上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
獻祭的條例
15:1 耶和華吩咐摩西講：
15:2 「你著吩咐以色列人，給𪜶講：恁若到我所賞賜恁徛起的地，
15:3 若愛對牛群抑羊群獻互耶和華做火祭，就是燒祭，抑是別號的祭，欲謝願，抑是做歡喜獻的祭，抑是到定著的節期，做芳芳獻互耶和華。
15:4 彼個獻禮物的逐隻羊仔著配幼的麵粉伊法十份一，及油一欣四份一，調和做素祭。
15:5 酒也著一欣四份的一，來做灌奠，無論燒祭，抑是別物祭，攏著按呢來獻互耶和華。
15:6 為著綿羊牨你著備辦幼的麵粉伊法十份二，及油一欣三份一，調和做素祭，
15:7 閣用酒一欣三份一做灌奠祭，做芳芳來獻互耶和華。
15:8 你若備辦牛牨仔做燒祭，抑是別號的祭來謝願，抑是做謝恩祭，來獻互耶和華，
15:9 就是用幼的麵粉伊法十份三，及油半欣，調和做素祭，及牛牨仔相及獻，
15:10 閣用酒半欣做灌奠的祭，獻互耶和華做芳芳的火祭。
15:11 「或是為著一隻牛牨，抑是一隻綿羊牨，抑是一隻綿羊仔，抑是山羊仔，攏著按呢做。
15:12 照恁所備辦的數額，照逐隻的額數攏著按呢做。
15:13 見若本地人將芳芳的火祭獻互耶和華，攏著按呢做諸個代誌。
15:14 若有外面人出外佇恁中間，抑是逐世代有人徛起佇恁中間，欲獻火祭芳芳佇耶和華，恁按呢行，𪜶也著按呢行。
15:15 論會眾，恁及徛起佇恁中間的出外人攏同一樣的例，做恁逐世代永遠的例，佇耶和華的面前，恁按呢，出外人也著按呢。
15:16 恁及外面人出外佇恁中間的著同一樣的例，一樣的法度。」
15:17 耶和華吩咐摩西講：
15:18 「你著吩咐以色列人給𪜶講：恁到我所導恁入去彼個地，
15:19 食彼所在的米糧，就著獻舉祭互耶和華。
15:20 恁著用起頭熟的麥粉創餅，獻做舉祭；恁舉起，親像舉起五穀場的五穀一樣。
15:21 恁逐世代著用恁起頭熟的麥粉，做舉祭獻互耶和華。
15:22 「恁有錯誤的時，無守耶和華所吩咐摩西諸個一切的命令，
15:23 就是耶和華託摩西一切所命令恁的，對耶和華命令恁的日到佇恁的逐世代，
15:24 若有錯誤行，會眾也知，後來會眾著獻一隻牛牨仔做燒祭，也照法度用伊的素祭及灌奠的祭，相及做芳芳獻互耶和華，閣著獻一隻山羊牨做贖罪的祭。
15:25 祭司著為以色列人的會眾贖罪，𪜶就得著赦免，因為這是錯誤。𪜶也因為𪜶的錯誤，帶𪜶的禮物，就是獻互耶和華的火祭及贖罪祭，攏帶到耶和華的面前。
15:26 以色列人的會眾及寄腳佇𪜶中間的外人就欲得著赦免，因為此個罪是百姓錯誤犯的。
15:27 「若有一人錯誤犯罪，伊就著獻未滿年的山羊母做贖罪祭。
15:28 彼個錯誤行的人佇伊錯誤犯罪的時，祭司著佇耶和華的面前給伊贖罪給伊贖罪，伊就欲得著赦免。
15:29 以色列中的本地人及寄腳佇𪜶中間的出外人，若錯誤行甚麼事，著同一個例。
15:30 總是彼個自專行代誌的，無論是本地人抑是寄腳的，伊褻瀆耶和華，著對伊的百姓中剪除去。
15:31 因為伊藐視耶和華的話，悖逆伊的命令，彼人著一盡剪除；伊的罪過欲歸佇伊。」
違反安息日的人
15:32 以色列人佇曠野的時，抵著一人佇安息日拾柴。
15:33 許個抵著彼個拾柴的人，帶伊到摩西、亞倫及會眾遐，
15:34 𪜶就給伊關禁；因為猶未指明，著怎樣辦伊。
15:35 耶和華對摩西講：「彼人的確著互伊死；會眾著佇營外用石頭擲伊。」
15:36 會眾導彼人出營外，用石頭擲伊到死，是照耶和華所命令摩西的。
有關衫仔墘做鬚的條例
15:37 耶和華吩咐摩西講：
15:38 「你著吩咐以色列人給𪜶講，互𪜶代代佇衫仔墘做鬚，閣佇下底邊的鬚頂糽一條藍色的幼帶。
15:39 欲給恁做鬚，互恁看見通記得耶和華的命令來行伊，免得恁放縱家己的心意、家己的目睭來行淫行，親像恁平素所行的一樣；
15:40 互恁記得來行我一切的命令，成做聖，歸恁的上帝。
15:41 「我是耶和華──恁的上帝，導恁出埃及地，欲做恁的上帝。我是耶和華──恁的上帝。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。