上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬可福音
施洗者約翰的傳道
1:1 ( 太3:1-12 路3:1-9，15-17 約1:19-28 )
上帝的子(11.1有的抄本無「上帝的子」此句。*)耶穌基督的福音按呢開始。
1:2 先知以賽亞的冊有記載：
上帝講：
看啊，我差我的使者做你的先鋒，
伊欲給你開路。
1:3 有聲佇曠野啲喝：
著為主準備道路，
為著伊修直小路。
1:4 果然，約翰佇曠野出現，給人洗禮，宣揚講：「著悔改，領受洗禮，上帝就赦免恁的罪。」
1:5 猶太逐所在有真多人及耶路撒冷所有的人攏出來，去約翰遐，告白家己的罪，佇約旦河對伊領受洗禮。
1:6 約翰穿駱駝毛的衫，腰縖皮帶，食草蜢及野蜜。
1:7 伊宣揚講：「有一位比我較有權能的佇我後面啲來，我連踞落去給伊解鞋帶都𣍐堪得。
1:8 我用水給恁洗禮，拘伊欲用聖神給恁洗禮。」
耶穌領受洗禮
1:9 ( 太3:13-17 路3:21-22 )
過無幾日，耶穌對加利利的拿撒勒來，佇約旦河對約翰領受洗禮。
1:10 耶穌一下對水裡起來，就看見天裂開，聖神親像粉鳥降落佇伊身上。
1:11 閣對天有聲講：
你是我所疼的子，
你，我真意愛。
耶穌受試探
1:12 ( 太4:1-11 路4:1-13 )
聖神隨時催迫耶穌去曠野。
1:13 伊佇曠野四十日久受撒旦試探；伊一直攏及野獸做夥，拘有天使啲給伊伺候。
耶穌呼召四個掠魚的
1:14 ( 太4:12-22 路4:14-15 5:1-11 )
約翰受掠了後，耶穌去加利利宣揚上帝的福音，
1:15 講：「時機到啊，上帝的主權啲欲實現啦，著悔改，信福音。」
1:16 耶穌對加利利湖邊經過的時，看著西門及伊的小弟安得烈佇湖裡啲拋網，因為𪜶是掠魚的。
1:17 耶穌對𪜶講：「來隨我，我欲互恁得著人親像掠魚的得著魚。」
1:18 𪜶隨時給網放咧，去隨耶穌。
1:19 行無偌遠，耶穌看著西庇太的子雅各及伊的小弟約翰佇船頂啲整理網。
1:20 伊隨時呼召𪜶，𪜶就將老父西庇太及倩的工人放佇船頂，隨耶穌去。
耶穌醫好邪神附身的人
1:21 ( 路4:31-37 )
耶穌及伊的門徒到迦百農；安息日一下到，伊隨時入去會堂教示。
1:22 眾人對伊的教示感覺非常希奇，因為伊的教示真有權威，及經學教師無相像。
1:23 彼時，會堂內有一個邪神附身的人雄雄喝出來：
1:24 「拿撒勒人耶穌，你插阮！你來欲毀滅阮是無？我知你是什麼人；你是上帝的聖者。」
1:25 耶穌給伊責備講：「恬恬！對此個人出去！」
1:26 邪神互彼個人抽惙，大聲喝一聲，就對伊出去。
1:27 眾人著驚，議論紛紛講：「這是什麼代誌？是有權柄的新教示！伊命令邪神，𪜶攏降服。」
1:28 耶穌的名聲隨時傳到加利利及周圍逐所在。
耶穌醫好真多病人
1:29 ( 太8:14-17 路4:38-41 )
耶穌一下離開會堂，隨時導雅各及約翰去西門及安得烈𪜶兜。
1:30 西門的丈姆抵啲發熱，倒佇眠床，𪜶隨時將伊的情形給耶穌講。
1:31 耶穌行倚去牽伊的手，給伊扶起來；伊的熱退去，就給𪜶伺候。
1:32 黃昏，日落的時，眾人將逐種病人及鬼附身的人攏導來耶穌遐。
1:33 通城的人攏聚集佇門口。
1:34 耶穌醫好真多患著逐款病的人，閣趕出真多鬼。伊准鬼講話，因為𪜶知伊是什麼人。
耶穌佇加利利傳道
1:35 ( 路4:42-44 )
隔日透早，天猶未光，耶穌就起來，出去偏僻無人住的所在，佇遐祈禱。
1:36 西門及同伴去尋伊。
1:37 𪜶尋著就給伊講：「逐個攏啲尋你。」
1:38 耶穌應講：「咱來去附近的庄社，我嘛通佇遐傳道，因為這是我出來的目的。」
1:39 耶穌去加利利逐所在，佇𪜶的會堂傳道閣趕鬼。
耶穌醫好痲瘋病人
1:40 ( 太8:1-4 路5:12-16 )
有一個痲瘋病人來懇求耶穌，跪落去對伊講：「你若肯，會當互我清氣。」
1:41 耶穌滿心憐憫，伸手給伊摸，講：「我肯，互你清氣！」
1:42 伊的痲瘋隨時無去，伊就清氣。
1:43 耶穌隨時叫伊離開，嚴嚴給伊吩咐，
1:44 講：「千萬通給人講。不過你著去互祭司驗，閣照摩西的規定為著你有得著清氣獻祭物，通對眾人證明。」
1:45 拘，伊一下出去就四界宣傳報揚此個消息，致到耶穌𣍐當公開入城，煞著住佇城外偏僻的所在。眾人猶原對逐所在去尋伊。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。