上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
使徒行傳
9
掃羅歸主
( 徒22:6-16 26:12-18 )
掃羅繼續恐嚇欲殺害主的門徒。伊去見大祭司，
2 要求大祭司寫公函互大馬士革逐個會堂，准伊搜查，若有尋著信奉此個道路的人，無論男女，通給𪜶縛起來，押去耶路撒冷。
3 伊就去，啲欲到大馬士革的時忽然有光對天來，四面給伊照。
4 伊就跋落地，聽見有聲對伊講：「掃羅，掃羅，你是按怎啲迫害我？」
5 伊問講：「主啊，你是什麼人？」彼個聲應講：「我就是你啲迫害的耶穌。
6 起來，入去城內，你著做的事，有人會給你講。」
7 同行的人就徛啲，愣愣𣍐講話；𪜶有聽著聲，攏無看著人。
8 掃羅對土腳𬦰起來，目睭搋開，攏無看著什麼。𪜶就牽伊的手，導伊入去大馬士革。
9 伊三日久無看見，無食，嘛無飲。
10 佇大馬士革有一個門徒名叫做亞拿尼亞。佇異象中主給伊叫：「亞拿尼亞！」伊應講：「主啊，我佇遮。」
11 主講：「起來，去彼條直街，佇猶大的厝尋一個大數人叫做掃羅；伊抵啲祈禱。
12 伊佇異象中有看見一個人叫做亞拿尼亞入來給伊按手，互伊會當閣看見。」
13 亞拿尼亞應講：「主啊，我有聽著真多人講起此個人佇耶路撒冷對你的信徒做真多惡毒的代誌。
14 伊有祭司長的授權通掠所有求叫你的名的人，現在來佇遮。」
15 主對伊講：「你去，伊是我揀選的器具，欲對外邦人、君王，及以色列人宣揚我的名。
16 我嘛欲互伊知，為著我的名伊一定著受真多苦難。」
17 亞拿尼亞就去，入去彼間厝，給掃羅按手，講：「掃羅兄弟，你來的路中對你顯現的主耶穌差我來欲互你會當閣看見，閣受聖神充滿。」
18 隨時有親像魚鱗的物件對掃羅的目睭落落來，伊就閣會看見。伊起來，領受洗禮；
19 食飽了後，體力復原。
掃羅佇大馬士革傳道
掃羅及佇大馬士革的門徒做夥住幾若日。
20 伊隨時佇逐個會堂宣講耶穌，講：「伊是上帝的子。」
21 聽著的人攏著驚，講：「佇耶路撒冷消滅求叫此個名的，豈是此個人？伊來遮豈是欲掠信徒，給𪜶押去交互祭司長？」
22 掃羅愈講愈有力，證明耶穌是基督，互住佇大馬士革的猶太人無通辯駁。
23 真多日後，猶太人鬥陣計謀欲刣掃羅，
24 𪜶的計謀有互掃羅聽著。𪜶暝日佇城門當等欲給伊刣。
25 拘伊的門徒佇暗時給伊導出來，用一個籃仔對城牆頂給伊縋落去。
掃羅佇耶路撒冷
26 掃羅到耶路撒冷，想欲及門徒交陪，𪜶攏驚伊，因為無相信伊是門徒。
27 不過巴拿巴接納伊，導伊去見使徒，給𪜶說明掃羅佇路中看見主的經過，及主對伊講話，以及伊佇大馬士革偌仔呢勇敢奉主的名傳道的代誌。
28 掃羅佇耶路撒冷及使徒有出入來往，奉主的名好膽傳道。
29 伊嘛有及講希臘語的猶太人講話辯論，𪜶猶久不時計謀欲給伊刣。
30 信徒知影此個代誌，就導伊落去凱撒利亞，對遐送伊去大數。
31 彼時，猶太、加利利，及撒馬利亞逐所在的教會攏有平安，愈堅固發展，所行所做敬畏主，得著聖神的鼓勵，人數一直加添。
彼得佇呂大及約帕
32 彼得去逐所在訪問，嘛有訪問𫢶佇呂大的信徒。
33 伊佇遐抵著一個人名叫做以尼雅；此個人半身不遂，已經倒床八年久。
34 彼得對伊講：「以尼雅，耶穌基督給你醫好啦。起來，整理家己的眠床。」以尼雅隨時起來。
35 所有住佇呂大及沙崙的人攏有看著，就信來歸主。
36 佇約帕有一個女信徒，名叫做大比大，希臘語是多加，(19.36「多加」意思是鹿仔。*)伊有做真多好事，賑濟散赤人。
37 伊破病死去，人洗伊的屍體了後，給伊下佇樓頂的房間。
38 因為呂大離約帕無遠，門徒聽著彼得佇遐，就差兩個人去遐，求伊講：「請你趕緊來阮遐。」
39 彼得就起來，及𪜶做夥去。伊一下到位，有人導伊去樓頂的房間。所有的寡婦攏圍佇彼得的身邊啼哭，提多加生前所做的內衫外衫互伊看。
40 彼得叫大家攏出去，就跪落去祈禱，然後越過去對屍體講：「大比大，起來！」多加目睭搋開，看著彼得就起來坐。
41 彼得伸手給伊扶起來，後來叫許個信徒及寡婦攏入來，互復活起來的多加及𪜶見面。
42 此個消息傳遍約帕，就有真多人來信主。
43 彼得佇約帕一個翻皮師傅西門的厝住真多日。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 3.1) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型3.1版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。