| 章節 | 現代台語漢字2013版經文 |
| 8:1 | 耶穌互四千人食飽 ( 太15:32-39 ) 過無幾日，閣有一大陣群眾聚集。𪜶無物通食，耶穌就叫伊的門徒來，給𪜶講： |
| 8:2 | 「我真可憐此陣人，因為𪜶已經及我做夥三日久，現在無物通食啦。 |
| 8:3 | 我若互𪜶四散枵枵轉去𪜶兜，𪜶會佇路中暈倒，因為有人對真遠的所在來。」 |
| 8:4 | 門徒給伊講：「佇此個偏僻無人住的所在，欲去叨位尋食物互諸個人食飽？」 |
| 8:5 | 耶穌問𪜶：「恁有偌多餅？」 𪜶講：「七個。」 |
| 8:6 | 耶穌命令群眾坐落去土腳，然後提彼七個餅，感謝，擘開，提互門徒去分，𪜶就分互群眾。 |
| 8:7 | 𪜶嘛有幾若尾細尾魚，耶穌感謝了，叫門徒提去分。 |
| 8:8 | 𪜶攏食，食到飽，閣拾食賰的碎屑仔，攏總拾七籠。 |
| 8:9 | 人數約有四千。耶穌給𪜶解散， |
| 8:10 | 然後隨時及門徒上船，去大瑪努他的境內。 |
| 8:11 | 法利賽派的人要求神跡 ( 太16:1-4 ) 一寡法利賽派的人來尋耶穌，及伊辯論。𪜶想欲給伊試探，要求伊行對天來的神跡。 |
| 8:12 | 耶穌對心底吐一個大氣，講：「是按怎此世代的人求神跡？我實在給恁講，𣍐閣有神跡互此世代的人。」 |
| 8:13 | 伊就離開𪜶，閣上船過去湖的彼旁岸。 |
| 8:14 | 法利賽派及希律的酵 ( 太16:5-12 ) 門徒𣍐記得帶餅，不過𪜶佇船內有一個餅。 |
| 8:15 | 耶穌給𪜶警告：「著注意，著持防法利賽派的酵及希律的酵！」 |
| 8:16 | 門徒互相議論：「是因為咱無餅是無？」 |
| 8:17 | 耶穌知影就給𪜶講：「恁是按怎啲議論無帶餅的代誌？恁豈猶無了解，猶無明白？恁的心豈赫呢鈍？ |
| 8:18 | 恁有目睭，豈無看見？恁有耳孔，豈無聽見？恁豈𣍐記得， |
| 8:19 | 我擘五個餅互五千人食的時，食賰的碎屑仔，恁有拾滿幾籃？」𪜶講：「十二籃。」 |
| 8:20 | 耶穌閣問：「我擘七個餅互四千人食的時，食賰的碎屑仔，恁有拾幾籠？」 𪜶講：「七籠。」 |
| 8:21 | 耶穌就給𪜶講：「按呢，恁豈猶無明白？」 |
| 8:22 | 醫好伯賽大的盲人 耶穌及門徒來到伯賽大。有人導一個盲人來耶穌遐，懇求耶穌給伊摸。 |
| 8:23 | 耶穌牽彼個盲人的手，導伊出去庄外，然後將嘴涎呸佇伊的目睭，閣用雙手給伊摸，問講：「你有看著什麼？」 |
| 8:24 | 伊攑頭起來看，講：「我看著人，看起來親像樹仔啲行來行去。」 |
| 8:25 | 耶穌閣一遍用雙手摸伊的目睭，伊注神看，視力就復原，逐項攏看甲真清楚。 |
| 8:26 | 耶穌叫伊轉去𪜶兜，給伊講：「你連庄內都通入去。」 |
| 8:27 | 彼得宣認耶穌是基督 ( 太16:13-20 路9:18-21 ) 耶穌及伊的門徒去凱撒利亞‧腓立比附近的鄉村。佇路中，伊問𪜶講：「人講我是什麼人？」 |
| 8:28 | 𪜶應講：「有人講你是施洗者約翰；有人講是以利亞；嘛有人講是先知中的一個。」 |
| 8:29 | 耶穌閣問𪜶講：「恁咧，恁講我是什麼人？」 彼得應講：「你是基督。」 |
| 8:30 | 耶穌命令𪜶千萬通對人講起伊的代誌。 |
| 8:31 | 耶穌預告受難及復活 ( 太16:21-28 路9:22-27 ) 耶穌開始教示門徒講：「人子一定著受真多苦難，互長老、祭司長，及經學教師拒絕，閣互人害死，三日後復活。」 |
| 8:32 | 伊將此個代誌清清楚楚給𪜶講。彼得就扭耶穌去piⁿ-a，給伊責備。 |
| 8:33 | 耶穌越過來看門徒，責備彼得，講：「撒旦，閃開！你想的是上帝的事，是人的事。」 |
| 8:34 | 然後，耶穌給群眾及門徒叫倚來，對𪜶講：「欲隨我的人，著完全否定家己，夯家己的十字架來隨我。 |
| 8:35 | 因為欲救家己的性命的，會喪失性命；為著我及福音的緣故喪失家己的性命的，會救著性命。 |
| 8:36 | 人得著全世界煞喪失家己的性命有什麼利益？ |
| 8:37 | 人會當用什麼代價來交換家己的性命？ |
| 8:38 | 佇此個淫亂邪惡的世代，人若因為我及我的話感覺見笑，人子佇伊的父的榮光中及聖天使來臨的時嘛會因為伊感覺見笑。」 |