| 章節 | 台語漢字本聖經 請按此下載安裝Open Han 2024版字型，免得漏掉造字 | 現代台語漢字2021版經文 |
| 17:1 | 瑪拿西半支派 這是瑪拿西的支派拈鬮所得著的業，因為伊是約瑟的大子。論到瑪吉，是瑪拿西的大子基列的老父，因為伊是勇士就得著基列及巴珊。 | 西旁的瑪拿西支族 下面是約瑟的大子瑪拿西的後代抽籤得著的家業：瑪吉是瑪拿西的大子，基列的開拓者；瑪吉是勇士，得著基列及巴珊。 |
| 17:2 | 瑪拿西其餘的子孫，照𪜶的宗族，拈鬮分地，就是亞比以謝的子孫，希勒的子孫，亞斯列的子孫，示劍的子孫，希弗的子孫，示米大的子孫；諸個照𪜶的宗族，攏是約瑟的子瑪拿西的查甫丁。 | 約瑟的子瑪拿西其他的後生，就是亞比以謝、希勒、亞斯烈、示劍、希弗、示米大，𪜶的子孫照宗族嘛抽籤得著土地。 |
| 17:3 | 瑪拿西的元孫，瑪吉的曾孫，基列的孫，希弗的子西羅非哈無子，只有查某子。伊的查某子名叫瑪拉、挪阿、曷拉、密迦、得撒； | 瑪拿西的元孫，瑪吉的曾孫，基列的孫，希弗的子西羅非哈無子，只有查某子，就是瑪拉、挪阿、曷拉、蜜迦，及得撒。 |
| 17:4 | 𪜶來到祭司以利亞撒及嫩的子約書亞及眾首領的面前，講：「耶和華曾命令摩西佇阮兄弟中分業互阮。」伊就照耶和華所命令的，佇𪜶老父的兄弟中，分業互𪜶。 | 𪜶來到祭司以利亞撒及嫩的子約書亞，以及眾領袖的面前，講：「上主有命令摩西，著互阮及阮的親族像款分著家業。」約書亞就照上主的命令，互𪜶及𪜶的阿伯阿叔仝款分著家業。 |
| 17:5 | 佇約但彼旁基列及巴珊地以外，瑪拿西閣拈鬮得著十份的地， | 佇約旦河東旁的基列及巴珊地區以外，瑪拿西閣抽籤得著十份的家業， |
| 17:6 | 因為瑪拿西許個查某孫佇瑪拿西的子孫中得著業。基列地是屬瑪拿西其餘的子孫。 | 因為瑪拿西許個查某孫，佇伊的子孫中得著家業。基列地分互瑪拿西其他的後代。 |
| 17:7 | 瑪拿西的地界：對亞設起，到示劍的頭前的密米他，彼個界向正手旁到隱‧他普亞徛起的百姓遐。 | 瑪拿西的地界，對亞設起，到示劍東旁的密米他，向南到隱‧他普亞的住民遐。 |
| 17:8 | 他普亞的地歸瑪拿西，獨獨瑪拿西的交界的他普亞歸以法蓮的子孫。 | 他普亞地區歸瑪拿西；毋拘瑪拿西邊界的他普亞城屬以法蓮的後代。 |
| 17:9 | 伊的界落去到加拿河佇河的南旁。佇瑪拿西許個城的中間，諸個城是屬以法蓮。瑪拿西的地界是佇河的北勢。𥦁到海為止； | 此個地界對遐落去到加拿溪；溪南旁的城鎮雖然佇瑪拿西境內，毋拘屬以法蓮；瑪拿西的地界順加拿溪的北旁，迵到地中海為止。 |
| 17:10 | 南屬以法蓮，北屬瑪拿西，用海做伊的界；北旁到亞設，東旁到以薩迦。 | 以法蓮佇南旁，瑪拿西佇北旁；地中海是𪜶西旁的地界；亞設佇西北旁，以薩迦佇東北旁。 |
| 17:11 | 瑪拿西佇以薩迦及亞設的境內，有伯‧善及伊的鄉社，以伯蓮及伊的鄉社，多珥徛起的百姓及伊的鄉社，閣有三所在山地，就是隱‧多珥及伊的鄉社；他納徛起的百姓及伊的鄉社；米吉多徛起的百姓及伊的鄉社。 | 瑪拿西佇以薩迦及亞設的境內有伯‧善、以伯蓮，及多珥，以及𪜶附近的庄社；閣有隱‧多珥、他納、米吉多此三區，以及𪜶的住民及附近的庄社。 |
| 17:12 | 總是瑪拿西的子孫𣍐會趕出許個城的百姓，迦南人決意欲𫢶佇彼個地。 | 毋拘瑪拿西人無法度將許個城的住民趕出去；迦南人堅持欲住佇遐。 |
| 17:13 | 到以色列人強盛的時，就互迦南人做苦工，無一盡趕𪜶出。 | 以色列人強盛的時，就互迦南人做苦工，無攏將𪜶趕出去。 |
| 17:14 | 約瑟子孫要求得卡多土地 約瑟的子孫對約書亞講：「耶和華平時賜福阮，阮就成做大族，你啥事干單用一鬮的份額互阮做業啊？」 | 約瑟的後代要求較多土地 約瑟的子孫對約書亞講：「上主有賜福阮，互阮成做大族，你哪干焦互阮抽一支籤，分一份做家業？」 |
| 17:15 | 約書亞對𪜶講：「恁若果然成做大族，以法蓮地對佇恁是卡狹細，就你通上去樹林，佇比利洗人、利乏音人的地，佇遐為家己來開墾。」 | 約書亞應𪜶講：「恁若人多，嫌以法蓮山區傷狹，恁通去比利洗人及利乏音人地區的樹林開墾。」 |
| 17:16 | 約瑟的子孫講：「彼個地無夠額容允阮，閣𫢶佇平洋的迦南人，就是𫢶佇伯‧善及伊的鄉社，及𫢶耶斯列平洋的人，攏有鐵車。」 | 約瑟的後代講：「彼個山區無夠阮住；閣住佇伯‧善及附近的庄社，以及耶斯列山谷的迦南人攏有鐵的戰車。」 |
| 17:17 | 約書亞對約瑟的家，就是以法蓮及瑪拿西的人，講：「你是大族，閣強盛，若一鬮的份額， | 約書亞對約瑟家，就是以法蓮人及瑪拿西人，講：「恁人多閣強盛，應該毋若一支籤的份互恁。 |
| 17:18 | 山地也欲歸你，雖然是樹林，你也通剉伊；伊的極頭也欲屬你。迦南人雖然有鐵車，閣強盛，你也會趕𪜶出去。」 | 歸個山區攏是恁的；彼個地區雖然有樹林，恁通開墾，到邊界就攏屬恁。迦南人雖然有鐵的戰車，閣強盛，恁嘛會當給𪜶趕出去。」 |