| 章節 | 台語漢字本聖經 請按此下載安裝Open Han 2024版字型，免得漏掉造字 |
| 17:1 | 帖撒羅尼迦的擾動 𪜶經過暗妃坡里、亞波羅尼亞，到帖撒羅尼迦，佇遐有猶太人的會堂。 |
| 17:2 | 保羅照平常的款入去就近𪜶，佇三個安息日， |
| 17:3 | 引起聖經及𪜶辯論，開拆指明基督應該受害，對死人中復活；閣講：「我所對恁傳的耶穌就是基督。」 |
| 17:4 | 𪜶中間有的受苦勸，就歸倚保羅、西拉，閣有敬虔的希利尼人不止多，尊貴的婦仁人亦無少。 |
| 17:5 | 獨獨猶太人怨妒，招街市的匪類幾若人，教唆百姓歸群聚集，擾動通城攻入耶孫的厝，愛掠𪜶出來交互百姓。 |
| 17:6 | 無抵著，就拖耶孫及幾若個兄弟送互地方官，叫講：「諸個拍亂天下的人亦到遮， |
| 17:7 | 耶孫接納𪜶。諸個人攏違逆該撒的命令，講有別個王耶穌。」 |
| 17:8 | 眾百姓及地方官聽見這，就驚惶； |
| 17:9 | 已經收耶孫及其餘的人的保狀，就放𪜶。 |
| 17:10 | 使徒佇庇哩亞傳道 對按呢兄弟隨時差保羅、西拉透暝去庇哩亞。二人已經到地，就入猶太人的會堂。 |
| 17:11 | 許個人比帖撒羅尼迦人卡文明，因為𪜶注意受道理，逐日查考聖經，看諸個事果然有按呢抑無。 |
| 17:12 | 所以其中有多多人信，閣有希利尼尊貴的婦仁人，及查甫人無少。 |
| 17:13 | 獨獨帖撒羅尼迦的猶太人知保羅佇庇哩亞傳上帝的道理，就到遐，搖動攪擾眾人。 |
| 17:14 | 兄弟連鞭差保羅去到海邊，獨獨西拉、提摩太猶原住遐。 |
| 17:15 | 送保羅的人導伊到雅典，受命令，叫西拉、提摩太緊緊就近伊，就倒去。 |
| 17:16 | 保羅佇雅典 保羅佇雅典聽候𪜶，看見滿城攏是偶像，就傷心著急； |
| 17:17 | 所以佇會堂及猶太人以及敬虔的人辯論，逐日佇街市裡及所抵著的亦是按呢。 |
| 17:18 | 有以彼古羅、斯多亞二教門的哲士，及伊辯論。有的講：「此個拾人的話粕的欲講甚麼？」有的講：「伊是親像傳別邦國的鬼神的。」是因為伊傳耶穌及復活的道理。 |
| 17:19 | 𪜶就導伊到亞略山，講：「你所講新的教，通得著知嗎？ |
| 17:20 | 因為你用奇怪的事傳入阮的耳孔，所以阮愛知許個是甚麼意思。」 |
| 17:21 | （雅典人及𫢶遐的出外人𣍐顧得別項事，獨獨是將新的事來講來聽若定）。 |
| 17:22 | 保羅徛佇亞略山中，講：「雅典人啊，我看恁凡事敬畏神明嶄然熱心。 |
| 17:23 | 因為我啲行遊的時，看見恁所敬拜的，抵著一座壇，頂面寫講『未識的上帝』。恁所未識來敬拜的，我用伊來給恁講。 |
| 17:24 | 彼個創造世間及其中萬物的上帝，既然是天地的主，無徛起手造的殿， |
| 17:25 | 無互人的手服事，那親像伊有所欠缺；是家己用活命、喘氣，及萬物互眾人。 |
| 17:26 | 閣創造萬邦的人對一個本源，徛起佇全地面，閣給𪜶限代先定著的時期及所徛起的地界， |
| 17:27 | 是欲互𪜶尋上帝，豈採通揣摩來得著，其實伊離開咱逐人無遠； |
| 17:28 | 因為咱𫢶佇伊來活、來振動，來佇啲。親像恁中間做詩的人，有的有講：『因為咱諸個亦是伊的子類。』 |
| 17:29 | 今既然是上帝的子類，就應該掠做上帝的本質，親像金、銀、石，人的工夫人的心事所雕琢的。 |
| 17:30 | 許個知影的時代，上帝無窮勘，今就命令逐所在的人攏總著反悔。 |
| 17:31 | 因為有定著一日，欲用伊所設立的人照公義審判天下，是對死人中互伊復活，互眾人有憑據通信。」 |
| 17:32 | 𪜶聽見死人復活的話，有的笑伊；有的講：「阮欲閣聽你講這！」 |
| 17:33 | 對按呢保羅對𪜶中間出去。 |
| 17:34 | 若是有幾若人倚伊，來信，中間有亞略山的會員丟尼修，及一個婦仁人，名叫大馬哩，閣也有別人。 |