上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
雅各到拉班的厝
29:1 雅各繼續行，去到東方的人的地。
29:2 伊看著野地有一口井，有三陣羊倒佇遐；人攏汲彼口井的水互羊飲。井用大塊石蓋啲。
29:3 平時，羊群聚集佇遐，顧羊的將石頭徙開，汲水互羊飲，才閣將石頭徙倒去原位。
29:4 雅各對𪜶講：「朋友啊，恁對叨位來？」
𪜶講：「阮對哈蘭來。」
29:5 伊問𪜶：「恁豈識拿鶴的孫拉班？」
𪜶講：「阮識。」
29:6 雅各閣講：「伊有好勢好勢無？」
𪜶講：「有。你看，伊的查某子蕾潔導伊的羊群啲來。」
29:7 雅各講：「日頭猶即大，猶未到趕羊轉去的時間，哪毋互羊飲水，閣去食草？」
29:8 𪜶講：「阮猶𣍐當，著聽候所有的羊群攏到，牧者給石頭徙開，才會當互羊飲水。」
29:9 雅各啲及𪜶講話的時，蕾潔導𪜶老父的羊來，因為是伊啲顧。
29:10 雅各看著母舅拉班的查某子蕾潔及拉班的羊群，就進前將石頭徙開，互拉班的羊群飲。
29:11 雅各唚蕾潔，給伊請安，閣大聲哮。
29:12 雅各給蕾潔講，伊是𪜶老父的外甥仔，是麗百加的子；蕾潔就走轉去給𪜶老父講。
29:13 拉班聽著外甥仔雅各的消息，就走去接伊，給伊攬啲，給伊唚，導伊去𪜶兜；雅各將代誌的經過給拉班講。
29:14 拉班給雅各講：「你真正是我的骨肉至親。」雅各就及伊住一月日。
雅各給拉班做工
29:15 拉班給雅各講：「咱雖然是親成，我哪通互你白白給我做工？你著給我講，我著互你偌多工錢。」
29:16 拉班有兩個查某子，大的叫做麗亞，細的叫做蕾潔。
29:17 麗亞目睭媠，蕾潔身材好，生做媠。
29:18 雅各愛蕾潔，就講：「我願意為著你的細漢查某子蕾潔做工七年。」
29:19 拉班講：「給伊嫁互你，比嫁互別人較好。你及我住。」
29:20 雅各就為著蕾潔給拉班做工七年；因為深深愛伊，七年假若親像幾日仔。
29:21 雅各對拉班講：「七年滿啦，請你將我的某互我，我通及伊結婚。」
29:22 拉班辦桌請彼所在的人。
29:23 到日暗，拉班將伊的查某子麗亞送來互雅各，伊就及麗亞同房。
29:24 拉班將伊的女婢悉帕互伊的查某子麗亞做女婢。
29:25 到天光，雅各一下看著是麗亞，就對拉班講：「你哪會按呢對待我？我給你做工，豈毋是為著蕾潔？你是按怎欺騙我？」
29:26 拉班講：「猶未嫁大的，先嫁細的，佇阮遮無此個例。
29:27 你及麗亞七日的喜事了後，阮就將蕾潔嫁互你，毋拘你著閣給我做工七年。」
29:28 雅各就照按呢做。伊及麗亞做夥七日了後，拉班就將伊的查某子蕾潔互雅各做某。
29:29 拉班將伊的女婢辟拉互蕾潔做女婢。
29:30 雅各嘛及蕾潔同房；伊較疼蕾潔，就閣給拉班做工七年。
雅各的兒女
29:31 上主看著麗亞無受疼惜，就互伊懷孕；毋拘蕾潔𣍐生。
29:32 麗亞懷孕生子，就給伊號名叫做呂便；伊講：「上主看見我的苦情；今我的丈夫會疼我。」
29:33 伊閣懷孕生第二個子；伊講「上主聽見我無受疼惜，所以閣互我此個子」，就給伊號名叫做西緬。
29:34 伊閣懷孕生第三個子，講「我給丈夫生三個子，伊會及我結連」，就給伊號名叫做利未。
29:35 伊閣懷孕生第四個子，講「此遍我欲稱讚上主」，就給伊號名叫做猶大；麗亞就無閣生。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。