上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
路加福音
質問耶穌的權柄
20:1 ( 太 21:23-27 可 11:27-33 )
有一日，耶穌佇聖殿啲教示人閣傳福音。有祭司長、經學教師，及長老做夥來，
20:2 問伊：「給阮講，你靠什麼權柄做諸個代誌？什麼人互你此個權柄？」
20:3 耶穌應講：「我嘛欲問恁一句話。恁給我應。
20:4 約翰給人洗禮的權柄是對天抑是對人來的？」
20:5 𪜶互相議論：「咱若講『對天』，伊會講『按呢，恁是按怎無信約翰？』
20:6 咱若講『對人』，眾人會用石頭給咱抌，因為𪜶攏信約翰是先知。」
20:7 所以𪜶應講毋知對叨位來。
20:8 耶穌給𪜶講：「按呢，我嘛毋給恁講我靠什麼權柄做諸個代誌。」
歹佃農的譬喻
20:9 ( 太 21:33-46 可 12:1-11 )
耶穌閣用一個譬喻給眾人講：「有一個人開墾一坵葡萄園。伊將此坵園租互佃農，後來出外真久。
20:10 收成的時到，伊差一個僕人去佃農遐，欲給𪜶收園裡的果子。佃農給伊拍，互伊空手倒去。
20:11 主人閣差別個僕人去。𪜶嘛給伊拍，給伊侮辱，趕伊空手倒去。
20:12 主人就差第三個僕人去。𪜶嘛給伊傷害，給伊趕出去。
20:13 後來葡萄園的主人講：『今我著按怎做？我欲差我所疼的子去。𪜶大概會給伊尊重。』
20:14 毋拘佃農看著伊，就參詳講：『此個是伊的繼承人。咱來給伊刣死，按呢伊的財產就變做咱的。』
20:15 𪜶就給伊㧒出去葡萄園的外面，給伊刣死。
「按呢，葡萄園的主人會按怎給𪜶處理？
20:16 伊會來剿滅諸個佃農，將葡萄園租互別人。」
眾人聽著諸個話，就講：「千萬毋通有此款代誌！」
20:17 耶穌注意給𪜶看，講：「聖經所記載的是什麼意思：
起厝師傅所棄拺的石
已經成做上重要的基石。
20:18 所有摔落去彼塊石頭頂的人，會摔甲碎骨分屍；互彼塊石頭硩著的人，會硩甲碎糊糊。」
納稅的問題
20:19 ( 太 22:15-22 可 12:12-17 )
彼時，經學教師及祭司長知影耶穌講此個譬喻是啲指𪜶，就想欲當場下手掠耶穌，不過驚眾人。
20:20 所以，𪜶就尋機會，派密探假做老實人，欲掠耶穌的話縫，將伊交互總督通用伊的權柄依法辦理。
20:21 諸個密探來問耶穌講：「老師，阮知你所講所教示的攏真著，無偏心，只有忠實教示上帝的道理。
20:22 阮納稅互羅馬皇帝凱撒有合律法無？」
20:23 耶穌看出𪜶的詭計，就對𪜶講：
20:24 「提一個銀幣互我看。這有什麼人的像及字號？」
𪜶應講：「凱撒的。」
20:25 耶穌就對𪜶講：「按呢，凱撒的物互凱撒；上帝的物互上帝。」
20:26 𪜶佇公眾面前掠𣍐著耶穌的話縫，閣伊的應答互𪜶真著驚，就恬去。
死人閣活的問題
20:27 ( 太 22:23-33 可 12:18-27 )
有一寡主張無閣活的撒都該派的人來耶穌遐，問伊講：
20:28 「老師，摩西所寫的律法給阮講：『若有人伊的兄死去，某猶活啲毋拘無子，伊作小弟的著娶兄嫂替兄傳宗接代。』
20:29 以前曾有七個兄弟，上大的娶某，無子就死去。
20:30 第二的，
20:31 第三的嘛娶𪜶兄嫂。七個攏按呢，無子就死去。
20:32 後來，彼個婦仁人嘛死去。
20:33 按呢，閣活的時，此個婦仁人是叨一個人的某？因為此七個攏曾娶伊做某。」
20:34 耶穌給𪜶講：「今世的人有嫁有娶；
20:35 不過會堪得對死人中閣活閣進入來世的人就無嫁無娶。
20:36 因為𪜶是閣活的人，𣍐閣死，及天使像款是上帝的子兒。
20:37 關係死人閣活的事，摩西已經佇『啲𤏸的莿』彼段經節有指明，嘛稱呼主是亞伯拉罕的上帝，以撒的上帝，雅各的上帝。
20:38 伊毋是死人的上帝，是活人的上帝。因為對上帝來看，𪜶攏啲活。」
20:39 有幾若個經學教師對耶穌講：「老師，你講了真好。」
20:40 𪜶就毋敢閣給伊問什麼。
關係大闢後代的問題
20:41 ( 太 22:41-46 可 12:35-37 )
耶穌對𪜶講：「人哪會講基督是大闢的後代？
20:42 大闢本身佇詩篇講：
主給我的主講：
你坐我的正旁，
20:43 聽候我互你的對敵屈服佇你腳下。
20:44 大闢都稱呼基督做『主』，基督哪會是大闢的後代？」
譴責經學教師
20:45 ( 太 23:1-36 可 12:38-40 )
眾人啲聽的時，耶穌對伊的門徒講：
20:46 「著持防經學教師。𪜶愛穿長衫行來行去，佇市場口互人請安，佇會堂坐高位，佇宴會坐大位。
20:47 𪜶侵佔寡婦的家伙，刁故意祈禱真長。𪜶會受閣較重的刑罰。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。