「伊互邪神附身」。
耶穌的老母及兄弟姊妹
31 ( 太12:46-50 路8:19-21 )
耶穌的老母及伊的兄弟來，徛佇外面，差人去叫伊。
32 有一陣人坐佇耶穌周圍；有人給伊講：「你看，你的老母及你的小弟小妹佇外面欲尋你！」
33 耶穌應講：「什麼人是我的老母、我的兄弟？」
34 然後伊對坐佇周圍的人一個一個給𪜶看，講：「恁看，我的老母，我的兄弟！
35 實行上帝旨意的人就是我的兄弟、姊妹，及老母。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。