| 章節 | 現代台語漢字2013版經文 |
| 4:1 | 撒種籽的譬喻 ( 太13:1-9 路8:4-8 ) 耶穌閣一遍佇加利利湖邊啲教示人。有一大陣人聚集倚來伊遐，伊煞著去坐佇船頂；船佇湖裡，歸大陣人佇岸頂。 |
| 4:2 | 耶穌用譬喻教示𪜶真多項事。伊教示的時給𪜶講： |
| 4:3 | 「著注意聽！有一個撒種籽的人出去撒種籽。 |
| 4:4 | 伊撒的時，有的種籽落佇路邊，鳥仔飛來，給伊食了了。 |
| 4:5 | 有的落佇石頭地，土少的所在，因為土無深，真緊就茁芽， |
| 4:6 | 日頭一下出，給𪜶曝著，因為無根就焦去。 |
| 4:7 | 有的落佇莿內，刺仔大欉起來，給伊翕死，就無結實。 |
| 4:8 | 有的落佇好土地，就發芛，成長，結實；有的結三十倍，有的六十倍，有的一百倍。」 |
| 4:9 | 耶穌講：「有耳孔通聽的人，著聽！」 |
| 4:10 | 譬喻的目的 ( 太13:10-17 路8:9-10 ) 耶穌家己一個的時，佇伊周圍的人及十二使徒來問伊諸個譬喻的意思。 |
| 4:11 | 耶穌就給𪜶講：「上帝國的奧祕已經有互恁，拘對外人逐項攏是用譬喻， |
| 4:12 | 欲互
𪜶看閣看，嘛看無， 聽閣聽，嘛無了解； 若是按呢，𪜶會回心轉意， 上帝就給𪜶赦免。」 |
| 4:13 | 耶穌解說撒種籽的譬喻 ( 太13:18-23 路8:11-15 ) 耶穌閣問𪜶講：「此個譬喻恁𣍐了解是無？按呢恁哪會明白其他所有的譬喻？ |
| 4:14 | 撒種籽的是撒上帝的信息。 |
| 4:15 | 撒佇路邊的，是指人聽著信息，撒旦隨時來，給撒佇𪜶心內的信息搶去。 |
| 4:16 | 像款，撒佇石頭地的，是指人聽著信息，隨時歡喜接受， |
| 4:17 | 不過佇𪜶的心內釘根無深，擋𣍐久，一下為著信息抵著患難抑是迫害，隨時放拺。 |
| 4:18 | 撒佇莿內的，是指人聽著信息了後， |
| 4:19 | 因為生活的掛慮，錢財的迷惑，及其他逐款的私慾入去心內，給所聽著的信息翕死，煞𣍐結實。 |
| 4:20 | 許個撒佇好土地的，是指人聽著信息，歡喜接受就結實；有的三十倍，有的六十倍，有的一百倍。」 |
| 4:21 | 燈及量 ( 路8:16-18 ) 耶穌問𪜶講：「豈有人點燈用斗(14.21「斗」是一種量五穀的器具，深深，扳過來通蓋物件。*)蓋起來抑是囥佇眠床腳，無給伊𫞼佇燈台頂？ |
| 4:22 | 因為一切隱密的無一項𣍐顯露；一切掩蓋的無一項𣍐露現。 |
| 4:23 | 有耳孔通聽的人，著聽！」 |
| 4:24 | 耶穌閣給𪜶講：「著注意恁所聽的。恁用什麼量量互人，上帝會用像款的量量互恁，甚至互恁閣較多。 |
| 4:25 | 因為有的，欲互伊閣較多；無的，連伊所有的嘛欲給伊搶起來。」 |
| 4:26 | 種籽長大的譬喻 耶穌閣講：「上帝國親像人將種籽撒佇地裡。 |
| 4:27 | 伊暗時去睏，日時起來，種籽啲茁芽大欉，伊知是按怎會按呢。 |
| 4:28 | 土地自然生產五穀，代先茁芽，後來吐穗，最後飽穗。 |
| 4:29 | 五穀熟的時，隨時用鐮𠠝仔(24.29「鐮𠠝仔」是一種割稻仔抑是麥仔的刀。*)收割，因為收成的時到啦。」 |
| 4:30 | 芥菜籽的譬喻 ( 太13:31-32，34 路13:18-19 ) 耶穌問講：「咱欲用什麼來比並上帝國，欲用什麼譬喻來說明？ |
| 4:31 | 上帝國親像一粒芥菜籽，撒落地的時是地上種籽中上細粒的； |
| 4:32 | 撒落去，大欉起來，比所有的菜蔬閣較大欉，發出大支椏，甚至空中的鳥仔都會當佇樹影下做巢。」 |
| 4:33 | 耶穌用真多親像此款的譬喻對眾人宣講信息，攏照𪜶所會明白的給𪜶講。 |
| 4:34 | 伊無用別款的方式，只有用譬喻對𪜶講，不過干單及家己的門徒做夥的時才逐項給𪜶說明。 |
| 4:35 | 耶穌平靜風湧 ( 太8:23-27 路8:22-25 ) 彼日天暗的時，耶穌對門徒講：「咱過來去彼旁岸。」 |
| 4:36 | 門徒就離開群眾上船，及已經佇船頂的耶穌做夥去。有幾若隻船嘛做夥去。 |
| 4:37 | 忽然起大風，湧潑入船內，船煞互水淹到欲滿。 |
| 4:38 | 耶穌佇船尾靠枕頭啲睏；門徒給伊叫醒，講：「老師，咱啲欲無命囉，你無要緊噢？」 |
| 4:39 | 耶穌起來，責備風，閣命令湧，講：「靜落去！定落來！」風恬去，湖就靜靜靜。 |
| 4:40 | 耶穌對門徒講：「恁哪赫呢驚？恁猶無信心是無？」 |
| 4:41 | 𪜶非常驚惶，講來講去：「此個是什麼人，連風及湧都順服！」 |